༢༠༡༣ ཟླ་ ༢ ཚེས་ ༦ རེས་གཟའ་ལྷག་པ།

༄༅། །ཨ་རིའི་གྲོང་ཁྱེར་ནིའུ་ཡོཀ་རུ་རྟེན་གཞི་བྱས་པའི་སྐུ་ཚབ་དོན་ཁང་མ་འོངས་པའི་ཟླ་ཤས་ནང་རྒྱལ་ས་ཝ་ཤིན་ཊོན་ཌེ་སིར་ (Washington DC) གནས་སྤོ་གནང་གཏན་འཁེལ་འདུག

གནད་དོན་དེའི་སྐོར་སྐུ་ཚབ་དོན་ཁང་གི་དོན་གཅོད་བློ་བཟང་སྙན་གྲགས་ལགས་ཀྱིས་བརྒྱུད་ལམ་ཁག་གཅིག་ནང་གསུང་གསལ། དེང་སྐབས་ཨ་རིའི་གྲོང་ཁྱེར་ནིའུ་ཡོཀ་རུ་རྟེན་གཞི་བྱས་པའི་སྐུ་ཚབ་དོན་གཅོད་ཁང་། མ་འོངས་པའི་ཟླ་ཤས་ནང་ཨ་རིའི་རྒྱལ་ས་ཝ་ཤིན་ཊོན་དུ་གནས་སྤོ་བྱ་རྒྱུ་རེད། དོན་གཅོད་ཁང་གནས་སྤོ་བྱེད་དོན་ནི་དེ་སྔ་ནིའུ་ཡོཀ་རུ་མཉམ་འབྲེལ་རྒྱལ་ཚོགས་དང་ཨ་རིའི་ཕོ་བྲང་དཀར་པོ། ཕྱི་སྲིད་ལས་ཁུངས། གྲོས་ཚོགས་ཀྱིས་གཙོས་གཞུང་འབྲེལ་ལས་དོན་གལ་ཆེའི་རིགས་དམིགས་བསལ་སྐུ་ཚབ་རྒྱ་རི་བློ་གྲོས་རྒྱལ་མཚན་མཆོག་གིས་སྒྲུབ་བཞིན་ཡོད་ཀྱང་། ད་ལྟའི་ཆར་དམིགས་བསལ་སྐུ་ཚབ་མཆོག་ལས་གནས་ནས་དགོངས་ཞུ་གནང་ཡོད་སྟབས། མ་འོངས་པར་ཨ་རིའི་གཞུང་འབྲེལ་བོད་དོན་ལས་ཀ་ཚང་མ་དོན་གཅོད་ཁང་གིས་བསྒྲུབ་དགོས་པ་ཆགས་པར་བརྟེན། དོན་གཅོད་ཁང་རྒྱལ་ས་ཝ་ཤིན་ཊོན་དུ་གནས་སྤོ་བྱ་རྒྱུར་ཐག་གཅོད་བྱུང་བ་རེད།

སྤྱིར་བཏང་ཨ་རིའི་སྐུ་ཚབ་དོན་གཅོད་ཁང་འདི་ཕྱི་ལོ་ ༡༩༦༤ ལོར་གསར་འཛུགས་གནང་བ་རེད། ལས་ཁུངས་དེ་ཐོག་མར་གསར་འཛུགས་སྐབས་ཀྱི་དམིགས་ཡུལ་གཙོ་བོ། ནིའུ་ཡོཀ་རུ་མཉམ་འབྲེལ་རྒྱལ་ཚོགས་སུ་དེ་སྔ་བོད་དོན་གྲོས་ཆོད་ཁག་བཞག་ཡོད་པ་རྣམས་མཇུག་སྣོན་ཡོངས་ཐབས། དེ་བཞིན་རྒྱལ་ཚོགས་ནང་བོད་དོན་ཁྱབ་བསྒྲགས་དང་རྒྱབ་སྐྱོར་འཚོལ་ཆེད་ཡིན། འོན་ཀྱང་འདས་པའི་ལོ་མང་པོ་ཞིག་གི་རིང་ལ་ཨ་རིའི་དོན་གཅོད་ལས་ཁུངས་ཀྱི་ལས་དོན་གྱི་འགན་ཁུར་རིམ་བཞིན་འགྱུར་བ་ཐེབས་ཡོད། ཅེས་གསུངས་འདུག དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དོན་ཁང་གནས་སྤོའི་ལས་དོན་ཁག་ལ་གཟིགས་ཞིབ་གནང་རྒྱུ་ཡིན་འདུག
སྤྱིར་བཏང་ཨ་རིའི་སྐུ་ཚབ་དོན་ཁང་ནིའུ་ཡོཀ་རུ་རྟེན་གཞི་བྱས་ནས་མི་ལོ་ ༤༩ ཙམ་ཕྱིན་ཡོད་པ་བཅས། །