༢༠༡༣ ཟླ་ ༢ ཚེས་ ༤ རེས་གཟའ་ཟླ་བ།

༄༅། །ཕྱི་ལོ་ ༢༠༡༣ ཟླ་ ༢ ཚེས་ ༤ ཉིན་གྱི་སྔ་དྲོ་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་རྡ་ས་ནོར་གླིང་ཉེ་འཁྲིས་སུ་རྟེན་གཞི་བྱས་པའི་རྒྱུད་སྟོད་དགོན་པའི་འདུ་ཁང་ནང་བཀའ་བརྒྱུད་སྤྱི་འཐུས་གཉིས་ཀྱིས་གཙོས་ཆོས་རིག་དྲུང་ཆེ་དང་ནང་སྲིད་དྲུང་ཆེ། དེ་བཞིན་གྲྭ་དམངས་ ༣༠༠ བརྒལ་བའི་དབུས་སུ་སྒྲུབ་བརྒྱུད་བསྟན་པའི་སྲོག་ཤིང་དཔལ་རྒྱལ་བ་ཀརྨ་པ་རིན་པོ་ཆེན་མཆོག་ལ་ཆོས་རིག་བཀའ་བློན་པདྨ་ཆོས་འབྱོར་མཆོག་གིས་བརྟན་བཞུགས་ཀྱི་མནྜལ་རྟེན་གསུམ་འདེགས་འབུལ་སྐབས་རྒྱུད་སྟོད་མཁན་རིན་པོ་ཆེ་མཆོག་གིས་མནྜལ་ལྗགས་བཤད་གནང་ཡོད།
སྤྱིར་བཏང་ཆོས་རིག་ལས་ཁུངས་ནས་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་བཅས་ཀྱི་བླ་ཆེན་རྣམ་པར་བརྟན་བཞུགས་ཕུལ་དང་འབུལ་མུས་ཡིན་པའི་ཁོངས་ནས་འཁོན་རིགས་བསྟན་པའི་གཙུག་རྒྱན་ས་སྐྱ་བདག་ཁྲི་རིན་པོ་ཆེ་མཆོག་དང་། སྨན་རི་ཁྲི་འཛིན་རིན་པོ་ཆེ་མཆོག རྩེ་སྤྲུལ་རིན་པོ་ཆེ་མཆོག འབྲི་གུང་ཆེ་ཚང་རིན་པོ་ཆེ་མཆོག དགའ་ལྡན་ཁྲི་རིན་པོ་ཆེ་མཆོག་བཅས་ལ་བརྟན་བཞུགས་ཕུལ་ཟིན་འདུག་པ་བཅས། །