༢༠༡༣ ཟླ་ ༡ ཚེས་ ༢༨ རེས་གཟའ་ཟླ་བ།
༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༣ ཟླ་ ༡ ཚེས་ ༢༧ ཉིན་སྔ་དྲོའི་བོད་ནང་གི་ཆུ་ཚོད་ ༡༠།༣༠ ཡས་མས་ཤིག་ལ་དཀར་མཛེས་ཁུལ་གསེར་རྟ་རྫོང་སྟག་རྩ་ཡུལ་ཚོ་རྐང་ཚ་སྡེ་བའི་རང་ལོ་ཉི་ཤུ་ཡས་མས་ལ་སོན་པའི་དགེ་འདུན་ཕུན་ཚོགས་འབྱུང་གནས་སམ་ཀུན་མཁྱེན་ལགས་ཀྱིས་གསེར་རྟ་རྫོང་ཐོག་གི་གསེར་རྟའི་ཐང་ཆེན་དུ་༸རྒྱལ་དབང་ཡིད་བཞིན་ནོར་བུ་མཆོག་ཁྲི་ལོར་བརྟན་པར་ཤོག། ཅེས་སོགས་ཀྱི་འབོད་ཚིག་སྒྲོག་པ་དང་ལྷན་རླུང་རྟ་དགུང་ལ་གཏོར་བཞིན་སྐད་འབོད་གནང་སྟེ་རྒྱ་ནག་གཞུང་ལ་ཞི་རྒོལ་གནང་འདུག དེ་མ་ཐག་རྒྱ་གཞུང་གི་ཉེན་རྟོག་པ་ ༣༠ ལྷག་དང་། སྒྲིག་ཆག་གྱོན་མེད་པའི་ཉེན་རྟོག་པ་དེ་ལས་མང་བ་ཞིག་འབྱོར་ཏེ། ཁོང་འཛིན་བཟུང་བཙན་འཁྲིད་བྱས་ཡོད་འདུག
ཤེས་གསལ་ལྟར་ན། དགེ་འདུན་པ་ཀུན་མཁྱེན་ལགས་སུ་ན་ཚ་ཞིག་གི་དབང་གིས་སྨན་ཁང་དུ་ཕྱིན་ཏེ་ཕྱི་ཚེས་ ༢༦ ཉིན་གྱི་ཕྱི་དྲོ་གསེར་རྟ་རྫོང་ཐོག་ཏུ་འབྱོར་ཡོད་པ་དང་། གོང་ཚེས་ཉིན་ཕྱིར་རང་ཁྱིམ་དུ་ལོག་རྩིས་ཡོད་ཅིང་། ནང་མི་ཚོ་ཁོང་ལེན་དུ་ཡོང་སྐབས་སུ་གནས་ཚུལ་དེ་བྱུང་ཡོད་འདུག
དགེ་འདུན་པ་ཀུན་མཁྱེན་ལགས་ནི་བཀྲ་ཤིས་དགེ་འཕེལ་གླིང་དགོན་པ་ནས་ཡིན་པ་དང་། ཁོང་གི་ཕ་མིང་ལ་བློ་ཤེར་དང་མ་མིང་ལ་ཕྱུག་པོ་བརྗོད་ཀྱི་ཡོད་འདུག་པ་བཅས། །
དགེ་འདུན་པ་ཞིག་གིས་རྒྱ་ནག་གཞུང་ལ་ཞི་རྒོལ་གནང་བ།
གསར་གནས།
འབྲེལ་གནས།
