༢༠༡༢ ཟླ་ ༡༡ ཚེས་ ༡༤ རེས་གཟའ་ལྷག་པ།

དེ་སྔའི་ཉི་ཧོང་གི་སྲིད་བློན་དང་ད་ལྟའི་ཕྱོགས་འགལ་ཚོགས་པའི་ཚོགས་གཙོ་སྐུ་ཞབས་ཤིན་ཛོ་ཨ་བྷི་མཆོག་གིས་༸གོང་ས་མཆོག་ལ་འཚམས་འདྲི་ཞུ་བཞིན་པ།

༄༅། །ཕྱི་ལོ་ ༢༠༡༢ ཟླ་ ༡༡ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོས་ཚོགས་སུ་ཆིབས་སྒྱུར་བསྐྱངས་ཏེ་གྲོས་ཚོགས་འཐུས་མི་རྣམས་ལ་འགྲོ་བ་མིའི་རིན་ཐང་དང་ཀུན་ཁྱབ་འགན་ཁུར་ (Human values and Universal Responsibilty) ཞེས་པའི་བརྗོད་གཞིའི་ཐོག་བཀའ་སློབ་སྩལ་ཡོད།
དེ་ཡང་༸གོང་ས་མཆོག་ཉི་ཧོང་གི་གྲོས་ཚོགས་སུ་ཆིབས་སྒྱུར་བསྐྱངས་སྐབས་ཡུན་རིང་ནས་བོད་དོན་རྒྱབ་སྐྱོར་གནང་མཁན་ཉི་ཧོང་གྲོས་ཚོགས་འཐུས་མི་སྐུ་ཞབས་སི་ཤུ་མ་ཀི་ནོ་ Seishu Makino ལགས་ཀྱིས་ཕེབས་བསུ་གཟབ་རྒྱས་ཞུས་པ་དང་ལྷན་ཉི་ཧོང་གི་གྲོས་ཚོགས་འཐུས་མི་རྣམས་ཀྱིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་བཀའ་སློབ་གསན་རྒྱུར་འདོད་བློ་ཤུགས་ཆེ་ཡོད་ཅེས་ཞུས་ཡོད། དེ་རྗེས་སྲིད་བློན་ཟུར་པ་དང་ད་ལྟའི་ཕྱོགས་འགལ་ཚོགས་པའི་ཚོགས་གཙོ་ཤིན་ཛོ་ཨ་བྷི་( Shinzo Abe) མཆོག་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་འདི་གའི་གྲོས་ཚོགས་འཐུས་མི་

བོད་དོན་རྒྱབ་སྐྱོར་བ་ཉི་ཧོང་གྲོས་ཚོགས་འཐུས་མི་སྐུ་ ཞབས་སི་ཤུ་མ་ཀི་ནོ་ལགས་ཀྱིས་འཚམས་འདྲིའི་གསུང་བཤད་གནང་བཞིན་པ།

ཡོངས་ཀྱི་ཚབ་ཞུས་ཏེ་འཚམས་འདྲི་ཞུས་པ་དང་སྦྲགས་མགོན་པོ་གང་ཉིད་མཆོག་གྲོས་ཚོགས་སུ་ཆིབས་སྒྱུར་བསྐྱངས་པར་ཐུགས་རྗེ་བཀའ་དྲིན་ཆེ་ཞེས་ཞུས་ཡོད། དེ་བཞིན་ཉི་ཧོང་གི་ཆབ་སྲིད་ཚོགས་པ་འདྲ་མིན་གྱི་གྲོས་ཚོགས་འཐུས་མི་ ༡༥༠ བརྒལ་བས་བོད་ཀྱི་གནད་དོན་ཐོག་རྒྱབ་སྐྱོར་ཞུ་རྒྱུའི་ཁས་ལེན་གནང་ཡོད་པ་མ་ཟད། རྒྱ་ནག་གཞུང་ཕྱོགས་ནས་བོད་མིའི་ཐོག་ཁྲིམས་འགལ་གྱི་དྲག་གནོན་བྱེད་རྒྱུ་དེ་འཕྲལ་དུ་མཚམས་འཇོག་བྱེད་དགོས་པའི་འབོད་སྐུལ་སོགས་འཁོད་པའི་བསྒྲགས་གཏམ་ཞིག་སྤེལ་ཡོད་པ་དེ་མགོན་པོ་གང་ཉིད་མཆོག་གི་སྐུ་མདུན་དུ་སྙན་སྒྲོན་ཞུས་ཡོད།

