ཕྱི་ལོ་ ༢༠༠༩ ཟླ་ ༣ ཚེས་ ༢༧ རེས་གཟའ་ཕུར་བུ།
ནང་སྲིད་དྲུང་ཚབ་ནས་མེ་སྐྱོན་བྱུང་སའི་ས་གནས་ཀྱི་གནས་སྟངས་ཁག་གསལ་བཤད་གནང་བ།
དྲི་བ། ཨན་རྡར་མངའ་ཁུལ་གྱི་ཧ་ནམ་ཀོན་ཌཱ་ས་གནས་སུ་བོད་རིགས་དགུན་ཚོང་རྒྱག་མཁན་གྱི་ཁྲོམ་སར་མེ་སྐྱོན་གྱིས་གོད་ཆག་བྱུང་སྐབས་རང་གཞུང་ནང་སྲིད་ལས་ཁུངས་ནས་ཆེད་སྐྱོད་ཀྱི་སྐུ་ཚབ་སུ་ཞིག་བཏང་ཡོད་པ་དང་སྐབས་དེར་གུན་གསོའི་མཐུན་རྐྱེན་གང་དང་གང་སྦྱར་ཡོད་དམ།
ལན། རྒྱ་གར་ཨན་རྡར་མངའ་ཁུལ་གྱི་ཧ་ནམ་ཀོན་ཌཱ་ས་གནས་སུ་ཕྱི་ལོ་ ༢༠༠༩ ཕྱི་ཟླ་ ༡ ཚེས་ ༡ ཉིན་གྱི་མཚན་དཀྱིལ་ཆུ་ཚོད་ ༡ པོའི་གཡས་གཡོན་ཙམ་ལ་ཁྲོམ་ས་ཉི་ཤུ་ཙམ་ལ་མེ་སྐྱོན་བྱུང་འདུག ཡིན་ནའང་ཟུར་གྱི་ཁྲོམ་ས་གཅིག་རྒྱ་གར་ཉེན་རྟོག་པས་ཅ་དངོས་ཡོངས་རྫོགས་ཕྱིར་བཏོན་བྱས་སྟབས་རྒྱུ་དངོས་ལ་གོད་ཆག་བྱུང་མིན་འདུག དུད་ཚང་བཅུ་གསུམ་ཡོད་པའི་ནང་ནས་བདེ་སྐྱིད་སླར་གསོ་ནས་དུད་ཚང་དྲུག་དང་། ལུག་བསམ་ནས་དྲུག རང་ཝང་ལ་ནས་གཅིག་བཅས་རེད་འདུག ཡིན་ནའང་དུད་ཚང་བཅུ་གསུམ་ཡོད་ཀྱང་ཁྲོམ་ས་དེ་ལས་མང་བ་བཙུགས་ཡོད། རྒྱུ་མཚན་ནི། ཟླ་ཤས་ཀྱི་ཚོང་དུས་སྐབས་ཚོང་གི་རྒྱུགས་ཚད་ལ་བརྟེན་ནས་ཁྲོམ་ས་མང་བ་བཙུགས་ཡོད་པ་རེད། མེ་སྐྱོན་བྱུང་བའི་རྐྱེན་རྩ་ནི་ཁྲོམ་སའི་ཉེ་འཁྲིས་སུ་རྒྱ་གར་སྤྱི་སྤྱོད་རླངས་འཁོར་འཛོམས་ས་ཤིག་ཆགས་ཡོད་རྐྱེན་སྤྱི་སྤྱོད་རླངས་འཁོར་གྱི་ཁ་ལོ་བ་དང་སྦྱིན་བདག་དབར་མི་མཐུན་པའི་རྩོད་རྙོག་བྱུང་རྐྱེན་རླངས་འཁོར་གསུམ་ཙམ་ལ་མེ་སྤར་སྟབས་དེའི་མེ་ཤུགས་ཁྲོམ་སར་འཁྱུད་ཡོད་ཚོད་འདུག ཡིན་ནའང་བོད་མིའི་ཁྲོམ་སར་མེ་སྐྱོན་བྱུང་ཡོད་ཀྱང་སྤྱི་སྤྱོད་རླངས་འཁོར་གྱི་སྦྱིན་བདག་དང་ལས་མིའི་དབར་རྩོད་གཞི་ཞི་ཐབས་མེད་པར་སྔོན་ལྟར་གནས་ཡོད་པ་རེད་འདུག ང་ཚོ་བོད་པའི་ཁྲོམ་སར་བྱུང་བའི་མེ་སྐྱོན་གྱི་གོད་ཆག་དེ་ནི་དེ་ནས་བྱུང་བ་རེད་ཅེས་ཁུངས་རྟགས་འཕེར་བ་གང་ཡང་བྱེད་རྒྱུ་མེད་སྟབས་དོགས་གཞིའི་གནས་ཚུལ་ཐུག་ས་དེ་འདྲ་ཞིག་ཡིན་འདུག
