ཕྱི་ལོ་ ༢༠༠༩ ཟླ་ ༤ ཚེས་ ༡༨ རེས་སྤེན་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་གསལ་ལྟར་ན། ཕྱི་ཟླ་ ༤ ཚེས་ ༡ གཡས་གཡོན་དུ་དཀར་མཛེས་རྩིས་ཚང་དགོན་དུ་དྲག་ཆས་ཉེན་རྟོག་པ་སོགས་མང་པོ་ཞིག་ཡོང་སྟེ་གྲྭ་ཤག་ནང་གང་བྱུང་སྔོག་བཤེར་བྱས་ཡོད་པ་མ་ཟད། རང་ལོ་ ༤༠ གཡས་གཡོན་ཡིན་པའི་གྲྭ་བསོད་ནམས་ཉི་མ་གཙོས་དགེ་འདུན་པ་བཞི་ལྔ་ཙམ་ཞིག་འཛིན་བཟུང་བྱས་ཡོད་པ་དང་། བསོད་ནམས་ཉི་མ་ལགས་ནི་རྒྱུན་གཏན་དགོན་པའི་དགོས་མཁོའི་ཉོ་ཚོང་གནང་མཁན་གྱི་ལས་སྣེའི་གྲས་ཤིག་ཡིན། ཁོང་ནི་དཀར་མཛེས་ལྷོ་པ་ཤང་གི་ཕ་ངག་དབང་མཐུ་སྟོབས་གྱི་བུ་ཡིན་པ་རེད། བསོད་ནམས་ཉི་མ་ལགས་ཀྱི་ཕ་མ་གཅིག་པའི་སྤུན་མཆེད་ཟླ་བ་དོན་གྲུབ་ཀྱི་བུ་རྒན་པ་དཀར་མཛེས་རྩིས་ཚང་དགོན་པའི་གྲྭ་ཚེ་རིང་འགྱུར་མེད། སྔ་ལོའི་ཕྱི་ཟླ་ ༣ ཚེས་ ༡༨ ཉིན་དཀར་མཛེས་རྫོང་ཐོག་ཏུ་ཞི་རྒོལ་ནང་ཞུགས་རྐྱེན་དཀར་མཛེས་ས་ཁུལ་གྱི་འཛིན་བཟུང་བཀའ་རྒྱ་ཞེས་པའི་མིང་གཞུང་ཁོངས་ཐོན་ཏེ་ད་བར་ས་གནས་སུ་སྡོད་མ་ཐུབ་པར་བྲོས་བྱོལ་དུ་འགྲོ་དགོས་བྱུང་ཡོད་པ་དང་། ཚེ་རིང་འགྱུར་མེད་ཀྱི་གཅུང་པོ་རང་ལོ་ ༢༤ སོན་པ་རྩིས་ཚང་དགོན་པའི་གྲྭ་བསྟན་འཛིན་དངོས་གྲུབ། སྔ་ལོའི་ཕྱི་ཟླ་ ༥ ཚེས་ ༢༠ ཉིན་དཀར་མཛེས་རྫོང་ཐོག་ཏུ་ཞི་རྒོལ་བྱས་རྐྱེན་འཛིན་བཟུང་དུ་ཚུད་དེ་ད་ཆ་ལོ་གསུམ་གྱི་ཁྲིམས་ཆད་བཏང་ཟིན་ཡོད་པའི་གནས་ཚུལ་ཐོན་ཡོད་པ་རེད།།
