༢༠༡༣ ཟླ་ ༢ ཚེས་ ༡༩ རེས་གཟའ་མིག་དམར།
༄༅། །བཀའ་ཤག་གི་བཀོད་ཁྱབ་ལྟར་ཕྱི་ལོ་ ༢༠༡༣ ཟླ་ ༢ ཚེས་ ༡༩ ཉིན་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་ཕྱི་དྲིལ་ལས་ཁུངས་ཀྱི་དྲུང་འཕར་བཀྲིས་ཕུན་ཚོགས་ལགས་
ཀྱིས་དྲིལ་བསྒྲགས་ལས་ཁུངས་ཀྱི་དྲུང་ཆེའི་ལས་འཁུར་ཞུས་པའི་རྟེན་འབྱུང་གི་མཛད་སྒོ་སྟབས་བདེ་ཞིག་ཚོགས་ཡོད།
དེ་ཉིན་སྔ་དྲོ་ཆུ་ཚོད་ ༡༡ ཐོག་ཕྱི་དྲིལ་འཛིན་སྐྱོང་འགན་འཛིན་ཡེ་ཤེས་དབང་མོ་ལགས་ཀྱིས་གཙོ་སྐྱོང་འོག་དེ་སྔའི་དྲིལ་བསྒྲགས་དྲུང་ཆེ་བཀྲིས་ལགས་ཀྱིས་དྲུང་ཆེ་གསར་པ་བཀྲིས་ཕུན་ཚོགས་ལགས་ཀྱི་ལོ་རྒྱུས་སྙིང་བསྡུས་ངོ་སྤྲོད་གནང་རྗེས་དྲུང་ཆེ་གསར་པས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་ཞུས་གྲུབ་མཚམས་ཕྱི་དྲིལ་ལས་བྱེད་རྣམས་ནས་རིམ་བཞིན་༸གོང་ས་མཆོག་གི་སྐུ་པར་རིན་པོ་ཆེ་མཆོག་དང་དྲུང་ཆེ་གསར་པར་མཇལ་དར་སྒྲོན་གྲུབ་བསྟུན་གསོལ་ཇ་འབྲས་སིལ་ཕུལ། དེ་ནས་དྲུང་ཆེ་བཀྲིས་ཕུན་ཚོགས་ལགས་ཀྱིས་ཐོག་མར་འཚམས་འདྲི་དང་སྦྲགས་བོད་ཀྱི་གནད་དོན་དེ་རྒྱལ་སྤྱིའི་གནད་དོན་ལ་སོང། ང་ཚོས་ཤུགས་རྒྱག་དགོས་པ་དང་། བོད་མིའི་སྒྲིག་འཛུགས་ཀྱི་རྣམ་པར་ཡིད་ཆེས་འཕེར་བ་ཡོང་སླད་འབད་བརྩོན་སྔར་ལྷག་བྱེད་དགོས་པའི་དུས་ལ་བབ་པའི་མི་རིགས་ཤིག་ཆགས་ཡོད་པས། རང་འཁྲིའི་ལས་འགན་བསྒྲུབ་རྒྱུ་ཧ་ཅང་གལ་ཆེན་ཡིན་སྐོར་སོགས་མ་འོངས་པའི་ལས་དོན་བྱེད་ཕྱོགས་དང་འབྲེལ་བའི་གསུང་བཤད་སྙིང་བསྡུས་ཤིག་གནང་སྟེ་སྟབས་བདེའི་མཛད་སྒོ་གྲོལ་ཡོད།
དེ་ཡང་དྲིལ་བསྒྲགས་ལས་ཁུངས་ཀྱི་དྲུང་ཆེ་གསར་པ་བཀྲིས་ཕུན་ཚོགས་ལགས་ཀྱི་ལོ་རྒྱུས་སྙིང་བསྡུས། ཕྱི་ལོ་ ༡༩༧༣ ལོར་རྒྱ་གར་ཅན་དྷི་སྒར་པན་ཇབ་གཙུག་ལག་སློབ་གཉེར་ཁང་དུ་ལོ་གསུམ་རིང་སློབ་སྦྱོང་དང། དེ་རྗེས་སྦེང་ལོར་དུ་དགེ་རྒན་འོས་སྦྱོང་གནང། ཕྱི་ལོ་ ༡༩༧༧ ལོར་ཀོ་ལི་གྷལ་དོན་ལྡན་གླིང་བོད་མིའི་སློབ་གྲྭར་ལོ་ངོ་དྲུག་རིང་སློབ་དགེ་གནང་ཡོད།