སྤྱིར་བཏང་ས་གནས་དང་འབྲེལ་ཡོད་ལྷོ་སྤྱི་ཆགས་ཡོད་པས་སྐུ་ཚབ་ཆེད་གཏོང་གནང་འཆར་ཡོད་ཀྱང་སྐབས་དེ་དུས་༸གོང་ས་མཆོག་ཆིབས་སྒྱུར་གྱི་སྐབས་འཁེལ་སྟབས་བདེ་སྐྱིད་སླར་གསོའི་ས་གནས་འགོ་འཛིན་ཕྱི་ཚེས་ ༡༠ ཉིན་མེ་སྐྱོན་བྱུང་སའི་ས་གནས་དུ་ཆེད་ཕེེབས་གནང་བ་དང་སྦྲགས་ཁྲོམ་སར་གོད་ཆག་བྱུང་བའི་གྱོང་གུན་ཁག་རོབ་རྩིས་གནང་བ་དང་། དེ་རྗེས་དོས་ཁང་གི་ནང་ཡོད་ཚོང་ཟོག་ལ་ཞིབ་འཇུག་གིས་ཚོང་འགྲེམས་སྐབས་མེ་སྐྱོན་སྐབས་བེད་མེད་དུ་ག་ཚོད་གྱུར་ཡོད་མེད་དང་། ཚོང་འགྲེམས་བྱས་ཏེ་ལག་དངུལ་ག་ཚོད་བྱུང་བ་བཅས་རྩིས་ཕྱོགས་བསྡོམས་སྐབས་ཧིན་སྒོར་འབུམ་བཞི་བཅུ་ཞེ་ལྔ་མིན་ཙམ་གྱི་གྱོང་གུན་ཕོག་ཡོད་འདུག དེ་ནས་རྒྱ་གར་མངའ་གཞུང་གི་དཔོན་རིགས་ཐུག་འཕྲད་དུ་འཐུས་མི་དང་ས་གནས་འགོ་འཛིན་བཅས་ཆེད་མངགས་བཅར་ཏེ་མེ་སྐྱོན་བྱུང་བའི་གནས་སྟངས་བཅས་སྙན་སེང་ཆ་ཚང་ཞུས་འདུག ང་ཚོས་མེ་སྐྱོན་གྱིས་གོད་ཆག་བྱུང་བའི་ཁྲོམ་ས་ཁག་ལ་ཐད་ཀར་གུན་གསབ་ཕུལ་རྒྱུ་དཀའ་ཡང་། ཞིབ་འཇུག་བྱས་ཏེ་གྱོང་གུན་ལ་གཞིགས་པའི་གུན་གསལ་སྔར་རྒྱུན་གནང་ལམ་བཞིན་ཧིན་སྒོར་འབུམ་གཅིག་དང་སྟོང་ཕྲག་བཅུ་བདུན་ཕུལ་བ་དང་། དེ་ནས་ཁོ་རང་ཚོས་ཀྱང་ས་གནས་གང་སར་སློང་བརྒྱབ་སྟེ་ཧིན་སྒོར་འབུམ་བཞི་ཙམ་བྱུང་འདུག དེ་ནས་བཀའ་དྲུང་ཡིག་ཚང་དུ་ཁོང་ཚོའི་འཐུས་མི་བཅར་སྟེ་སྒོར་སྟོང་ཕྲག་ལྔ་དང་། རྡ་སའི་ཁུལ་དུ་སློང་བརྒྱབ་སྟེ་སྒོར་སྟོང་ཕྲག་བདུན་བཅུ་དོན་གཉིས་ཙམ། ཚུར་ཕུ་བླ་བྲང་ནས་ཧིན་སྒོར་ཁྲི་ལྔ། ས་སྐྱ་བདག་ཁྲི་རིན་པོ་ཆེའི་བླ་བྲང་ནས་ཧིན་སྒོར་ཁྲི་གཉིས། སྐུ་སྒེར་ཡིག་ཚང་ནས་ཧིན་སྒོར་འབུམ་བཅོ་ལྔ། གང་ལྟར་གྱོང་གུན་ཕོག་པ་ཧིན་སྒོར་འབུམ་བཞི་བཅུ་ཞེ་ལྔ་ནས་ཧིན་སྒོར་འབུམ་ཉི་ཤུ་རྩ་གཉིས་ཙམ་ཞལ་འདེབས་བྱུང་འདུག
