༢༠༡༣ ཟླ་ ༡ ཚེས་ ༢༨ རེས་གཟའ་ཟླ་བ།
༄༅། །ཕྱི་ལོ་ ༢༠༡༣ ལོའི་ཟླ་ ༡ ཚེས་ ༢༨ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བཞུགས་སྒར་བོད་ཀྱི་དཔེ་མཛོད་ཁང་གི་ཚོགས་ཁང་དུ་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་སྐུ་མྱ་ངན་ལས་འདས་ཏེ་མི་ལོ་ ༢༤ འཁོར་བའི་རྗེས་དྲན་ཆེད་བོད་རིགས་ཤེས་ལྡན་པས་རྗེས་དྲན་དང་ཞིབ་འཇུག་དཔེ་དེབ་དབུ་འབྱེད་མཛད་སྒོའི་སྐུ་མགྲོན་དུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་མཆོག་གི་སྐུ་ཚབ་བཀའ་དྲུང་གཡུ་ཐོག་ཀརྨ་དགེ་ལེགས་ལགས་དང་། དམིགས་བསལ་སྐུ་མགྲོན་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག དེ་བཞིན་ཉམས་ཞིབ་པ་དང་རྩོམ་སྒྲིག་པ་སོགས་ཤེས་ལྡན་མི་སྣ་ཉེར་གྲངས་འདུ་འཛོམས་ཀྱིས་ཐོག་མར་དམིགས་བསལ་སྐུ་མགྲོན་མཁས་དབང་ཟམ་གདོང་རིན་པོ་ཆེ་མཆོག་གིས་སྣང་གསལ་ཞལ་ཕྱེ་གནང་སྟེ་མཛད་སྒོ་འགོ་འཛུགས་ཀྱི་པཎ་ཆེན་ཨེར་ཏེ་ནི་ཞིབ་འཇུག་གནང་མཁན་གཙང་ཕྲུག་སྟོབས་ལགས་ཀྱིས་ཀུན་གཟིགས་པཎ་ཆེན་རིན་པོ་ཆེ་མཆོག་གི་སྐོར་ལ་ཞིབ་འཇུག་གི་དེབ་འདི་འདྲ་ཞིག་འདོན་སྤེལ་བྱེད་དགོས་པའི་བརྒྱུད་རིམ་དང་དགོས་དམིགས་རྣམས་རེ་རེ་བཞིན་གསུང་བཤད་གནང་ཡོད། དེ་རྗེས་དམིགས་བསལ་སྐུ་མགྲོན་མཆོག་གིས་པཎ་ཆེན་ཨེར་ཏེ་ནི་ཞིབ་འཇུག་གི་དཔེ་དེབ་དེ་དབུ་འབྱེད་གནང་། དེ་ནས་བོད་ཀྱི་དཔེ་མཛོད་ཁང་གི་ཉམས་ཞིབ་འགན་འཛིན་ན་ག་སངས་རྒྱས་བསྟན་དར་ལགས་དང་ས་རཱ་མཐོ་སློབ་ཀྱི་དགེ་རྒན་ཆེ་མོ་བསོད་ནམས་རྒྱལ་མཚན་ལགས་གཉིས་ཀྱིས་དེབ་དེ་ལྗགས་ཀློག་གནང་བའི་དགོངས་ཚུལ་སྐོར་དཔྱད་གླེང་གསུང་བཤད་གནང་ཡོད། དེ་རྗེས་
དམིགས་བསལ་སྐུ་མགྲོན་མཁས་དབང་ཟམ་གདོང་རིན་པོ་ཆེ་མཆོག་གིས་པཎ་ཆེན་རིན་པོ་ཆེར་ཞིབ་འཇུག་བྱེད་སྟངས་དང་ཞིབ་འཇུག་དང་ཉམས་ཞིབ། བསྐྱར་ཞིབ་བཅས་ཀྱི་ཐ་སྙད་ཇི་ལྟར་ཐོགས་ཚུལ་དང་ཉམས་ཞིབ་པ་ཚོས་ངེས་པར་དུ་གཟབ་ནན་ཆེན་པོས་ཉམས་ཞིབ་བྱེད་དགོས་པའི་སྐོར་སོགས་ཀྱི་གསུང་བཤད་གནང་རྗེས་སྲིད་སྐྱོང་མཆོག་གི་སྐུ་ཚབ་བཀའ་དྲུང་ཀརྨ་དགེ་ལེགས་ལགས་ཀྱིས་ཉམས་ཞིབ་ཀྱིས་ལས་དོན་སྤེལ་ཕྱོགས་སྐོར་ལ་གསུང་བཤད་གནང་རྗེས་ཤེས་བྱ་རྩོམ་སྒྲིག་པ་སྐལ་བཟང་མཁས་གྲུབ་ལགས་དང་ནོར་གླིང་ཉམས་ཞིབ་པ་རྡོ་རྗེ་དབང་ཕྱུག་ལགས། དུས་བབ་རྩོམ་སྒྲིག་པ་དོན་གྲུབ་བཀྲ་ཤིས་ལགས། བང་ཆེན་རྩོམ་སྒྲིག་པ་ཆོས་ཉིད་འོད་ཟེར་ལགས་བཅས་ཀྱིས་རང་ཉིད་སྒེར་གྱི་དགོངས་ཚུལ་སྐར་མ་ལྔ་རེ་གསུངས་བཤད་གནང་རྗེས་ས་རཱ་མཐོ་སློབ་ཀྱི་རྩོམ་རིག་སློབ་དཔོན་བསམ་མཁར་ངག་དབང་རྡོ་རྗེ་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་ལེགས་གྲུབ་བྱུང་བ་བཅས།།
པཎ་ཆེན་ཨེར་ཏེ་ནི་ཞིབ་འཇུག་གི་དཔེ་དེབ་དབུ་འབྱེད་མཛད་སྒོ་ཚོགས་པ།
གསར་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)
འབྲེལ་གནས།
![](https://bod.asia/wp-content/uploads/2017/08/cropped-Central_Tibetan_Admin_Logo-1-370x370.jpeg)