ཕྱི་ལོ་ ༡༩༨༣ ལོར་སླར་ཡང་ཅན་ངྷི་སྒར་པན་ཇབ་གཙུག་ལག་སློབ་གཉེར་ཁང་དུ་ལོ་གསུམ་རིང་ཁྲིམས་ལུགས་ཀྱི་ཆེད་ལས་ཐོག་སློབ་སྦྱོང་གནང་ཡོད། ཕྱི་ལོ་ ༡༩༨༦ ལོར་བོད་ཀྱི་གཞོན་ནུའི་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གི་རྒྱུན་ལས་ཁང་གི་རྒྱུན་ལས་བསྐོ་གཞག་གནང་བ་ལྟར། ལོ་དྲུག་རིང་ཟུང་དྲུང་དང་དྲུང་ཆེ་བཅས་ལས་གནས་རིམ་པའི་ཐོག་རྒྱ་གར་རྒྱལ་ཡོངས་དང་བོད་མིའི་གཞིས་སྒར་ཁག་ཏུ་སྐོར་བསྐྱོད་གནང་བ་མ་ཟད། ཡུ་རོབ་དང། དབྱིན་ཡུལ། སུད་སི། ཕ་རན་སི། ཨོ་སི་ཊོ་ལི་ཡ། པོ་ལན། འཇར་མན་བཅས་རྒྱལ་ཁབ་ཁག་ཏུ་བོད་དོན་དྲིལ་བསྒྲགས་ཆེད་སྐོར་བསྐྱོད་གནང་ཡོད།
ཕྱི་ལོ་ ༡༩༨༧ ལོར་རྡོ་རྗེ་གདན་ནས་ལྡི་ལི་བར་ཉིན་གྲངས་ ༤༡ རིང་གི་གོམ་བགྲོད་ཀྱི་སྣེ་འཁྲིད་པ་གནང་ཡོད། ཕྱི་ལོ་ ༡༩༩༡ ལོར་བོད་མི་མང་སྤྱི་འཐུས་རྒྱ་སྐྱེད་ཀྱི་འོས་འདེམས་སྐབས་དབུས་གཙང་ཆོལ་ཁའི་འོས་གཞི་ཨང་གཉིས་པ་ཐོབ་ཡོད་ཀྱང། འོས་མི་ནས་ཕྱིར་འཐེན་གྱིས་མུ་མཐུད་གཞོན་ནུ་ལྷན་ཚོགས་སུ་ཕྱག་ལས་གནང་ཡོད། ཕྱི་ལོ་ ༡༩༩༣ ལོར་ཆོད་གན་ཐོག་ལྷོ་ཨ་ཕི་རི་ཀ་དང་དབུས་ཤར་ཨེ་ཤི་ཡ་ཁུལ་གྱི་འབྲེལ་མཐུད་དང། ཕྱི་ལོ་ ༡༩༩༧ ལོར་ལྷོ་ཨ་ཕི་རི་ཀའི་སྐུ་ཚ་དོན་གཅོད་དུ་བསྐོ་གཞག་གནང་ཡོད། ཕྱི་ལོ་ ༢༠༠༡ ལོར་ཕ་རན་སིའི་སྐུ་ཚབ་དོན་གཅོད་གནས་སྤོས་ཀྱིས་གཞུང་དང་གྲོས་ཚོགས་འཐུས་མིར་འབྲེལ་ལམ་དང་བོད་དོན་རྒྱབ་སྐྱོར་ཐབས་འཚོལ་གྱི་བོད་དོན་དྲིལ་བསྒྲགས་དང་ས་གནས་བོད་མིར་ལྟ་རྟོག་གནང་ཡོད།
ཕྱི་ལོ་ ༢༠༠༥ ལོར་མ་སུ་རི་བོད་ཁྱིམ་གྱི་དྲུང་ཆེར་སྐོ་གཞག་གནང་ཡོད། ཕྱི་ལོ་ ༢༠༡༠ ལོར་སྦེང་ལོར་ལྷོ་སྤྱིར་བསྐོ་གཞག་དང་། མངའ་སྡེའི་གཞུང་ནས་ས་གནས་བོད་མིའི་ཆེད་ཧིན་སྒོར་འབུམ་ ༢༠༠ བརྒལ་བའི་རོགས་དངུལ་ཐོབ་འཚོལ་གནང། ཕྱི་ལོ་ ༢༠༡༠ བོད་མིའི་སྒྲིག་འཛུགས་ཕྱི་དྲིལ་ལས་ཁུངས་སུ་གནས་སྤོས་དང་། ཕྱི་ལོ་ ༢༠༡༣ ཟླ་ ༢ ཚེས་ ༨ ཉིན་ཕྱི་དྲིལ་ལས་ཁུངས་ཀྱི་དྲུང་ཆེར་བསྐོ་གཞག་གནང་ཡོད་བཅས། །
