༢༠༡༣ ཟླ་ ༡ ཚེས་ ༡༠ རེས་གཟའ་ཕུར་བུ།
༄༅། །རྒྱ་གར་གཞུང་གི་ཉིན་རེའི་གསར་འགོད་ལྷན་ཚོགས་སྐབས་དཔལ་འབྱོར་བློན་ཆེན་སྐུ་ཞབས་པི་ཅི་ཏམ་བྷ་རམ་ (P Chidambaram) མཆོག་གིས་ཕྱི་ལོ་ ༢༠༡༣ ཟླ་ ༡ ཚེས་ ༡༠ ཉིན་གསལ་བསྒྲགས་གནང་བའི་ནང་གསལ། རྒྱ་གར་དབུས་གཞུང་གིས་བཀའ་ཤག་ལྷན་ཚོགས་ཐོག་གོ་བསྡུར་སྦྱངས་བཤད་གནང་མཐར་དབུས་བོད་སློབ་འཛིན་ཚོགས་ཀྱི་སློབ་གྲྭ་ཁག་བོད་མིའི་སྒྲིག་འཛུགས་ཤེས་རིག་ལས་ཁུངས་སུ་རྩིས་སྤྲོད་གནང་རྒྱུའི་ཐག་གཅོད་བྱུང་ཡོད་སྐོར་གསལ་བཤད་གནང་བ་དང་སྦྲགས། དེའི་དམིགས་ཡུལ་གཙོ་བོ་ནི་སློབ་ཕྲུག་ཚོའི་ཤེས་ཡོན་གྱི་གྲུབ་འབྲས་ཇེ་བཟང་དུ་གཏོང་ཆེད་ཡིན་སྐོར་གསུངས་འདུག
དེ་ཡང་བོད་མིའི་སྒྲིག་འཛུགས་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་ཀྱིས་གསལ་བཤད་གནང་དོན། དེ་རིང་ཕྱི་ལོ་ ༢༠༡༣ ཟླ་ ༡ ཚེས་ ༡༠ རེས་གཟའ་ཕུར་བུའི་ཉིན་བོད་སློབ་འཛིན་སྐྱོང་ཚོགས་པའི་ཚོགས་གཙོ་ཨ་པུར་བ་ཅནྜ་དྲ་Apurva Chandraམཆོག་གིས་བོད་མིའི་སྒྲིག་འཛུགས་སྲིད་སྐྱོང་བློ་བཟང་སེང་གེ་མཆོག་ལ་ལག་ཐོག་ཁ་པར་བརྒྱུད་ཕྱག་བྲིས་ (Text message) ཤིག་བཏང་གནང་སྟེ་རྒྱ་གར་དབུས་གཞུང་བཀའ་ཤག་གིས་བོད་སློབ་འཛིན་ཚོགས་བོད་མིའི་སྒྲིག་འཛུགས་ཤེས་རིག་ལས་ཁུངས་ལ་རྩིས་སྤྲོད་གནང་རྒྱུའི་ཐག་བཅོས་ཟིན་པའི་སྐོར་གསུངས་ཡོད། བོད་མིའི་སྒྲིག་འཛུགས་ཤེས་རིག་ལས་ཁུངས་ལྟ་བུར་མཚོན་པ་ཡིན་ན། བོད་མིའི་སྒྲིག་འཛུགས་ཀྱིས་བོད་ཕྲུག་ལྟ་སྐྱོང་གི་ལས་དོན་ཐོག་ལ་སྔར་ལྷག་ཚགས་ཚུད་ཡོང་རྒྱུའི་ཡིད་ཆེས་དང་གདེང་སྤོབས་གནང་བ་ཞིག་མཚོན་བཞིན་ཡོད་པར་བསམ་བཞིན་ཡོད།
