༢༠༡༠ ཟླ་ ༨ ཚེས་ ༩ རེས་གཟའ་ཟླ་བ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༥ ཉིན་གྱི་དགོང་དྲོ་ཆུ་ཚོད་ ༩།༣༠ ཙམ་ལ་ལ་དྭགས་ཀྱི་རྒྱལ་ས་སླེ་དང་རྩ་ཕུ་སོགས་སུ་ཆུ་སྤྲིན་འཐོར་བ་ལས་བྱུང་བའི་དྲག་ཆར་ཤུགས་ཆེ་བབས་ནས་ཆུ་ལོག་རྒྱུགས་ཏེ་མི་བརྒྱ་ཕྲག་བརྒལ་བ་རྐྱེན་འདས་དང་། མི་གྲངས་སུམ་བརྒྱ་ལྷག་ལ་བཟོད་དཀའ་བའི་རྨས་སྐྱོན་ཕོག་པར་བརྟེན་ཚེས་ ༨ ཉིན་བོད་གཞུང་ཆོས་རིག་ལས་ཁུངས་ནས་གོ་སྒྲིག་འོག་རྡ་ས་ཐེག་ཆེན་ཆོས་གླིང་གཙུག་ཁང་དུ་སྔ་དྲོ་ཆུ་ཚོད་ ༩།༣༠ ཐོག་རྟེན་མཆོག་སྤྱན་སྔར་མཆོད་སྤྲིན་བརྒྱ་ཚར་འབུལ་བཤམས་ཐོག་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་དང་དྲུང་འཕར་ནོར་བུ་དོན་ལྡན་ལགས། རྣམ་རྒྱལ་ཕན་བདེ་ལེགས་བཤད་གླིང་གི་གྲྭ་ཚང་གི་དབུ་མཛད་དང་དགེ་འདུན་འདུས་མང་གི་དབུས་རྡ་སའི་ཉེ་འཁོར་གྱི་རིས་མེད་ཆོས་སྡེ་ཁག་དང་དེ་བཞིན་མིང་མང་བཅས་ཁྱོན་མི་གྲངས་ ༤༠༠ བརྒལ་བ་ལྷན་འཛོམས་ཀྱིས་ཆུ་རུད་ཀྱི་འཇིག་པའི་འོག་རྐྱེན་འདས་སུ་གྱུར་བ་རྣམས་ཀྱི་མཚོན་སེམས་ཅན་ཚེ་ལས་འདས་པ་ཡོངས་ཀྱི་ཚེ་རབས་ཕྲེང་བར་བྱས་བསགས་སྡིག་ལྟུང་མཐའ་དག་བྱང་ཞིང་དག་ནས་དལ་རྟེན་རིམ་བརྒྱུད་སྐུ་བཞིའི་རྒྱལ་བའི་གོ་འཕང་རིན་པོ་ཆེ་མྱུར་དུ་འཐོབ་པ་དང་། རྨས་སྐྱོན་དང་གོད་ཆག་ཕོག་པ་རྣམས་ཀྱང་མྱུར་དུ་དྲག་སྐྱེད་ཀྱིས་ཚེ་ལྷག་དོན་ལྡན་ཡོང་བ་སོགས་འཇིག་རྟེན་ཀུན་ཏུ་སྙིགས་ལྔའི་རྒུད་ཚོགས་སྤྱི་དང་ཁྱད་པར་འབྱུང་བཞིའི་འཇིག་པ་མི་འབྱུང་བར་བདེ་སྐྱིད་རྫོགས་ལྡན་གྱི་དཔལ་ལ་ལོངས་སུ་སྤྱོད་ཐུབ་པའི་སྨོན་ལམ་གསོལ་འདེབས་ཚོགས་ཡོད་པ་མ་ཟད། དེ་ཉིན་ཆོས་རིག་ལས་ཁུངས་ནས་འཕགས་ཚོགས་འདུས་པ་རྒྱ་མཚོར་བསྙེན་བཀུར་མང་ཇ་དང་། དགེ་བཙུན་སྔགས་གསུམ་ལ་སྐུ་འགྱེད་ཧིན་སྒོར་ ༥༠ རེ་བཅས་ཕུལ་བ་དང་ཆབས་ཅིག་དགོན་སྡེ་ཁག་ལའང་སྐྱབས་འཇུག་གནང་སྐྱོང་ཡོང་བའི་འབོད་སྐུལ་ཞུས་འདུག་པ་བཅས།
