༢༠༠༩ ཕྱི་ཟླ་ ༤ ཚེས་ ༢༩ རེས་གཟའ་ལྷག་པ།
༄༅། །འགྲོ་བ་ལྷ་དང་བཅས་པའི་༸མགོན་སྐྱབས་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྟོན་འཁོར་དང་བཅས་ ༢༠༠༩ ཕྱི་ཟླ་ ༤ ཚེས་ ༢༧ ཉིན་གྱི་སྔ་དྲོ་ཨ་རིའི་གྲོང་ཁྱེར་སན་ཕ་རན་སེ་སི་ཀོ་ནས་རོ་ཆི་སེ་ཊར་(Rochester)བརྒྱུད་བོ་སེ་ཊོན་(Boston)ལ་ཆིབས་ཞལ་བསྒྱུར་གནང་ཡོད།
༸གོང་ས་༸སྐྱབས་མགོན་ཆེན་པོ་མཆོག་ནས་སན་ཊེ་མ་རིསེ་ཞེས་པའི་སྨན་ཁང་གི་མཆོད་ཁང་དུ་བཀའ་སློབ་བཀའ་དྲིན་སྩོལ་བཞིན་པ།
ཨ་རིའི་མིན་ནི་སོ་ཊ་མངའ་སྡེའི་གྲོང་ཁྱེར་རོ་ཆི་སེ་ཊར་(Rochester in Minnesota)དུ་༸ཞབས་སོར་འཁོད་སྐབས་མིན་ནི་སོ་ཊར་ཁུལ་དུ་གནས་སྡོད་བོད་མི་གྲངས་ ༦༠༠ ལྷག་ཙམ་ཕེབས་བསུར་བཅར་ཡོད་པ་རེད། ཐེངས་འདིའི་ཆིབས་སྒྱུར་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རོ་ཆི་སེ་ཊར་དུ་ཡོད་པའི་མ་ཡོ་སྨན་དཔྱད་ཁང་ (Mayo Clinic)དུ་ལོ་རེའི་སྐུའི་འཕྲོད་བཞེས་ལ་བརྟག་དཔྱད་གནང་ཡོད་པ་དང་། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་ནས་རོ་ཆི་སེ་ཊར་ནང་ཡོད་སན་ཊེ་མ་རིསེ་ཞེས་པའི་སྨན་ཁང་གི་མཆོད་ཁང་དུ་ (Saint Marys Hospital chapel)ཁུལ་དེར་ཡོད་པའི་བོད་མིས་གཙོས་མི་མང་བརྒྱ་ཕྲག་བརྒལ་བར་དུས་ཡུན་སྐར་མ་ ༤༠ ཙམ་གྱི་རིང་ལ་མཇལ་ཁ་དང་བཀའ་སློབ་བཀའ་དྲིན་སྩལ་ཡོད་འདུག
དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ནས་བཀའ་སློབ་ཕེབས་དོན། ཁྱེད་རང་ཚོས་ཤེས་རྟོགས་དགོས་པ་ཞིག་ལ་ཁྱེད་རྣམས་དང་། ཁྱེད་རྣམས་ཀྱི་ཕ་མ་ཚོས་བོད་བཞག་ནས་ཡོང་དགོས་དོན་ནི། བོད་ནང་རྒྱ་ནག་གཞུང་གིས་བོད་མིར་སྟངས་འཛིན་ཡོང་སླད་རང་སྣང་གང་དྲན་གྱིས་དྲག་གནོན་དང་ཐུབ་ཚོད་བཏང་བའི་རྐྱེན་གྱིས་ཡིན། ཞེས་དང་ལྷག་དོན་དུ་༸གོང་ས་མཆོག་ནས། བོད་མི་ཡོངས་རྫོགས་འཚེ་མེད་ཞི་བའི་ཐོག་ནས་བོད་ཀྱི་འཐབ་རྩོད་ནང་མཉམ་ཞུགས་གནང་དགོས་པ་དང་། འཚེ་མེད་ཞི་བའི་ཐབས་ལམ་གྱི་དགོས་མཁོ་གཙོ་བོ་ནི་ཤེས་ཡོན་ཡིན། དེར་བརྟེན་བོད་པའི་གཞོན་སྐྱེས་ཚོས་དེང་དུས་ཀྱི་ཤེས་ཡོན་ཙམ་མ་ཡིན་པར་བོད་ཀྱི་ཐུན་མོང་མ་ཡིན་པའི་རིག་གཞུང་ལའང་དོ་སྣང་དང་སྦྱང་བརྩོན་བྱེད་དགོས་པའི་བཀའ་སློབ་ལམ་སྟོན་ཕེབས་ཡོད་པ་རེད།
མཐའ་དོོན་༸གོང་ས་མཆོག་གིས། བོད་ཀྱི་འཐབ་རྩོད་འདི་ནི་དྲང་བདེན་གྱི་འཐབ་རྩོད་ཅིག་ཡིན་སྟབས་དེར་བཟང་ཕྱོགས་ཀྱི་གྲུབ་འབྲས་ཤིག་ཐོན་ངེས་རེད། ཅེས་བཀའ་ཕེབས་པ་དང་སྦྲགས་བོད་མི་ཚོས་རྒྱ་མི་རིགས་དང་ལྷན་དུ་མཛའ་འབྲེལ་འཛུགས་རྒྱུར་ཞེན་ལོག་མ་བྱས་པར་ཁོང་ཚོར་བོད་ཀྱི་གནས་སྟངས་དང་། བོད་ཀྱི་གནད་དོན་སྐོར་འགྲེལ་བརྗོད་བྱས་ན་ཁོང་ཚོས་བོད་པའི་གནད་དོན་ལ་བསམ་ཤེས་ཐུབ་སྲིད་པ་རེད། ཅེས་བཀའ་སློབ་སྩལ་ཡོད་པ་བཅས་ ༢༠༠༩ ཕྱི་ཟླ་ ༤ ཚེས་ ༢༩ ཉིན་༸གོང་ས་༸སྐྱབས་མགོན་ཆེན་པོ་མཆོག་རོ་ཆི་སེ་ཊར་ནས་བོ་སེ་ཊོན་དུ་ཆིབས་སྒྱུར་བསྐྱངས་ཡོད་པའི་གནས་ཚུལ་དུ།།