དེར་བརྟེན་ང་ཚོས་རྒྱ་གར་དབུས་གཞུང་ལ་དམིགས་བསལ་ཐུགས་རྗེ་ཆེ་ཞུས་པ་དང་སྦྲགས། ད་ཕན་རྒྱ་གར་གཞུང་མང་གཉིས་དང་ལྷག་པར་བོད་སློབ་འཛིན་ཚོགས་ནང་ཡུན་རིང་ནས་ཞབས་ཕྱི་ཞུས་པའི་རྒྱ་བོད་དགེ་རྒན་དང་ལས་བྱེད་རྣམ་པ་ཚང་མར་གོ་སྐབས་འདི་བཟུང་སྟེ་བསྐྱར་དུ་ཐུགས་རྗེ་ཆེ་ཞུ་རྒྱུ་ཡིན། ཤེས་རིག་ལས་ཁུངས་ལ་རྒྱ་གར་དབུས་གཞུང་གིས་འདི་ལྟ་བུ་ཡིད་ཆེས་དང་གདེང་སྤོབས་གནང་ཡོད་པ་མ་ཟད། ཐོག་མར་༸གོང་ས་༸སྐྱབས་མགོན་ཆེན་པོ་མཆོག་དང་སྲིད་བློན་ནེ་རུ་མཆོག་གིས་བོད་ཕྲུག་རྣམས་ལ་སྲོལ་རྒྱུན་དང་དེང་རབས་ཀྱི་ཤེས་ཡོན་གཉིས་ཀ་ཚད་ལྡན་ཐོག་འདབ་ཤོག་གཉིས་ལྡན་ཞིག་ཡོང་རྒྱུའི་དགོངས་བཞེས་མཛད་ཡོད། དེར་བརྟེན་བོད་སློབ་འཛིན་སྐྱོང་ཚོགས་པ་དེ་བཞིན་ལོ་ངོ་ལྔ་བཅུ་ལྷག་ཟིན་པའི་སློབ་གྲྭ་རྙིང་ཤོས་ཤིག་ཆགས་ཡོད། སློབ་ཕྲུག་ཀྱང་ཧ་ཅང་མང་པོ་ཡོད། དེའི་ཐོག་ལ་ཤེས་རིག་ལས་ཁུངས་ནས་༸གོང་ས་མཆོག་གི་དགོངས་བཞེད་བསྒྲུབ་ཆེད་གང་ཐུབ་འབད་བརྩོན་ཞུ་རྒྱུ་ཡིན། དེ་དང་ཆབས་ཅིག་རྒྱུན་དུ་སྲིད་སྐྱོང་བློ་བཟང་སེང་གེ་མཆོག་གིས་གསུངས་པ་ལྟར་བཀའ་ཤག་སྐབས་ ༡༤ ཐོག་ནས་ཤེས་ཡོན་དེ་བཞིན་གལ་ཆེའི་ནང་ནས་དོན་ཆེ་ཞིག་ལ་ངོས་འཛིན་ཐོག་ཕྱག་ལས་གནང་བཞིན་ཡོད། དེར་བརྟེན་ང་ཚོས་ངོས་ནས་ཀྱང་བོད་མིའི་སྤྱི་ཚོགས་ནང་དུ་ཤེས་ཡོན་དང་འབྲེལ་བ་ཡོད་པ་གཙོ་བོ་སློབ་གྲྭའི་དགེ་རྒན་རྣམ་པ་དང་། དེ་བཞིན་སློབ་ཕྲུག་དང། ཕ་མ། སྤྱི་ཚོགས་དང། དེ་བཞིན་འཛིན་སྐྱོང་བཅས་ང་ཚོ་ཚང་མས་ཐེངས་འདིའི་གོ་སྐབས་འཛིན་ཏེ་ཤེས་ཡོན་འདི་བཞིན་ཧ་ཅང་གལ་ཆེར་འཛིན་ཏེ་རང་འཁྲིས་ལས་འགན་ཐོག་གང་ཡོད་འབད་བརྩོན་གནང་དགོས་རྒྱུ་ཧ་ཅང་གལ་ཆེན་པོ་ཡིན་པའི་འབོད་སྐུལ་ཞུ་རྒྱུ་ཡིན། ཞེས་གསུངས་ཡོད་པ་བཅས།།
