༢༠༠༩ ཕྱི་ཟླ་ ༤ ཚེས་ ༢༣ རེས་གཟའ་ཕུར་བུ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ན་རི་ཏཱ་རྒྱལ་སྤྱིའི་གནམ་ཐང་དུ་༸ཞབས་སོར་འཁོད་བཞིན་པ།
༄༅། །རྒྱལ་སྤྱིའི་གསར་ལམ་ཁག་ནས་གནས་ཚུལ་སྤེལ་གསལ་ལྟར་ན། བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཕྱི་ལོ་ ༢༠༠༩ ཟླ་ ༤ ཚེས་ ༢༢ རེས་གཟའ་ལྷག་པའི་ཉིན་ཉི་ཧོང་གི་རྒྱལ་ས་ཊོཀ་ཁྱོ་ལ་སྐོང་ཚོགས་གནང་བའི་གསར་འགོད་ལྷན་ཚོགས་ཤིག་གི་ཐོག་གསར་འགོད་པར་བཀའ་ལན་ཕེབས་དོན། རྒྱ་ནག་ནི་སྟོབས་འབྱོར་ལྡན་པའི་རྒྱལ་ཁབ་ཆེན་པོ་ཞིག་ཡིན་རུང་བོད་དང་དེ་མིན་གྱི་གྲངས་ཉུང་མི་རིགས་ཐོག་ཕྲུ་གུའི་བྱ་སྤྱོད་ལྟ་བུ་བྱེད་ཀྱི་འདུག རྒྱ་ནག་གིས་དམག་དོན་དང་། དཔལ་འབྱོར། མི་འབོར་བཅས་ཀྱི་སྟོབས་ཤུགས་ངོམ་སོ་རྒྱག་གི་ཡོད། འོན་ཀྱང་བསམ་ཚུལ་ཐ་དད་ཀྱི་རྟགས་མཚན་ཏོག་ཙམ་བྱུང་བར་འཇིགས་སྣང་བྱེད་ཀྱི་ཡོད། རྒྱ་ནག་གཞུང་གིས་ལྟ་ཚུལ་འདྲ་མིན་ཐོག་ནས་འཆར་ཅན་གྱི་མི་འཛིན་བཟུང་བྱེད་ཀྱི་ཡོད། མི་འབོར་ཐེར་འབུམ་བརྒལ་བའི་སྟོབས་ཆེན་རྒྱལ་ཁབ་གཅིག་དེ་འདྲའི་དངངས་འཚབ་དང་འཇིགས་སྣང་བྱེད་དགོས་དོན་མེད། མི་མང་གཅིག་གཉིས་ཤིག་ལ་ལྟ་ཚུལ་འདྲ་མིན་བྱུང་ཚེ་དེ་དག་སྟོབས་ཆེན་རྒྱལ་ཁབ་དེའི་རྙོག་གྲའི་ནང་ཚུད་པ་རེད། རྒྱལ་ཁབ་ཆེན་པོ་དེས་རང་ཉིད་གདེང་ཚོད་དང་ལྡན་པ་ཞིག་བྱེད་དགོས་ཀྱི་རེད། ཅེས་དང་ལྷག་པར་དུ་༸གོང་ས་མཆོག་གིས་བཀའ་ཕེབས་དོན། སྤྱིར་བོད་མི་སྐྱོ་པོ་ཡིན་ནའང་ཕྱི་གསལ་ནང་གསལ་ཡིན། རྒྱ་ནག་གཞུང་གི་ཞན་ཆ་གཅིག་ནི་ཕྱི་གསལ་ནང་གསལ་མེད་པར་དུས་རྟག་ཏུ་གནས་ཚུལ་འཁྱོག་བཤད་བྱེད་ཀྱི་ཡོད། རྒྱ་ནག་ནི་སྟོབས་ཆེན་རྒྱལ་ཁབ་གཅིག་ཆགས་རྒྱུའི་ལམ་བུའི་ཐོག་ཏུ་སླེབས་ཡོད། ཁོང་ཚོར་དམག་དོན་དང་། མི་འབོར། དཔལ་འབྱོར་བཅས་ཀྱི་ནུས་ཤུགས་ལྡན་ཡོད། སྟོབས་ཆེན་རྒྱལ་ཁབ་ཆགས་རྒྱུར་ཁོང་ཚོར་མ་ཚང་བའི་ཆ་རྐྱེན་བཞི་པ་དེ་ནི་བཟང་སྤྱོད་ཀྱི་ནུས་ཤུགས་དེ་ཡིན། བཟང་སྤྱོད་ཀྱི་ནུས་ཤུགས་ནི་མེད་དུ་མི་རུང་བ་ཞིག་ཡིན། དེས་བས་ཡིད་ཆེས་ནི་གལ་ཆེ་ཤོས་ཡིན། ཞེས་བཀའ་སློབ་སྩལ་ཡོད།
སྔ་ལོའི་ཞི་རྒོལ་སྐབས་ལྷ་སར་ཁང་ཁྱིམ་མེར་སྲེག་བཏང་ནས་མི་སྣ་རྐྱེན་འདས་སུ་གྱུར་བའི་ཉེས་བཙུགས་འོག་བོད་རིགས་བུད་མེད་གསུམ་ལ་སྲོག་ཐོག་དང་ཚེ་བཙོན་གྱི་ཉེས་ཆད་གཏོང་རྒྱུའི་ཁྲིམས་ཆད་བཏང་བའི་དྲི་བར་བཀའ་ལན་ཕེབས་དོན། སྤྱིར་ཉེས་ཅན་པར་ཉེས་པ་གཏོང་དགོས་ཀྱི་ཡོད། འོན་ཀྱང་མགོན་པོ་གང་ཉིད་རྒྱ་ནག་གི་ཁྲིམས་ཁང་ལ་ཡིད་ཆེས་མེད། ཅེས་བཀའ་སྩལ་ཏེ། རྒྱ་ནག་སྤྱི་མཐུན་རྒྱལ་ཁབ་ལ་སྤྱི་ཡོངས་ནས་ཁྲིེམས་ལུགས་དབང་འཛིན་དང་། རང་དབང་ལྡན་པའི་ཁྲིམས་ཞིབ་ལྷན་ཚོགས་མེད་ཁར། ཆ་ཚང་དམར་ཤོག་ཚོགས་པའི་སྟངས་འཛིན་འོག་གནས་ཡོད། ཅེས་བཀའ་ལན་ཕེབས་ཡོད་པ་རེད།།
