༢༠༡༢ ཟླ་ ༡༢ ཚེས་ ༡༡ རེས་གཟའ་མིག་དམར།
༄༅། །འདི་གའི་ཆེད་གཉེར་གསར་འགོད་པ་སྒྲུབ་བརྒྱུད་ཉི་མས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡༢ ཚེས་ ༨ ཉིན་སྔ་དྲོ་ ༨།༣༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸རྒྱལ་བའི་ཕོ་བྲང་ནས་བློ་གསལ་གླིང་གཙུག་ལག་ཁང་དུ་ཆིབས་སྒྱུར་སྐབས་མཆོག་སྤྲུལ་གླིང་རིན་པོ་ཆེའི་སྐུ་ཚབ་དང་། དགའ་ལྡན་ཤར་རྩེའི་མཁན་པོ་བྱང་ཆུབ་ཆོས་ལྡན་མཆོག་བཅས་ཀྱི་སྤྱན་རྒྱ་སྤོས་སྣེས་སྔོན་བསུས་ཏེ་ཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་ལམ་རིམ་བླ་མ་རྒྱུད་པའི་གསོལ་འདེབས་ཁག་གསུང་འདོན་གྲུབ་མཚམས།
བྱང་རྩེ་ཆོས་རྗེ་བློ་བཟང་བསྟན་འཛིན་མཆོག་གིས་མཎྜལ་རྟེན་གསུམ་འདེགས་འབུལ་ཞུས་རྗེས་༸གོང་ས་མཆོག་གིས་བཀའ་སློབ་ཕེབས་དོན། བོད་གངས་ཅན་ལྗོངས་ལ་ང་ཚོས་ནམ་རྒྱུན་འཇམ་དབྱངས་རྣམ་གསུམ་ཞེས་ཀུན་མཁྱེན་ཀློང་ཆེན་དང་ས་པཎ། རྗེ་རིན་པོ་ཆེ་གསུམ་ལ་བརྗོད་པའི་ནང་ནས་འཇམ་མགོན་བླ་མ་ཙོང་ཁ་པ་ཞེས་ཡོངས་གྲགས་ཞིག་ཆགས་ཡོད། དངོས་འབྲེལ་ཀྱི་མཁས་གྲུབ་གཉིས་ལྡན་གྱི་རྗེ་རིན་པོ་ཆེ་མཆོག་དབུས་ལ་ཕེབས། རབ་ཏུ་བྱུང་སྟེ་གསང་ཕུ་དང་སྙེ་ཐང་བདེ་བ་ཅན་སོགས་ཀྱི་བཤད་གྲྭ་ཡོད་པ་དེ་ཚོར་སློབ་གཉེར་གནང་ཏེ་མཁས་པའི་ཕུལ་དུ་ཕྱིན་པ་དང་། དགུང་ལོ་ཉེར་ལྔའི་སྟེང་ལེགས་བཤད་གསེར་ཕྲེང་ལྗགས་རྩོམ་མཛད་ཡོད། ཅེས་སོགས་དགའ་ལྡན་ལྔ་མཆོད་དུས་ཆེན་དང་འབྲེལ་རྗེ་རིན་པོ་ཆེའི་སྐུ་གསུང་ཐུགས་ཀྱི་ཡོན་ཏན་འཕྲིན་ལས་ཀྱི་ཆེ་བ་བརྗོད་པའི་སྒོ་ནས་རྗེའི་གསང་བའི་རྣམ་ཐར་དང་།
དཔལ་ལྡན་ས་གསུམ་མ། ལེགས་བྲིས་མ་བཅས་གསུང་འདོན་གྱི་ཆོས་འབྲེལ་སྩལ་གནང་མཛད་ཡོད། དེ་བཞིན་ཕྱི་དྲོའི་ཆོས་ཐུན་མ་གྲོལ་མཚམས་སུ་༸གོང་ས་མཆོག་གིས་བླ་མ་མཆོད་པའི་ཆོ་ག་དང་འབྲེལ་བའི་འབུམ་ཚོགས་རྒྱས་པ་ཞིག་དབུ་འཛུགས་རྗེས་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་རྗེ་རྣམ་གཉིས་མཆོག གདནས་ས་ཁག་གི་མཁན་བླ་སྤྲུལ། དགེ་བཙུན་འདུས་མང་བཅས་མཉམ་ཞུགས་ཀྱིས་༸གོང་ས་མཆོག་གི་སྐུ་ཚེ་མཛད་འཕྲིན་རྒྱས་པ་དང་། བོད་བསྟན་སྲིད་ཀྱི་སླད་དུ་གཅེས་པའི་ལུས་སྲོག་བཏང་བའི་རྒྱལ་གཅེས་པ་ཕོ་མོ་རྣམས་ཀྱི་ཆེད་བསྔོ་བ་སྨོན་ལམ་རྒྱ་ཆེ་ཞིག་གནང་བ་བཅས།། དེ་བཞིན་དགའ་ལྡན་ལྔ་མཆོད་ནི་ཕྱི་ལོ་ ༡༤༡༩ བོད་ཟླ་ ༡༠ ཚེས་ ༢༥ ཉིན་དགའ་ལྡན་དགོན་དུ་རྗེ་ཙོང་པ་ཆེན་པོ་སྐུ་གཤེགས་རྗེས་ལོ་དེའི་ཕྱི་ལོ་ནས་རྡོ་རྗེ་སློབ་དཔོན་བརྒྱ་ཕྲག་མང་པོས་དཀྱིལ་འཁོར་ལ་བརྟེན་པའི་སྒྲུབ་མཆོད་སོགས་དགོངས་རྫོགས་མཆོད་འབུལ་རྒྱ་ཆེ་མཛད་པ་ལ་བརྟེན་རྒྱ་བོད་ཧོར་སོགས་དད་ལྡན་པ་རྣམས་ཀྱིས་དགོངས་རྫོགས་མཆོད་སྤྲིན་ཁང་པའི་ཡང་སྟེང་དུ་མར་མེའི་མཆོད་པ་འབུལ་སྲོལ་དར་འདུག་པ་བཅས།།
