ཕྱི་ལོ་ ༢༠༠༩ ཟླ་ ༤ ཚེས་ ༣ རེས་གཟའ་པ་སངས།
༄༅། །ཕྱི་ལོ་ ༢༠༠༩ ཕྱི་ཟླ་ ༣ ཚེས་ ༢༥ ཉིན་ཕྱི་དྲོ་དཀར་མཛེས་ས་ཁུལ་བྲག་འགོ་རྫོང་ཁོངས་སུ་ཡོད་པའི་བྲག་འགོ་དགོན་པའི་དགེ་འདུན་པ་ལོ་ ༢༧ སོན་པ་ཕུན་ཚོགས་རྒྱ་གཞུང་སྤྱི་བདེ་ཉེན་རྟོག་པས་ཉེས་རྡུང་ཚད་མེད་བཏང་སྟེ་འདས་གྲོངས་སུ་གྱུར་བའི་གནས་ཚུལ་བྱུང་འདུག
དེ་ཡང་ཐོག་མའི་གནས་ཚུལ་བྱུང་རྐྱེན་ནི་དེ་ཉིན་དགེ་འདུན་པ་ཁོང་ནས་ཤོག་ངོས་ ༧ ཙམ་ཡོད་པའིཡི་གེ་ཞིག་བྲིས་པའི་ནང་། ང་ཚོར་བཟའ་རྒྱུ་སོགས་གང་ཡང་མེད་ནའང་སྔ་ལོ་ཞི་རྒོལ་ཁྲོད་བོད་མི་བསད་རྨས་དང་། བཙོོན་འཇུག་བྱས་པ་རྣམས་ཀྱི་ཆེད་དུ་གདུང་སེམས་མཉམ་སྐྱེ་མཚོན་ཆེད་བྲག་འགོ་རྫོང་མི་མང་ཡོངས་ནས་ས་ཞིང་འདེབས་ལས་བྱ་རྒྱུ་མིན་པ་སོགས་ཀྱི་སབྱར་ཡིག་བྲག་འགོ་རྫོང་སྨད་ཕྱོགས་རྒྱས་བཟང་ཅུས་ཉེན་རྟོག་ཡན་ལག་ཁང་དང་། ཤྭ་ར་ཐང་རྡོ་ཟམ། ཆུས་(ཤང་)དེའི་གཞུང་ལམ་གྱི་གཡས་གཡོན་ལྕང་སྡོང་སོགས་ཀྱི་ངོས་སུ་སབྱར་ཡོད་པ་རེད་འདུག དེ་རྗེས་ཝ་ལོང་གྲོང་སྡེའི་ཉེ་འདབས་སུ་ཡོད་པའི་རླངས་འཁོར་བཟོ་བཅོས་ཁང་གི་གྱང་ངོས་སུ་སྦྱར་སྐབས་དྲག་ཆས་ཉེན་རྟོག་པས་འཛིན་བཟུང་བྱེད་པར་ཡོང་སྐབས་སྦག་སྦག་གཞོན་ནས་་སྟག་བསམ་གཏན་གླིང་བཙུན་དགོན་གྱི་རི་འདབས་སུ་བྲོས་སྐབས་སྦག་སྦག་འགྲོ་བའི་ལམ་བུ་མེད་སྟབས་རྒྱ་གཞུང་དྲག་ཆས་དམག་མིས་འཛིན་བཟུང་གིས་ཉེས་རྡུང་ཚབས་ཆེ་བཏང་རྐྱེན་ཁོང་རང་སར་འདས་གྲོངས་སུ་གྱུར་འདུག ཡིན་ནའང་རྒྱ་གཞུང་དྲག་ཆས་དམག་མིས་ཁོང་རང་ཤི་རྒྱབ་པར་ཁག་དཀྲི་བཏགས་ཏེ་ཕུང་པོ་རི་རྩེ་ནས་གཡུག་པར་བརྟེན་ཡུལ་མིས་ཕྱི་ཉིན་མ་གཏོགས་ཤེས་རྟོགས་ཐུབ་མི་འདུག
བྲག་འགོ་རྫོང་ཁུངས་སུ་རྒྱ་གཞུང་དྲག་ཆས་དམག་མིས་དགེ་འདུན་པ་དམར་གསོད་བཏང་བའི་དོན་རྐྱེན་ད་རེས་ཙམ་མ་ཡིན་པར་ ༢༠༠༨ ཕྱི་ཟླ་ ༣ ཚེས་ ༢༤ ཉིན་ལྕོག་རི་ས་གནས་སུ་ཡོད་པའི་ངང་དགོང་བཙུན་དགོན་དང་། ལྕོག་རི་དགོན། ས་གནས་མང་ཚོགས་སོགས་ནས་ཞི་བའི་ངོ་རྒོལ་བྱེད་སྐབས་ལྕོག་རི་དགོན་པའི་དགེ་འདུན་པ་ཀུན་དགའ་དྲག་ཆས་ཉེན་རྟོག་པས་མེ་མདའ་བརྒྱབས་ཏེ་རང་སར་དམར་བསད་བཏང་བ་དང་། ཚེས་ ༢༥ ཉིན་བྲག་འགོ་དགོན་པའི་ཉེ་འཁྲིས་སུ་ཕུང་པོ་མེར་སྲེག་བཏང་བའི་གནས་ཚུལ་ཐོས་པ་སོགས་ལ་བརྟེན་བྲག་འགོ་དགོན་པའི་དགེ་འདུན་པ་རྣམས་ནས་ཞི་རྒོལ་མུ་མཐུད་སྤེལ་བཞིན་ཡོད་འདུག
