ཕྱི་ལོ་ ༢༠༠༩ ཟླ་ ༤ ཚེས་ ༡༨ རེས་སྤེན་པ།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་བར་ལྟར་ན། ཕྱི་ཟླ་ ༤ ཚེས་ ༥ ཉིན་དཀར་མཛེས་རྫོང་ཐོག་དང་། ལྷོ་པ་ཤང་། དར་རྒྱས་ཕྱོགས་རོང་པ་ཚ་སོགས་ས་གནས་གང་སར་ཉེ་ཆར་ཕྱི་ཟླ་ ༣ ཚེས་ ༥ ནས་བཟུང་དཀར་མཛེས་རྫོང་ཐོག་ཏུ་དངོས་སུ་ཐོན་ཏེ་ཞི་བའི་སྐད་འབོད་བྱེད་མཁན་དང་། ས་ཞིང་འདེབས་ལས་མི་བྱེད་པའི་ངོ་རྒོལ་གྱི་ཉེས་འཛུགས་འོག་འཛིན་བཟུང་བྱས་པའི་གྲས་ནས་བོད་མི་གྲངས་ ༡༥ སྐྲ་བཞར་ཏེ་བཙོན་ཆས་གཡོགས་པ་དང་། རྐང་ལྕགས་ལག་ལྕགས་བརྒྱབ་སྟེ། དྲག་ཆས་དམག་མིའི་རླངས་འཁོར་ནང་བླུགས་རྗེས་ལག་ཏུ་མེ་མདའ་སོགས་ཀྱི་གོ་མཚོན་ཐོགས་པའི་དྲག་ཆས་དམག་མིའི་རླངས་འཁོར་ཆེ་ཆུང་བསྡོམས་ ༢༠ ཙམ་གྱིས་མཐའ་སྐོར་ནས་གོང་གསལ་ས་གནས་དེ་དག་ནང་བསྐོར་བསྐྱོད་བྱས་ཡོད་པ་མ་ཟད། རྒྱང་བསྒྲགས་ཐོག་ནས་ཁོང་ཚོ་ནི་མི་རིགས་ཁ་བྲལ་གཏོང་མཁན་དང་རྒྱལ་ཁབ་ཀྱི་བདེ་འཇགས་གཏོར་བཤིག་གཏོང་མཁན་ཡིན་པའི་དྲིལ་བསྒྲགས་བྱས་ཡོད། གལ་ཏེ་ཁོང་ཚོ་ལྟར་བྱས་ཚེ་མཇུག་འབྲས་གཅིག་མཚུངས་ཡིན་ཞེས་ས་གནས་མང་ཚོགས་ལ་མངོན་གསལ་དོད་པོས་སྡིགས་ར་བསྐུལ་ཡོད་པ་རེད།
གོང་གསལ་མི་གྲངས་ ༡༥ ཁོངས་མིང་གཞུང་ཤེས་རྟོགས་བྱུང་བ་ནི།
ད་ལོའི་ཕྱི་ཟླ་ ༣ ཚེས་ ༡༩ ཉིན་ཞིང་ཁ་འདེབས་ལས་མ་བྱས་པའི་ཉེས་མིང་འོག་འཛིན་བཟུང་བྱས་པ་རང་ལོ་ ༢༧ ལ་སོན་པ་དཀར་མཛེས་རྩིས་ཚང་དགོན་གྱི་གྲྭ་བྱམས་པ་དོན་གྲུབ་དང་།
ཕྱི་ཟླ་ ༣ ཚེས་ ༡༩ ཉིན་ཉེས་པ་ཁ་གསལ་གང་ཡང་མེད་པར་འཛིན་བཟུང་བྱས་པ་དཀར་མཛེས་མཐའ་མེད་འབྲས་ལྟག་གྲོང་ནས་ཡིན་པ་རང་ལོ་ ༥༦ ཙམ་དུ་སོན་པ་བཀྲ་འཕེལ།
ཕྱི་ཟླ་ ༣ ཚེས་ ༢༡ ཉིན་ཞིང་ཁ་འདེབས་ལས་མ་བྱས་པའི་ཉེས་མིང་འོག་འཛིན་བཟུང་བྱས་པ་ལྷོ་པ་ཤང་ཁང་ཉིན་ནང་གྲོང་ནས་ཡིན་པ་རང་ལོ་ ༤༢ ལ་སོན་པ་ཚེ་རིང་དབང་རབ་(ཚེ་རིང་དབང་དགའ་)བཅས་ཡིན་པ་ལས་དེ་མིན་གཞན་དག་རྣམས་སུ་དང་སུ་ཡིན་ཁ་གསལ་ཤེས་རྟོགས་བྱུང་མེད།
རྩ་བའི་ཆར་དཀར་མཛེས་རྫོང་ཁོངས་སུ་ད་ལོ་ཕྱི་ཟླ་ ༣ ཚེས་ ༥ ཙམ་ནས་བཟུང་སེར་སྐྱ་ན་གཞོན་མང་པོ་ཞིག་གིས་རྫོང་ཐོག་ཏུ་དངོས་སུ་ཐོན་ཏེ་ཞི་རྒོལ་བསྟུད་མར་བྱས་ཏེ། མི་སྣ་མང་པོ་ཞིག་འཛིན་བཟུང་བྱས་དང་བྱེད་བཞིན་ཡོད་ཀྱང་ས་གནས་སུ་བརྒྱུད་ལམ་ཐད་འབྲེལ་བ་བྱ་ཕྱོགས་ཤིན་ཏུ་དམ་བསྒྲགས་ཆེ་རུ་སོང་ཡོད་སྟབས། ཉིན་ལྟར་ངོ་རྒོལ་ནང་ཞུགས་བཞིན་པའི་བོད་མི་སོ་སོའི་ལོ་རྒྱུས་ཡོངས་རྫོགས་ཤེས་རྟོགས་ཐུབ་རྒྱུར་དངོས་ཡོད་ཀྱི་དཀའ་ངལ་ཞིག་ཏུ་གྱུར་ཡོད།།
