༢༠༠༩ ཕྱི་ཟླ་ ༤ ཚེས་ ༢༤ རེས་གཟའ་པ་སངས།
༄༅། །༢༠༠༩ ཕྱི་ཟླ་ ༤ ཚེས་ ༢༤ ཉིན་འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། དེ་རིང་ཞོགས་པ་ཆུ་ཚོད་ ༧ པའི་གཡས་གཡོན་དུ་ཨ་མདོ་ཀན་ལྷོ་བོད་རིགས་རང་སྐྱོང་ཁུལ་(བླ་བྲང་།)བསངས་ཆུ་རྫོང་བོད་རིགས་སློབ་འབྲིང་གི་སློབ་མ་ཁག་གཅིག་ནས་སློབ་གྲྭའི་ནང་ཞོགས་པ་ལུས་རྩལ་སྦྱོང་བརྡར་ཆེད་རྒྱུག་ཤར་གློད་སྐབས་(རང་དབང་དང་ཞི་བདེ་)ཞེས་འཁོད་པའི་འཔྲེད་དར་ཐོགས་ཏེ་ཞི་བའི་སྐད་འབོད་བྱས་པའི་གནས་ཚུལ་ཐོན་འདུག
སྐད་འབོད་བྱ་དགོས་དོན་གཙོ་བོ་ནི་སྔ་ལོའི་ཞི་རྒོལ་སྐབས་འཛིན་བཟུང་བྱས་པ་རྣམས་གློད་བཀྲོལ་གཏོང་དགོས་པའི་དགོས་འདུན་བཏོན་ཡོད་ཚོད་འདུག་ཀྱང་། ཞིབ་ཕྲའི་སྐད་འབོད་བྱ་དགོས་པའི་རྒྱུ་མཚན་ཁ་གསལ་ཤེས་རྟོགས་མེད་ཅིང་། ལྷག་པར་ཞི་བའི་སྐད་འབོད་བྱས་རྗེས་ས་གནས་འབྲེལ་ཡོད་སྤྱི་བདེ་ཚན་པ་དང་དྲག་ཆས་དམག་མི་ཡོང་སྟེ་ད་ལྟའི་ཆར་སློབ་གྲྭའི་ཕྱོགས་བཞི་མཚམས་བརྒྱད་ནས་དྲག་ཆས་དམག་མིས་བསྐོར་ཏེ་ཕྱི་ཕྱོགས་སུ་འབྲེལ་བ་བྱེད་དུ་བཅུག་གི་མེད་པ་རེད་འདུག སློབ་གྲྭའི་ཉེ་ཁུལ་གྱི་ས་གནས་ཁག་ཏུ་ཡང་དམ་བསྒྲགས་ཤུགས་ཆེ་བྱས་རྐྱེན་གནས་ཚུལ་ཁ་གསལ་ཤེས་ཐབས་མེད་པའི་གནས་སུ་གྱུར་འདུག
