༢༠༡༣ ཟླ་ ༢ ཚེས་ ༢ རེས་གཟའ་སྤེན་པ།
༄༅། །བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་བ་ ༡ ཚེས་ ༣༡ ཉིན་ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་རྒྱ་ནག་ནང་མང་གཙོ་རྩོད་ལེན་ཚོགས་པ་ཞིག་གིས་གོ་སྒྲིག་འོག་ཨ་རིའི་ནང་གནས་བཞུགས་ཡུ་གུར་ཚོགས་པའི་ཚོགས་གཙོ་དང་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས། དེ་བཞིན་ལྷོ་སོག་པོའི་འགྲོ་བ་མིའི་ཐོབ་ཐང་བསྟི་གནས་ཁང་གི་ངེས་སྟོན་པ་སོགས་མགྲོན་འབོད་ཀྱིས་རྒྱ་ནག་གཞུང་གི་འགོ་ཁྲིད་གསར་པ་ཚོར་འཕྲད་བཞིན་པའི་༼གྲངས་ཉུང་མི་རིགས་ཀྱི་དཀའ་ངལ།༽ཞེས་པའི་བརྗོད་གཞིའི་ཐོག་བགྲོ་གླེང་ཚོགས་འདུ་ཞིག་ཚོགས་ཡོད་པ་མ་ཟད། ཁོང་རྣམ་པས་ད་བར་རྒྱ་ནག་གཞུང་ནས་ཡུ་གུར་དང་ནང་སོགས་དེ་བཞིན་བོད་བཅས་ཀྱི་ཐོག་ནོར་འཁྲུལ་ཅན་གྱི་སྲིད་བྱུས་ཀྱི་རྐྱེན་པས་རྒྱ་ནག་གཞུང་གི་འགོ་ཁྲིད་གསར་པ་ཚོར་དཀའ་ངལ་ཆེན་པོ་འཕྲད་རྒྱུ་ཡིན་པའི་གསལ་སྟོན་གནང་ཡོད།
སྐབས་དེར་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་གཞོན་པ་བུ་ཆུང་ཚེ་རིང་ལགས་ཀྱིས་གསུང་དོན། རྒྱ་ནག་གཞུང་ནས་བོད་མིའི་གཞི་རྩའི་ཆོས་དད་རང་དབང་དང་རིག་གཞུང་མི་ཉམས་རྒྱུན་འཛིན་བྱེད་རྒྱུའི་ཐོབ་ཐང་སོགས་ལ་དྲག་གནོན་གྱི་སྲིད་བྱུས་བཟུང་བར་བརྟེན་ནས་ཕྱི་ལོ་ ༢༠༠༨ ལོའི་བོད་མིའི་སྒེར་ལངས་ཆེན་མོ་དང་ཕྱི་ལོ་ ༢༠༠༩ ནས་འགོ་འཛུགས་ཀྱིས་ད་བར་བོད་མི་ ༩༨ བརྒལ་བས་རང་ལུས་མེར་སྲེག་བཏང་ཡོད། ལྷག་པར་བོད་ནང་བོད་མི་གནས་སྡོད་བྱེད་ཡུལ་གང་སར་རྒྱ་མི་གནས་སྡོད་བྱེད་ཡུལ་དང་མི་འདྲ་བར་སྔར་ལྷག་དམ་བསྒྲགས་བྱས་དང་བྱེད་མུས་རེད།
ད་ལྟའི་ཆར་རྒྱ་མི་རིགས་ལ་འགྲོ་སྡོད་སྤྱོད་གསུམ་གྱི་རང་དབང་ཡོད་པ་ལྟར་བོད་མི་རིགས་ལ་མེད། ལྷག་པར་རྒྱ་ནག་གཞུང་ནས་བོད་ནང་གི་རང་ལུས་མེར་སྲེག་གི་གནད་དོན་སེལ་རྒྱུའི་ཚབ་ཏུ་ས་ཁུལ་དེ་དག་ནང་རྒྱ་ནག་གཞུང་གིས་བོད་མིའི་ཐོག་འཛིན་པའི་སྔར་ལས་ལྷག་པའི་སྲིད་བྱུས་འདྲ་མིན་ལག་བསྟར་བྱས་པ་མ་ཟད། ཉེས་མིང་སྣ་ཚོགས་བཀལ་ཏེ་གང་བྱུང་འཛིན་བཟུང་བྱེད་ཀྱི་ཡོད། རྒྱ་ནག་གཞུང་གི་རྩ་ཁྲིམས་ནང་འཁོད་པའི་གྲངས་ཉུང་མི་རིགས་ཀྱི་ཐོབ་ཐང་མེད་པ་བཟོ་ཐབས་བྱེད་ཀྱི་འདུག
ད་བར་རྒྱ་ནག་གཞུང་ནས་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱས་པར་བརྟེན་ནས་ད་ལྟའི་ཆར་བོད་ནང་གི་གནས་སྟངས་ཇེ་ཞན་ཇེ་སྡུག་ཏུ་འགྲོ་གི་ཡོད། དེར་བརྟེན་རྒྱ་ནག་གཞུང་གི་འགོ་ཁྲིད་གསར་པ་ཚོས་རྒྱ་ནག་གི་སྲིད་བྱུས་ལ་འགྱུར་བ་གཏོང་དགོས་རྒྱུ་གལ་ཆེན་ཡིན་སྐོར་སོགས་གསུངས་འདུག་པ་བཅས། །
