༢༠༡༣ ཟླ་ ༢ ཚེས་ ༢༡ རེས་གཟའ་ཕུར་བུ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༣ ཟླ་ ༢ ཚེས་ ༢༡ བཏང་གནས་ནང་འཁོད་དོན། ཕྱི་ཟླ་ ༢ ཚེས་ ༢༠ རེས་གཟའ་ལྷག་པའི་དགོང་དྲོ་ཐེ་ཝན་བོད་
ཀྱི་སྐུ་ཚབ་དོན་གཅོད་ཁང་དང་། ཐེ་ཝན་དུ་གནས་སྡོད་བོད་རིགས་ཚོགས་པ་ཐུན་མོང་ནས་རང་གཞུང་བཀའ་ཤག་གི་ཛ་དྲག་གསལ་བསྒྲགས་དགོངས་དོན་ལྟར། གཞིས་བཞུགས་སྤུན་ཟླ་རྣམས་ཀྱིས་བོད་བསྟན་སྲིད་དང། མི་རིགས། རང་དབང་སོགས་ཀྱི་དོན་དུ་རྒྱ་ནག་དམར་པོའི་དྲག་གནོན་གདུག་རྩུབ་ཕུགས་ངན་སྲིད་བྱུས་ལ་ཞི་རྒོལ་གྱིས་རང་ལུས་མེར་སྲེག་བཏང་དང་གཏོང་མུས་ཡིན་པ་མ་ཟད། དེ་ལས་མང་བ་ཞིག་རྒྱའི་བཙོན་ཁང་ནང་བརྗོད་དུ་མེད་པའི་དཀའ་སྡུག་ཚད་མེད་མྱངས་དང་མྱོང་བཞིན་པ་རྣམས་ལ་གདུང་སེམས་མཉམ་སྐྱེ་དང་སྐྱིད་སྡུག་མཉམ་མྱོང་ཞུ་ཆེད་ཐེ་ཝན་རང་དབང་ཐང་ཆེན་མདུན་དུ་མཆོད་འབུལ་སྨོན་ལམ་ཚོགས་ཡོད།
གོ་སྒྲིག་གནང་མཁན་གྱིས་སྨོན་ལམ་ཚོགས་པའི་དགོས་དམིགས་ངོ་སྤྲོད་གནང་རྗེས། ཐེ་ཝན་གྲོས་ཚོགས་འཐུས་མི་ལྕམ་གྲན་ཇའེ་རུའུ་ལགས་ཆེད་དུ་ཕེབས་ཏེ་བོད་མི་རྣམས་ལ་གདུང་སེམས་མཉམ་སྐྱེ་དང་། ཁོང་ཉིད་ག་དུས་ཡིན་ཡང་བོད་མིར་རྒྱབ་སྐྱོར་གནང་མཁན་ཞིག་ཡིན་ལ། མུ་མཐུད་རྒྱབ་སྐྱོར་གནང་རྒྱུའི་གསུང་བཤད་གནང་རྗེས་རྒྱལ་སྤྱིའི་ཉེས་ཡངས་ཚོགས་པ་ཐེ་ཝན་ཡན་ལག་ལས་ཁང་དང་། ཐེ་ཝན་འགྲོ་བ་མིའི་ཐོབ་ཐང་གོང་འཕེལ་ཚོགས་པ་སོགས་ཀྱི་འགན་འཁུར་མི་སྣ་ཡང་ཆེད་དུ་ཕེབས་ནས་བོད་མིར་རྒྱབ་སྐྱོར་གྱི་གསུང་བཤད་གནང་ཡོད། དེ་ཉིན་བོད་མི་སེར་སྐྱ་མང་ཚོགས་དྲུག་ཅུ་ལྷག་ལྷན་ཞུགས་གནང་སྟེ། དཔའ་བོའི་སྣང་བརྙན་མདུན་སྟོང་མཆོད་བཤམས་ཏེ་འཕགས་པ་བཟང་པོ་སྤྱོད་པའི་སྨོན་ལམ་སོགས་གསུང་འདོན་གནང་ཡོད་པ་བཅས། །