དེ་ཡང་བསྒྲགས་གཏམ་དེའི་ནང་འཁོད་དོན། རྒྱ་ནག་གཞུང་གིས་ཡང་ང་སྙིང་རྗེ་མེད་པའི་ཐོག་བོད་ནང་གི་བོད་མི་རྣམས་ཀྱི་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་བཞིན་ཡོད། རྒྱ་ནག་གཞུང་གིས་བོད་མི་རྣམས་ཀྱི་ཆོས་དང་རིག་གཞུང་སོགས་ཀྱི་རང་དབང་ཐོག་དམ་བསྒྲགས་བྱེད་བཞིན་ཡོད་པ་མ་ཟད། བོད་མི་ཞི་རྒོལ་བྱེད་མཁན་རྣམས་ཀྱི་སྟེང་དྲག་གཅོད་ཚད་ལས་བརྒལ་བ་བྱེད་བཞིན་ཡོད། འདི་ལྟ་བུའི་རྒྱ་ནག་གཞུང་གི་དྲག་གནོན་ཅན་གྱི་སྲིད་བྱུས་ལ་ཞི་རྒོལ་ཆེད་བོད་མི་མང་པོ་ཞིག་གིས་རང་ལུས་མེར་སྲེག་བཏང་ཡོད། འོན་ཀྱང་རྒྱ་ནག་གཞུང་གིས་བོད་མི་རྣམས་ཀྱི་དཀའ་སྡུག་ལ་བསམ་ཤེས་བྱེད་ཀྱི་མེད་པ་མ་ཟད། བོད་ཀྱི་གནད་དོན་དེ་ཞི་བའི་ལམ་ནས་སེལ་ཆེད་གྲོས་མོལ་མུ་མཐུད་དགོས་པའི་བོད་མིའི་སྒྲིག་འཛུགས་ཀྱི་རེ་འདུན་ལ་ཡ་ལན་ཡང་བྱས་མེད། ང་ཚོས་རྒྱ་ནག་གཞུང་ལ་བོད་མི་རྣམས་ཀྱི་འགྲོ་བ་མིའི་ཐོབ་ཐང་ཐོག་ཁྲིམས་འགལ་གྱི་དྲག་གནོན་བྱེད་རྒྱུ་འཕྲལ་དུ་མཚམས་འཇོག་དང་བོད་ནང་གི་ཛ་དྲག་གནས་སྟངས་དེ་ཡར་རྒྱས་གཏོང་དགོས་པའི་འབོད་སྐུལ་ཤུགས་ཆེ་གནང་རྒྱུ་ཡིན། ང་ཚོའི་བརྡ་ལན་འདི་རྒྱལ་སྤྱིའི་སྤྱི་ཚོགས་ནང་ཐེ་ཚོམ་མེད་པའི་ཐོག་ཁྱབ་སྤེལ་བྱེད་རྒྱུར་གྲ་སྒྲིག་ཡོད། ཅེས་སོགས་འཁོད་ཡོད།

སྐབས་དེར་༸གོང་ས་མཆོག་གིས་ཐོག་མར་འགྲོ་བ་མིའི་རིན་ཐང་གོང་མཐོར་གཏོང་རྒྱུ་དང་ཆོས་ལུགས་ཕན་ཚུན་དབར་མཐུན་སྒྲིལ་གོང་འཕེལ་གཏོང་རྒྱུ་བཅས་སྐུའི་རླབས་ཆེན་མཛད་ཁུར་གཉིས་ཀྱི་སྐོར་བཀའ་སློབ་སྩལ་ཡོད་པ་མ་ཟད། མགོན་པོ་གང་ཉིད་མཆོག་གིས་བོད་ནང་གཅིག་མཇུག་གཉིས་མཐུད་རང་ལུས་མེར་སྲེག་གི་དོན་རྐྱེན་བྱུང་བཞིན་པ་དེར་ཐུགས་ཕམ་དང་འབྲེལ། ཉི་ཧོང་གྲོས་ཚོགས་ཀྱི་འཐུས་མི་རྣམས་ལ་ཞུ་རྒྱུར། སྤྱིར་བོད་ཡོངས་དང་ལྷག་པར་དུ་བོད་མི་རང་ལུས་མེར་སྲེག་གི་དོན་རྐྱེན་བྱུང་བཞིན་པའི་ས་གནས་ཁག་ཏུ་ཆེད་མངགས་ཕེབས་དགོས་པའི་ཐུགས་རེ་འདོན་གནང་མཛད་ཡོད་པ་མ་ཟད། གལ་ཏེ་ཕྱིའི་ཡུལ་གྲུ་ཁག་གི་གྲོས་ཚོགས་ཀྱི་འཐུས་མི་རྣམས་ནས་བོད་ནང་གི་དོན་དམ་གནས་ཚུལ་གསལ་སྟོན་གནང་ན་བོད་མི་རང་ལུས་མེར་སྲེག་གི་གནས་ཚུལ་དེ་རྒྱ་ནག་གཞུང་གི་གཞི་ནས་ཤེས་རྟོགས་ཐུབ་རྒྱུ་ཡིན་སྐོར་དགོངས་ཀྱི་ཡོད་སྐོར་བཀའ་སློབ་སྩལ་ཡོད། བོད་ནང་གི་ས་གནས་ས་ཐོག་གི་མཐོང་རྒྱ་ཆུང་བའི་དམར་ཤོག་ལས་བྱེད་རྣམས་ནས་བོད་ཀྱི་ནང་པའི་ཆོས་ལ་ཞེད་སྣང་དང་། ལྷག་པར་དབུས་གཞུང་ལ་ས་གནས་ཀྱི་གནས་ཚུལ་སྙན་སེང་ཞུ་གི་མེད་པའི་རྐྱེན་གྱིས་རྒྱ་ནག་དབུས་གཞུང་གི་འགོ་ཁྲིད་རྣམས་ནས་བོད་མིའི་གནད་དོན་ཇི་ཙམ་གྱི་ཛ་དྲག་པོ་ཆགས་ཡོད་པ་ཤེས་རྟོགས་ཐུབ་ཀྱི་མེད་སྐོར་བཀའ་སློབ་སྩལ་ཡོད།
གོང་ཚེས་ཉིན་གྱི་ཕྱེད་ཡོལ་མགོན་པོ་གང་ཉིད་མཆོག་དེང་དུས་ཀྱི་ཚན་རིག་དང་ནང་པའི་ཚན་རིག་གི་བགྲོ་གླེང་ལྷན་ཚོགས་སུ་ཆིབས་སྒྱུར་བསྐྱངས་ཡོད་པ་བཅས།།