ཕྱི་ལོ་ ༢༠༠༩ ཟླ་ ༣ ཚེས་ ༣༠ རེས་གཟའ་ཟླ་བ།
༄༅། །སྔ་འགྱུར་བསྟན་པའི་སྲོལ་བྱེད་སྐྱབས་རྗེ་གྲུབ་དབང་པདྨ་ནོར་བུ་རིན་པོ་ཆེ་མཆོག་ཕྱི་ལོ་ ༢༠༠༩ ཕྱི་ཟླ་ ༣ ཚེས་ ༢༧ ཕྱི་དྲོ་ཆུ་ཚོད་ ༨།༣༠ དགོངས་པ་ཆོས་དབྱིངས་སུ་ཐིམ་པའི་ཡིད་སྐྱོའི་གནས་ཚུལ་བྱུང་འདུག རྒྱལ་བ་དཔལ་ཡུལ་པའི་གདན་རབས་བཅུ་གཅིག་པ་སྐྱབས་རྗེ་གྲུབ་དབང་པདྨ་ནོར་བུ་རིན་པོ་ཆེ་མཆོག་ནི། རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས། གནས་མཆོག་སྤོ་བོ་སྟོད་ཀྱི་ཕྱོགས་ཤིག་ན། རིན་ཆེན་བྲག་རི་ལྷུན་སྟུག་མཛེས་པའི་རྩར། ལྗོན་ཤིང་སྣ་ཚོགས་མཚོ་དང་ལྡེང་ཀས་རྒྱན། བསིལ་ལྡན་ཆུ་བོ་ལྷུན་པོ་ལྷོ་ནས་འདྲེན། ཐབས་ཤེས་བསོད་ནམས་སྐྱིད་ཀྱི་མིང་ཅན་ལ། རིགས་ལྡན་ཁྱིའུ་ཆུང་ཆུ་སྤྲེལ་ལོ་པ་འབྱུང་། བསྟན་འགྲོར་སྨན་པའི་དགེ་མཚན་བཟང་པོ་ཤར། ཞེས་ལུང་བསྟན་པ་བཞིན་རབ་བྱུང་བཅུ་དྲུག་པའི་ཆུ་སྤྲེལ་ཕྱི་ལོ་ ༡༩༣༢ རྒྱལ་ཟླ་བར་ཁམས་སྤོ་བོའི་ཡུལ་དུ་ཡབ་བསོད་ནམས་འགྱུར་མེད་དང་། ཡུམ་འཛོམས་སྐྱིད་གཉིས་ཀྱི་སྲས་སུ་སྐུ་འཁྲུངས། དགུང་གྲངས་ལྔ་ལ་དཔལ་ཡུལ་གདན་སར་གདན་དྲངས་ཏེ་མཁན་ཆེན་ངག་གི་དབང་པོའི་དྲུང་དུ་དབུ་སྐྲ་གཙུག་ཕུད་ཕུལ། ༡༩༤༣ ལོར་ཁྲི་གསོལ་ཞུས་ཏེ་མཆོག་སྤྲུལ་རིན་པོ་ཆེ་ཆོས་ཀྱི་ཟླ་བ་ལས་དགེ་ཚུལ་སློང་གི་བསླབ་ཚིགས་རིམ་ཅན་དུ་མནོས་ཏེ་མདོ་སྔགས་རིག་གནས་དང་བཅས་པར་གསན་བསམ་དཔྱིས་ཕྱིན་པ་མཛད། ༡༩༥༥ ལོར་དབུས་ཕྱོགས་སུ་ཕེབས་ཏེ་བསམ་ཡས་དང་རྡོར་སྨིན་སོགས་ལ་གནས་མཇལ་དང་། སླར་གདན་སར་ཕེབས་ཏེ་ཆོས་འཁོར་རྒྱ་ཆེ་སྐོར། བོད་ནང་རྒྱ་གཞུང་ནས་བཙན་འཛུན་བྱས་རྐྱེན་ ༡༩༦༠ ལོར་རྒྱ་གར་ཤར་ཕྱོགས་བྷ་ལིང་པུར་དུ་ཞབས་སོར་འཁོད། ༡༩༦༣ ལོར་རྒྱ་གར་ལྷོ་ཕྱོགས་མེ་སོར་སྦེལ་ཀོབ་ཏུ་ཐེག་ཆེན་རྣམ་གྲོལ་བཤད་སྒྲུབ་དར་རྒྱས་གླིང་རྨང་གཞི་བཏིང་སྟེ་དམ་པ་ཁོང་ནས་ཨར་ལས་ཀྱི་ལས་ལ་བཞུགས་ཏེ་ཕྱག་གས་པ་སོགས་སྐུ་ངལ་དུ་མ་འཕྲད་ཀྱང་ཐུགས་ངལ་ཁྱད་བསད་ཀྱིས་འདུལ་བ་གཞི་གསུམ་གྱི་ཕྱག་ལེན་དང་སྒྲུབ་མཆོད་ཁག་གི་ཕྱག་ལེན་རྣམས་མི་ཉམས་རྒྱུན་འཛིན་གནང་བ་སོགས་ཀྱི་མཛད་པ་རྒྱ་ཆེ་བསྐྱངས། སྐྱེས་ཆེན་དམ་པ་ཁོང་ནས་ཐེག་མཆོག་རྣམ་གྲོལ་བཤད་སྒྲུབ་གླིང་དགོན་པར་བོད་མིའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུས་སྐྱེས་མཆོག་དུ་མ་གདན་ཞུས་ཀྱི་དབང་ཁྲིད་ལུང་མན་ངག་སོགས་རྒྱ་ཆེ་ཁྱབ་སྤེལ་གྱིས་ཐུགས་འགན་རྒྱ་ཆེ་བཞེས། དེ་བཞིན་དམ་པ་ཁོང་ནས་རྒས་གཅོང་རྣམས་ཀྱི་ཆེད་རྒས་གསོ་ཁང་དང་། སྨན་ཁང་། གཞིས་མི་དཔལ་འབྱོར་གྱི་དཀའ་ངལ་འཕྲད་རིགས་ཁག་ནས་བདེ་སྡུག་ཞུས་འཕྲལ་ཕྱག་དངུལ་སོགས་གསོལ་སྩལ་གནང་བ་སོགས་མཛད་འཕྲིན་གྒའི་ཀླུང་གི་བྱེ་སྙེད་ལས་ས་བཅད་མ་སྟོང་ཙམ་བརྗོད་པར་སྙམ།
སྐྱེས་ཆེན་དམ་པ་ཁོང་ནས་རྒྱལ་བསྟན་སྤྱི་དང་བྱེ་བྲག་ཏུ་དཔལ་གསང་ཆེན་སྔ་འགྱུར་བསྟན་པའི་ནམ་མཁར་ལྷག་བསམ་གྱི་ཆ་ཤས་ཡོངས་སུ་རྫོགས་པའི་ཟླ་གཞོན་དུ་གྱུར་སྟབས་སྔ་འགྱུར་བ་སྤྱི་ནས་གསོལ་བ་བཏབ་པ་བཞིན་ ༡༩༩༣ ནས་ལོ་བརྒྱད་རིང་སྔ་འགྱུར་རྙིང་མའི་དབུ་འཛིན་གྱིས་ཐུགས་འགན་བཞེས་པ་སོགས་བསྟན་འགྲོར་སྨིན་པའི་མཛད་འཕྲིན་བླ་ན་མེད་པ་བསྐྱངས་ཡོད། དམ་པ་ཁོང་དགུང་གྲངས་ ༧༧ ཐོག་དགོངས་པ་ཆོས་དབྱིངས་སུ་ཐིམ་པའི་ཡིད་སྐྱོའི་གནས་ཚུལ་དཔལ་ལྡན་བཀའ་ཤག་ནས་གསན་ཕྲལ་ཐུགས་ཕམ་ཆེན་པོས་དབུས་སྲི་ཞུའི་ལས་བྱེད་རྣམས་ཕྱེད་ཡོལ་ཆུ་ཚོད་ ༢ པ་ནས་ ༣ པ་བར་གངས་སྐྱིད་ལས་བྱེད་གསོལ་ཐབ་ཡང་སྟེང་ཚོགས་ཁང་དུ་ཚང་འཛོམས་ཀྱིས་སྨོན་ལམ་གསུང་འདོན་གནང་རྗེས་མྱ་ངན་དང་གུས་འདུད་མཚོན་ཆེད་དབུས་ལས་ཁུངས་ཁག་སྒོ་བརྒྱབ་པ་བཅས་ཀྱི་གནས་བསྡུས་སུ།
