༢༠༡༢ ཟླ་ ༡༢ ཚེས་ ༢༩ རེས་གཟའ་སྤེན་པ།
༄༅། །བོད་མིའི་འདི་ཕྱི་གཉིས་ཀྱི་སྐྱབས་གནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨུ་རུ་སུའི་་དད་ལྡན་ཆོས་ཞུ་བ་ཁག་གཅིག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་མགོན་པོ་གང་ཉིད་མཆོག་གིས་རྒྱ་གར་རྒྱལ་ས་ལྡི་ལི་གསར་པའི་ནང་ཕྱི་ལོ་ ༢༠༡༢ ཟླ་ ༡༢ ཚེས་ ༢༤ ནས་བཟུང་ཉིན་གྲངས་བཞིའི་རིང་ཨུ་རུ་སུ་སོགས་ནས་ཆེད་བཅར་ཞུས་པའི་དད་ལྡན་ཆོས་ཞུ་བ་རྣམས་ལ་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་གི་ཆོས་འབྲེལ་དབུ་འཛུགས་ཀྱིས་ཕྱི་ཚེས་ ༢༧ ཉིན་མཇུག་སྒྲིལ་མཛད་འདུག
དེ་ཡང་༸གོང་ས་མཆོག་གི་ཆོས་འབྲེལ་སྐོར་ཁལ་མུཀ་ནང་བསྟན་གྱི་གཙོ་འཛིན་ཏེ་ལོ་རིན་པོ་ཆེ་མཆོག་གིས་གསར་འགྱུར་བརྒྱུད་ལམ་ཁག་ནང་གསུང་དོན། ད་ཐེངས་ཉིན་བཞིའི་རིང་གི་ཆོས་འབྲེལ་དེ་བཞིན་ཧ་ཅང་ཡག་པོ་བྱུང་སོང། འདས་པའི་ལོ་གསུམ་རིང་ལ་ཆོས་འབྲེལ་དེ་རྡ་སར་གོ་སྒྲིག་བྱེད་བཞིན་ཡོད། ལོ་བཞི་པ་དེ་ཡང་རྡ་སར་བྱ་རྒྱུའི་འཆར་གཞི་ཡོད་ཀྱང་༸གོང་ས་མཆོག་གི་མཛད་འཆར་དང་སྟབས་བསྟུན་ལྡི་ལིར་འགྱུར་བ་བཏང་གནང་བ་རེད། ད་རེས་ཆོས་འབྲེལ་སྐབས་ཁལ་མུཀ་ནས་ཆོས་ཞུ་བ་མི་ ༢༢༤ དང་བྷུར་ཡ་ནས་ ༢༢༧ ཐུ་ཝ་བ་ནས་ ༧༨ ཨུ་རུ་སུའི་ས་གནས་གཞན་ནས་ཆོས་ཞུ་བ་ ༤༥༧ ཕེབས་ཡོད། དེ་བཞིན་ང་ཚོ་ཆོས་ཞུ་བ་ཚོས་༸གོང་ས་༸སྐྱབས་མགོན་ཆེན་པོ་མཆོག་ཨུ་རུ་སུར་ཆིབས་སྒྱུར་བསྐྱང་ཆེད་མཐོང་མཆན་འབུལ་ལམ་ཞུ་དགོས་པའི་ས་ཡིག་བསྡུ་རུབ་བྱས་པའི་ཡི་གེ་དེ་ང་ཚོའི་ངོ་ཤེས་ཤིག་ད་རེས་ཨུ་རུ་སུའི་སྲིད་འཛིན་མཆོག་དང་ལྷན་སླེབས་ཡོད་སྟབས། ཁོང་བརྒྱུད་ནས་སྲིད་འཛིན་མཆོག་ལ་འབུལ་རོགས་ཞེས་ཞུས་ཡོད་ཞུས་ཡོད་པར་ལྟར་ཁོང་ནས་ཁས་ལེན་གནང་བྱུང་། ངས་ཀྱང་༸གོང་ས་༸སྐྱབས་མགོན་ཆེན་པོ་མཆོག་ཨུ་རུ་སུར་ཆིབས་བསྐྱང་ཐུབ་པའི་རེ་བ་ཡིད་ཆེས་བྱེད་བཞིན་ཡོད། ཅེས་གསུངས་འདུག་པ་བཅས། །