རྒྱ་གར་ཨན་རྡར་མངའ་ཁུལ་གྱི་ཧ་ནམ་ཀོན་ཌཱ་ས་གནས་སུ་བོད་རིགས་དགུན་ཚོང་རྒྱག་མཁན་གྱི་ཁྲོམ་སར་མེ་སྐྱོན་བྱུང་བའི་སྐབས་ཀྱི་འདྲ་དཔར།
དྲི་བ། གནས་ཚུལ་དེ་རིགས་ལོ་ལྟར་བྱུང་སྐབས་རང་གཞུང་ནང་སྲིད་ལས་ཁུངས་ནས་ཁོང་ཚོའི་གུན་གསབ་ཐད་རོགས་སྐྱོར་གཅིག་མཚུངས་གནང་མུས་ལ་མི་མང་ནས་བསམ་ཚུལ་འདྲ་མིན་ཡོང་གི་ཡོད་དམ་མེད།
ལན། ད་ལྟ་བར་དུ་ནང་སྲིད་ལས་ཁུངས་སུ་བསམ་ཚུལ་དེ་རིགས་མ་བྱུང་། གྱོང་གུན་དེ་འབུམ་གྱི་གྲངས་ཀ་དང་སྟོང་ཕྲག་བདུན་བཅུ་ཙམ་གྱི་གྲངས་ཀ་ཡིན་དུས་ཚང་མར་ཆེ་ཆུང་ལ་མ་ལྟོས་པར་ སླེབས་ཀྱི་ཡོད། ང་ཚོས་འབུལ་རྒྱུ་དེ་ཁྲི་གཅིག་གཉིས་ཙམ་ཡིན་ན་ཉུང་བ་ཕུལ་དགོས་པ་དང་། དེར་བརྟེན་ཚང་མར་དངུལ་ཕོན་ཆེན་པོ་ཡིན་སྟབས་ཚོང་ཁང་གཉིས་ཀྱི་དབར་སྟོང་ཕྲག ༥༠ ནས་ ༦༠ བར་ཁྱད་འཕར་ཡོང་སྲིད་ཀྱང་། བརྒྱ་ཆར་རྩིས་ན་ང་ཚོས་མཐོ་ཚད་ལ་ཁྲི་གཅིག་ཡིན་སྟབས་དེ་ཙམ་གྱི་བར་ཁྱད་མེད། དེར་བརྟེན་ནང་སྲིད་ལས་ཁུངས་སུ་གུན་གསབ་གཅིག་མཚུངས་མེད་པའི་གནས་ཚུལ་ཞུ་མཁན་གང་ཡང་མིན་འདུག ཡིན་ནའང་ང་ཚོས་འདི་ནས་གུན་གསབ་ཕུལ་སྐབས་གནས་བབ་ལ་བལྟས་ཏེ་འགའ་ཤས་ལ་ཁྲི་ཆ་ཚང་ཕུལ་དགོས་པ་དང་། ཡང་འགའ་ཤས་ལ་བརྒྱ་ཉི་བརྒྱ་བཅག་ནས་ཕུལ་དགོས་པ་དེ་འདྲ་ཡང་ཡོད། སྐབས་དེ་དུས་ཀྱི་གནས་སྟངས་ལ་གཞིགས་ཏེ་ཕུལ་གྱི་ཡོད། འོན་ཀྱང་ཁྲོམ་ས་འགའ་ཤས་ལ་ང་ཚོས་ཁྲོམ་སའི་གྲངས་ཀར་གཞིར་བཟུང་ཕུལ་ཡོད་ཀྱང་ཁོང་ཚོས་ནང་ལོག་ཏུ་གཅིག་མཚུངས་བགོ་བཤའ་རྒྱག་མཁན་དེ་འདྲ་བྱུང་འདུག