༢༠༠༩ ཕྱི་ཟླ་ ༤ ཚེས་ ༢༩ རེས་གཟའ་ལྷག་པ།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་བར་གཞིགས་ན། འགྲོ་བ་ལྷ་དང་བཅས་པའི་མགོན་༸སྐྱབས་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ ༢༠༠༩ ཕྱི་ཟླ་ ༤ ཚེས་ ༢༦ ཉིན་Unsung Heroes of Compassionཞེས་པའི་གཞན་ཕན་གྱི་ཕྱག་ལས་གནང་མཁན་ཚོར་ཆེ་བསྟོད་ཀྱི་བྱ་དགའ་གསོལ་སྩལ་གནང་ཡོད་འདུག
དེ་ཡང་Wisdom In Actionཞེས་པའི་ཚོགས་པས་ཕྱི་ལོ་ ༢༠༠༡ ནས་བཟུང་སྤྱི་ཚོགས་ནང་བྱམས་བརྩེ་དང་ལྡན་པའི་ཕྱག་ལས་གནང་མཁན་རྣམས་ལ་ཆེ་བསྟོད་ཞུ་སླད་Unsung Heroes of Compassionཞེས་པའི་བྱ་དགའ་ཞིག་གནང་འགོ་ཚུགས་ཡོད་པ་དང་། ཐེངས་འདིར་སན་ཕ་རན་སེ་སི་ཀོའི་གྲོང་ཁྱེར་ནང་གི་རི་ཚེ་ཁར་ཊོན་མགྲོན་ཁང་(Ritz Carlton)དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་Unsung Heroes of Compassionཞེས་པའི་བྱ་དགའ་ཐེངས་གསུམ་པ་དེ་གསོལ་སྩལ་གནང་ཡོད། དེའི་ནང་རྒྱལ་ཁབ་ཁག་བཅུ་གསུམ་ནས་ཕེབས་པའི་བྱམས་སེམས་ཅན་གྱི་མི་སྣ་སྐྱེས་པ་ ༢༤ དང་བུད་མེད་ ༢༥ བཅས་ཁྱོན་བསྡོམས་མི་གྲངས་ ༤༩ ལ་བྱ་དགའ་གསོལ་རས་སྩལ་ཡོད་པ་རེད། དེའི་ཁོངས་སུ་ཨ་རི་ནས་ཡིན་པའི་སྐུ་ཞབས་ངག་དབང་འཇིགས་མེད་ལགས་དང་། ནིའུ་ཛི་ལན་ཌེ་ནས་ཡིན་པའི་ནིའུ་ཛི་ལན་ཌེ་བོད་མིའི་ཚོགས་པའི་ཚོགས་གཙོ་ཐུབ་བསྟན་སྐལ་བཟང་ལགས། ཨོ་སེ་ཊོ་ལི་ཡ་ནས་ཡིན་པའི་རྡོ་རྗེ་དགྲ་འདུལ་ལགས་བཅས་བོད་རིགས་གསུམ་ལ་བྱ་དགའ་དེ་ཐོབ་ཡོད་པ་རེད།
བྱ་དགའ་གསོལ་སྩལ་གྱི་མཛད་སྒོའི་ཐོག་༸གོང་ས་༸སྐྱབས་མགོན་ཆེན་པོ་མཆོག་གིས་བྱ་དགའ་ཐོབ་མཁན་ཚང་མར་བཀའ་སློབ་ཕེབས་དོན། སངས་རྒྱས་ཀྱི་གོ་འཕང་ཐོབ་རྒྱུའི་ནུས་པ་ཡོད་པ་གཅིག་མཚུངས་ཡིན། བྱ་དགའ་དེ་ཐོབ་རྗེས་བྱམས་བརྩེ་ལྡན་པའི་ཕྱག་ལས་མུ་མཐུད་གནང་དགོས་སྐོར་བཀའ་ཕེབས་ཡོད་པ་མ་ཟད། ཐེངས་འདིའི་བྱ་དགའ་ཐོབ་མཁན་རྣམ་པར་འཚམས་འདྲི་གནང་བ་དང་ཆབས་ཅིག བྱ་དགའ་ཐོབ་པའི་བློ་སྤོབས་འཁྱེར་ཏེ་མ་བསྡད་པར་བྱ་དགའ་དེས་མུ་མཐུད་གཞན་ཕན་ཆེད་ཕྱག་ལས་གནང་རྒྱུར་སྐུལ་སློང་སྐྲུན་ཐུབ་པ་ཞིག་བྱ་དགོས་ཀྱི་རེད། ཅེས་བཀའ་སློབ་ལམ་སྟོན་སྩལ་ཡོད།
མཛད་སྒོ་དེའི་ཐོག་བཅར་བའི་མི་ཁག་གཅིག་ནས། མི་སྒེར་རམ་མཉམ་འབྲེལ་ཐོག་ནས་བོད་དོན་ཐད་གང་བྱེད་ཐུབ་ཀྱི་ཡོད་སྐོར་གྱི་དྲི་བ་ཕུལ་བར་མགོན་པོ་གང་ཉིད་ནས་བཀའ་ལན་ཕེབས་དོན། སྔ་ལོའི་གསུམ་བཅུའི་དུས་དྲན་ནས་བཟུང་མགོན་པོ་ཉིད་ས་གནས་གང་དུ་ཕེབས་ཀྱང་བོད་ནང་གི་དངོས་ཡོད་གནས་སྟངས་མཁྱེན་རྟོགས་ཡོང་སླད་རྒྱལ་་སྤྱིའི་གསར་འགོད་པ་བོད་ནང་ཕེབས་དགོས་པའི་འབོད་སྐུལ་གནང་གི་ཡོད། ཅེས་བཀའ་སྩལ་བ་དང་འབྲེལ་དེ་རིང་སླར་ཡང་མཛད་སྒོར་བཅར་བའི་མི་མང་རྣམས་ལ་རང་ངོས་ནས་རྟོག་ཞིབ་ཆེད་བོད་ནང་ཕེབས་དགོས་པ་དང་། གལ་ཏེ་བོད་ནང་གི་བོད་མི་རྣམས་རྒྱ་ནག་གཞུང་གིས་བརྗོད་པ་བཞིན། བདེ་སྐྱིད་ངང་གནས་བཞིན་ཡོད་ན། དེར་སྐྱོན་བརྗོད་ཞུ་རྒྱུ་གང་ཡང་མེད་པར་དགོངས་སེལ་ཞུ་རྒྱུ་ཡིན། ཞེས་བཀའ་ཕེབས་ཡོད་པའི་གནས་ཚུལ་དུ།།
