༢༠༡༢ ཟླ་ ༡༢ ཚེས་ ༡༤ རེས་གཟའ་པ་སངས།
༄༅། །ཡུ་རོབ་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་སྐུ་ཞབས་ལིའོ་ནི་ཌ་སི་ཌོན་སི་ཀི་ Mr Leonidas Donskis མཆོག་གིས་ཡུ་རོབ་སྤྱི་མཐུན་ཚོགས་པའི་འདི་ལོའི་མང་གཙོ་དང་འགྲོ་བ་མིའི་ཐོབ་ཐང་གི་ལོ་འཁོར་སྙན་ཐོ་གཏན་འབེབས་གནང་སྐབས་གསུང་དོན། ཡུ་རོབ་སྤྱི་མཐུན་ཚོགས་པའི་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་སྲིད་བྱུས་དེ་སྲ་བརྟན་ཞིག་དང་ནུས་པ་ལྡན་པ་ཞིག་གཏན་འབེབས་གནང་སྟེ་དཀའ་ངལ་རྣམས་ཞི་བའི་ཐོག་གྲོས་མོལ་ལམ་ནས་སེལ་རྒྱུ་དང། འཛམ་གླིང་ནང་མང་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་ཐད་ཡུ་རོབ་སྤྱི་མཐུན་ཚོགས་པས་རྒྱབ་སྐྱོར་གྱི་ལངས་ཕྱོགས་གསལ་སྟོན་ཐུབ་དགོས། དེར་བརྟེན་ཐེངས་འདིའི་ལོ་འཁོར་སྙན་ཐོའི་ནང་ཡུ་རོབ་བོད་དོན་དམིགས་བསལ་འབྲེལ་འཐུད་པ་ཞིག་བསྐོ་གཞག་གནང་རྒྱུའི་ཆ་རྐྱེན་སྐྲུན་དགོས་པ་མ་ཟད། མང་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་གནད་དོན་ལ་ཐུག་སྐབས་ཡུ་རོབ་སྤྱི་མཐུན་ཚོགས་པས་རྒྱ་ནག་དང་ཨུ་རུ་སུ་གཙོ་བོར་གྱུར་བའི་འཛམ་གླིང་སྟོབས་ཆེན་རྒྱལ་ཁབ་སུ་འདྲ་ཞིག་དང་ཐུག་ཀྱང་རྒྱབ་གཤིག་ནམ་ཡང་རྒྱག་རྒྱུ་མིན་པའི་ཁས་ལེན་གནང་དགོས། གང་ཡིན་བརྗོད་ན། སྟོབས་ཆེན་རྒྱལ་ཁབ་དེ་དག་དང་རྒྱུན་ལྡན་ཚོང་འབྲེལ་བྱེད་སྐབས་དཔལ་འབྱོར་ཁེ་སང་འོག་འགྲོ་བ་མིའི་ཐོབ་ཐང་གི་གནད་དོན་དེ་དག་རིན་ཐང་ཆུང་ཆུང་ཆགས་འགྲོ་བཞིན་ཡོད།
དེར་བརྟེན་འདི་ལོའི་ལོ་འཁོར་སྙན་ཐོ་དེ་བཞིན་ཁ་གསལ་ཚིགས་ཐག་ཆོད་པོ་དང་། ལངས་ཕྱོགས་དེས་འཛམ་གླིང་ནང་འགྲོ་བ་མིའི་ཐོབ་ཐང་གི་གནས་སྟངས་ལ་བཟང་ཕྱོགས་ཀྱི་འགྱུར་བ་གཏོང་ཐུབ་པའི་ནུས་པ་ལྡན་པ་ཞིག་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། དེ་ལྟར་མིན་ཚེ་རྒྱུན་ལྡན་ལོ་འཁོར་སྙན་ཐོ་སྐྱར་ལོག་རྒྱབ་པ་ལྟ་བུ་ཆགས་རྒྱུ་ལས་དོན་ཕན་གང་ཡང་མེད། ངའི་བསམ་པར་ལོ་རེའི་འགྲོ་བ་མིའི་ཐོབ་ཐང་དང་མང་གཙོ་སྲུང་སྐྱོབ་ཀྱི་ལོ་འཁོར་སྙན་ཐོ་དེ་བཞིན་དམིགས་ཚད་མཐོན་པོ་ཙམ་མ་ཟད། དམིགས་ཡུལ་དེ་དག་ལག་བསྟར་ཐུབ་ངེས་ཤིག་བསྐྲུན་ཆེད་གྲོས་ཚོགས་ཀྱི་ཤུགས་རྒྱག་རྒྱུ་ཧ་ཅང་གལ་ཆེན་པོ་མཐོང་བཞིན་འདུག འདི་ལོ་ལྟ་བུར་མཚོན་ན་ཡུ་རོབ་སྤྱི་མཐུན་ཚོགས་པའི་མང་གཙོ་དང་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལོ་འཁོར་སྙན་ཐོའི་ནང་བོད་ནང་གི་འགྲོ་བ་མིའི་ཐོབ་ཐང་ཐོག་དོ་སྣང་གཙོ་འདོན་གནང་དགོས། གང་ཡིན་བརྗོད་ན། བོད་མི་ཚོས་རང་གི་ཆོས་དང་རིག་གཞུང་། ངོ་བོ་སྲུང་སྐྱོབ་བྱ་རྒྱུའི་ཐོབ་ཐང་རྩོད་བཞིན་ཡོད་ཀྱང། རྒྱ་ནག་གཞུང་གིས་བོད་མི་ཚོའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད། བོད་མི་ཚོའི་ཛ་དྲག་གནས་སྟངས་དེར་གཞིགས་ཏེ་ཡུ་རོབ་སྤྱི་མཐུན་ཚོགས་པས་བོད་དོན་དམིགས་བསལ་འབྲེལ་འཐུད་པ་ཞིག་བསྐོ་གཞག་ཐོག་བོད་ནང་གི་གནས་སྟངས་ལ་ཐག་ཉེ་པོའི་ཐོག་ནས་གཟིགས་དགོས། ཞེས་གསུངས་ཡོད། སྤྱིར་སྐུ་ཞབས་ལིའོ་ནི་ཌ་སི་ཌོན་སི་ཀི་ Mr Leonidas Donskis མཆོག་ནི་རྒྱལ་ཁབ་ལུ་ཐེ་ནི་ཡ་ Lithuania ནས་ཡིན་འདུག་པ་བཅས།།
