ཕྱི་ལོ་ ༢༠༠༩ ཟླ་ ༤ ཚེ་ ༩ རེས་གཟའ་ཕུར་བུ།
བོད་ནང་གི་ཆབ་སྲིད་ཀྱི་བཙོན་པ་ཚང་མ་གློད་བཀྲོལ་གཏོང་དགོས་པའི་ཞུ་སྐུལ།
༄༅། །བོད་མི་གཉིས་ལ་སྲོག་ཐོག་གི་ཉེས་ཆད་དང་། བོད་མི་གཞན་གཉིས་ལ་ལོ་གཉིས་ཕྱིར་འགྱངས་ཀྱིས་སྲོག་ཐོག་གི་ཉེས་ཆད་བཏང་ཡོད་པར་བཀའ་ཤག་ལ་བློ་འཚབ་ཆེན་པོ་ཡོད། བློ་འཚབ་བྱེད་དགོས་དོན་ནི་དོན་དངོས་ཐོག་རྒྱ་གཞུང་གིས་ཁྲིམས་ཀྱི་བརྒྱུད་རིམ་མེད་པ་དང་། ཁྲིམས་ཁང་ནི་རྒྱ་གཞུང་གི་དབང་འཛིན་པ་ཚོའི་ལག་ཆ་ཡིན་སྟབས་ལམ་དང་ལུགས་སྲོལ་སོགས་གང་ཡང་མེད་པའི་ཐོག་ནས་བོད་མིར་ཉེས་འཛུགས་ཐག་གཅོད་ཀྱིས་དཀའ་ངལ་ཇེ་ཆེར་གཏོང་བཞིན་ཡོད།
སྔ་ལོའི་ནང་བོད་ས་ཁྱོན་ཡོངས་སུ་ཞི་རྒོལ་ཤུགས་ཆེ་བྱུང་བ་དེ་འགོག་སླད་རྒྱ་གཞུང་ནས་དྲག་གནོན་ཤུགས་ཆེ་བྱས་སྟེ་བོད་མི་ཕོན་ཆེ་འཛིན་བཟུང་བྱས་པའི་སྐབས་དེར་བཀའ་ཤག་གིས་རྒྱ་ནག་མི་མང་སྤྱི་མཐུན་རྒྱལ་ཁབ་ལ་བོད་ནང་གི་ཆབ་སྲིད་ཀྱི་བཙོན་པ་ཚང་མ་གློད་བཀྲོལ་གྱིས་ཁོང་ཚོར་འོས་ཤིང་འཚམས་པའི་སྨན་བཅོས་ཀྱི་མཐུན་རྐྱེན་བསྐྲུན་དགོས་པའི་འབོད་སྐུལ་ཞུས་ཡོད། ཐེངས་འདིར་སླར་ཡང་རྒྱ་གཞུང་ནས་བོད་ཀྱི་ཆབ་སྲིད་བཙོན་པ་རྣམས་གློད་བཀྲོལ་དགོས་པའི་འབོད་སྐུལ་ཞུ་བཞིན་ཡོད།བཀའ་ཤག་གི་ངོས་ནས་རྒྱ་ནག་གིས་བོད་མི་ཕོན་ཆེ་འཛིན་བཟུང་དང་མུ་མཐུད་དེ་དྲག་གནོན་བྱེད་བཞིན་པ་དེས་བོད་མི་རྣམས་ལ་སྔར་བས་ཞེ་འཁོན་ཆེ་བ་ཡོང་རྒྱུར་ངོས་འཛིན་ཞུ་གི་ཡོད། ལྟ་ཚུལ་དེ་གཞིར་བཟུང་ཐོག་བཀའ་ཤག་གིས་བོད་ཀྱི་དཀའ་རྙོག་སེལ་རྒྱུའི་ཐབས་ལམ་ཡག་ཤོས་ནི་དྲང་བདེན་དང་ལྷག་བསམ་གྱི་ཐོག་ནས་བོད་མིའི་མངོན་འདོད་སྒྲུབ་རྒྱུར་ཐུགས་ཁུར་བྱ་རྒྱུ་དེ་ཡིན།།
བཀའ་ཤག་ནས་ཕྱི་ལོ་ ༢༠༠༩ ཟླ་ ༤ ཚེས་ ༩ ལ།།
ཐུགས་སྣང་། གསལ་བསྒྲགས་ངོ་མ་དབྱིན་ཡིག་ཐོག་ཡོད་པ་ནས་འདི་ག་བོད་ཡིག་ཚན་པས་ཕབ་སྒྱུར་ཞུས་པས་ཚིག་དོན་ལ་ཧེ་བག་ཡོད་ཚེ་རྩ་བ་དབྱིན་ཡིག་རང་ལ་རྩ་འཛིན་ཡོད་པ་ཞུ།