ས་གནས་སོ་སོར་སྐྱིད་སྡུག་དང་ཚོགས་པ་ཡོད་སྟབས་ཚོགས་པ་སོ་སོས་འགན་ཁུར་ཏེ་གཞུང་དང་། རོགས་ཚོགས། བོད་པའི་སྤྱི་ཚོགས་བཅས་ནས་བྱུང་བའི་ཞལ་འདེབས་ཁག་དང་། དེ་བཞིན་ཚོགས་པ་ཁག་ནས་བྱུང་བའི་དངུལ་འབོར་བསྡོམས་པའི་གྱོང་གུན་བྱུང་བའི་བརྒྱ་ཆར་གཞིགས་ཏེ་བགོ་བཤའ་རྒྱག་པ་དེ་འདྲ་ཡང་བྱེད་ཀྱི་ཡོད་པ་རེད། འགའ་ཤས་ནས་ཁྲོམ་སར་མེ་སྐྱོན་བྱུང་སྟེ་ཟླ་བ་གསུམ་ཙམ་རིང་ཚོང་ཁང་འགའ་ཤས་སྒོ་ཕྱེ་སྟེ་དེའི་ཁེ་བཟང་གང་བྱུང་བ་བགོ་བཤའ་རྒྱག་གི་འདུག བགོ་བཤའ་རྒྱག་སྐབས་གྱོང་གུན་ལ་གཞིགས་པའི་ཐག་ཆོད་རིགས་ས་གནས་ས་ཐོག་རང་ནས་གནང་བ་དེར་དམིགས་བསལ་ནང་སྲིད་ནས་ཐེ་བྱུས་བྱེད་རྒྱུ་གང་ཡང་ཡོད་པ་མ་རེད།
དྲི་བ། བོད་མི་དགུན་ཚོང་བའི་ཁྲོམ་སར་སླད་ཕྱིན་མེེ་སྐྱོན་དེ་ལྟར་མི་ཡོང་བའི་སྔོན་འགོག་ཆེད་རང་གཞུང་ནང་སྲིད་ལས་ཁུངས་ནས་ལམ་སྟོན་གང་གནང་འཆར་ཡོད་དམ།
ལན། དམིགས་བསལ་གྱི་ལམ་སྟོན་འདི་དང་དེ་ཡིན་ཞེས་ཞུ་རྒྱུ་གང་ཡང་མེད། འོན་ཀྱང་སྤྱི་ཡོངས་ཀྱི་གནས་ཚུལ་ལ་བལྟས་ན་སླད་བོད་མི་བལ་གོས་ཚོང་འགྲེམས་བྱེད་དགོས་ཀྱི་ཡོད། དེར་བརྟེན་ཚོང་པ་སོ་སོའི་ངོས་ནས་ཁྲོམ་ས་ཆེ་ཆུང་ལ་མ་ལྟོས་པར་གློག་གི་བདེ་འཇགས་ཐད་དོ་སྣང་བྱེད་རྒྱུ་ཧ་ཅང་གལ་ཆེན་པོ་མཐོང་བྱུང་། ལྷག་པར་དུ་དེང་དུས་ཀྱི་མེ་གསོད་སྔོན་འགོག་ཆེད་དུ་བ་སོགས་ལངས་སྐབས་སྐད་སྒྲ་ཐོན་མཁན་གློག་ཆས་སོགས་ཡོད་པ་དེ་རིགས་སྤྱི་པས་ཉོས་ན་ཐུབ་པ་ཡིན་ན་ཚོང་ཁང་རེ་གཉིས་ཙམ་མ་གཏོགས་སྐྱོབ་ཐུབ་རྒྱུའི་ནུས་པ་ཐོན་གྱི་རེད་བསམ་པ་དྲན་གྱི་འདུག དེ་བཞིན་ས་གན་སོ་སོར་ཡོད་པའི་མེ་གསོད་ལས་ཁུངས་ལ་འབྲེལ་བ་གནང་སྟེ་ལམ་སྟོན་ཞུ་ཐུབ་པ་ཡིན་ན་མེ་སྐྱོན་ལ་སྔོན་འགོག་ཐུབ་པའི་ཁྱད་པར་ཡོང་སྲིད། ཅེས་འགྲེལ་བརྗོད་གནང་བའི་གནས་བསྡུས་སུ།
