༢༠༡༣ ཟླ་ ༢ ཚེས་ ༡ རེས་གཟའ་པ་སངས།
༄༅། །ཕྱི་ལོ་ ༢༠༡༣ ལོའི་ཟླ་བ་ ༡ ཚེས་ ༣༡ ཉིན་ཤིན་ཧྭ་གསར་ཁང་གི་གནས་ཚུལ་སྤེལ་དོན་ལྟར་ན། བོད་མི་བརྒྱད་ལ་རྒྱ་གཞུང་གིས་རང་ལུས་མེར་སྲེག་གི་དོན་རྐྱེན་དང་འབྲེལ་བ་ཡོད་
སྐོར་གྱི་ཉེས་མིང་འོག་སྲོག་ཁྲིམས་དང་དུས་བཀག་བཙོན་འཇུག་གིས་ཁྲིམས་ཐག་བཅད་འདུག
དེ་ཡང་སྔ་ལོ་ཕྱི་ཟླ་ ༨ འཛིན་བཟུང་བྱས་པའི་རྔ་བ་ནས་ཡིན་པའི་རང་ལོ་ ༤༠ སོན་པ་བློ་བཟང་དཀོན་མཆོག་ལགས་དང་ཁོང་གི་ཚ་བོ་རང་ལོ་ ༣༡ སོན་པ་བློ་བཟང་ཚེ་རིང་གཉིས་ལ་སི་ཁྲོན་ཞིང་ཆེན་རྔ་བ་བོད་རིགས་ཆང་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་ནས་བློ་བཟང་དཀོན་མཆོག་གིས་རྐང་བཙུགས་ནས་མི་བསད་པའི་ཉེས་མིང་འོག་ལོ་གཉིས་རྗེས་སྲོག་ཁྲིམས་དང་། ཆབ་སྲིད་ཁེ་དབང་ཚེ་གང་འཕྲོག་རྒྱུ། བློ་བཟང་ཚེ་རིང་ལ་ལོ་ ༡༠ ཡི་རིང་དུས་བཀག་བཙོན་འཇུག་དང་ལོ་གསུམ་གྱི་ཆབ་སྲིད་ཁེ་དབང་འཕྲོག་རྒྱུ་བཅས་ཀྱི་ཁྲིམས་ཐག་བཅད་ཡོད་སྐོར་གནས་ཚུལ་སྤེལ་འདུག
གཞན་ཡང་ཕྱི་ལོ་ ༢༠༡༢ ལོའི་ཟླ་ ༡༠ ནང་ཀན་ལྷོ་བོད་རིགས་རང་སྐྱོང་ཁུལ་ནས་ཡིན་པ་པདྨ་དོན་གྲུབ་ལགས་དང་སྐལ་བཟང་རྒྱ་མཚོ་ལགས། པདྨ་འཚོ་ལགས། ལྷ་མོ་དོན་གྲུབ་ལགས། བཅས་ལ་ལོ་ ༡༢། ༡༡། ༨། ༧། བཅས་ཀྱི་དུས་བཀག་བཙོན་འཇུག་གི་ཁྲིམས་ཐག་བཅད་འདུག གདུགས་དཀར་སྐྱབས་ལགས་དང་གཡང་མོ་སྐྱིད་གཉིས་ལགས་གཉིས་ལ། འཁྲུག་རྐྱེན་དང་བརྒྱུད་སྐུལ་བྱས་པའི་སྐྱོན་འཛུགས་འོག་ལོ་ངོ་ ༤། དང་ ༣། བཅས་ཀྱི་བཙོན་འཇུག་ཁྲིམས་ཐག་བཅད་འདུག
