༢༠༡༢ ཟླ་ ༡༡ ཚེས་ ༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༢ ཟླ་ ༡༡ ཚེས་ ༧ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་སྐུ་ཞབས་བྷ་རཀ་ཨོ་བྷ་མ་མཆོག་སླར་ཡང་ཨ་རིའི་སྲིད་འཛིན་དུ་འདེམས་ཐོན་བྱུར་བར་འཚམས་འདྲིའི་གསུང་འཕྲིན་ཞིག་སྩལ་བའི་ནང་འཁོད་དོན།
སྐུ་ཉིད་མཆོག་ཨ་རིའི་སྲིད་འཛིན་དུ་སླར་ཡང་འོས་འདེམས་བྱུང་བར་ངོས་ཀྱི་དགའ་བསུའི་འཚམས་འདྲི་དང་བཀྲ་ཤིས་བདེ་ལེགས་ཞུ་རྒྱུ་ཡིན། སྐུ་ཉིད་མཆོག་ཕྱི་ལོ་ ༢༠༠༨ ལོར་ཨ་རིའི་སྲིད་འཛིན་དུ་ཐོག་མར་འདེམས་ཐོན་བྱུང་སྐབས། འཛམ་གླིང་ནང་འཕྲད་བཞིན་པའི་དཀའ་ངལ་རྣམས་ང་ཚོས་ཆིག་སྒྲིལ་གྱི་ནུས་པའི་ཐོག་ནས་གདོང་ལེན་བྱེད་དགོས་པའི་བློ་སྤོབས་བསྐྲུན་པ་ཙམ་མ་ཟད། དེ་ནས་བཟུང་ཨ་རིའི་མི་མང་གིས་སྐུ་ཉིད་མཆོག་ལ་ཡིད་ཆེས་བློ་འཁེལ་ཐོག་ནས་རེ་བ་བཅོལ་བ་དེ་དག་བསྒྲུབ་རྒྱུའི་ཆེད་འབད་བརྩོན་ཧུར་སྐྱེད་གནང་ཡོད། དེར་བརྟེན་མི་མང་རྣམས་ཀྱིས་སྐུ་ཉིད་མཆོག་གིས་དེ་ལྟ་བུའི་འབད་བརྩོན་གནང་བ་དེར་ངོས་འཛིན་གྱིས་ཐེངས་འདིར་སླར་ཡང་སྲིད་འཛིན་དུ་འོས་འདེམས་གནང་ཡོད།
སྐུ་ཉིད་མཆོག་གིས་ཐོག་མར་ཨ་རིའི་སྲིད་འཛིན་གྱི་ལས་ཁུར་བཞེས་སྐབས། འཛམ་གླིང་མི་མང་ཚོས་མང་གཙོའི་རིན་ཐང་སྲུང་སྐྱོབ་དང་མང་གཙོའི་འཆར་སྣང་རྒྱུན་གནས་ཐུབ་ཆེད་ཨ་རིས་སྣེ་ཁྲིད་ཐུབ་པའི་རེ་བ་ཧ་ཅང་བཅོལ་བཞིན་ཡོད་སྐོར་ངོས་ཀྱིས་སྐུ་ཉིད་མཆོག་ལ་གནས་འཕྲིན་ཞིག་ཕུལ་ཡོད་པའི་ནང་བཀོད་པ་དྲན་གྱི་འདུག དེར་བརྟེན་སྐུ་ཉིད་མཆོག་གིས་འཛམ་གླིང་ནང་དབུལ་ཕོངས་དང། དྲང་བདེན་མེད་པ་སོགས་ཀྱི་དཀའ་ངལ་འོག་མི་འབོར་ཐེར་འབུམ་མང་པོ་གནས་ཡོད་པ་དེ་དག་ཡིད་བཅངས་ཐོག་འཛམ་གླིང་ནང་ཞི་བདེ་སྔར་ལས་གོང་འཕེལ་གཏོང་ཐུབ་རྒྱུར་ངོས་ཀྱིས་རེ་བ་ཞུ་བཞིན་ཡོད། དཀའ་ངལ་དེ་དག་སེལ་རྒྱུ་ནི་ད་ལྟའི་དུས་སྐབས་ཀྱི་གནད་དོན་གལ་ཆེ་ཤོས་ཤིག་ཏུ་གྱུར་ཡོད།
སྐུ་ཉིད་མཆོག་གིས་མཁྱེན་གསལ་ལྟར་ངོས་ཀྱིས་བོད་མིའི་ཆབ་སྲིད་ཀྱི་དབང་ཆ་ཡོངས་རྫོགས་མི་མང་གིས་འོས་འདེམས་བྱས་པའི་ཆབ་སྲིད་དབུ་ཁྲིད་ལ་རྩིས་སྤྲོད་བྱས་ནས་ལོ་གཅིག་ཟིན་ནའང་ངོས་རང་ཡང་བོད་མི་ས་ཡ་དྲུག་གི་ཆ་ཤས་ཤིག་ཡི་སྟབས། སྐུ་ཉིད་མཆོག་ནས་འཚེ་མེད་ཞི་བའི་ཐོག་ནས་བོད་ཀྱི་གནད་དོན་སེལ་ཆེད་མུ་མཐུད་རྒྱབ་སྐྱོར་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་མ་ཟད། སྐུ་ཉིད་མཆོག་གིས་དབུ་མའི་ལམ་གྱི་ཐབས་ལམ་ལ་རྒྱབ་སྐྱོར་གནང་བར་རྗེས་སུ་ཡི་རང་ཞུ་རྒྱུ་ཡིན། ཐབས་ལམ་འདི་ནི་བོད་རྒྱ་གཉིས་སྨན་ཐོག་ནས་བོད་ཀྱི་གནད་དོན་སེལ་རྒྱུའི་ཐབས་ལམ་བཟང་ཤོས་ཡིན་པར་ངོས་ཀྱི་ད་དུང་ཡང་ངོས་འཛིན་བྱེད་བཞིན་ཡོད།
ད་ལྟ་བོད་ནང་གི་གནས་སྟངས་ཇེ་ཞེན་ཇེ་སྡུག་ཏུ་འགྲོ་བཞིན་པའི་མཚོན་རྟགས་སུ་བོད་མི་ཚོས་བསྟུད་མར་རང་ལུས་མེར་སྲེག་བཏང་བའི་དོན་རྐྱེན་བྱུང་དང་འབྱུང་བཞིན་པའི་ཛ་དྲག་གི་གནས་སྟངས་འདིའི་འོག སྐུ་ཉིད་མཆོག་གི་སྲིད་གཞུང་ནས་གཉིས་སྨན་གྱི་ཐབས་ལམ་དེར་མུ་མཐུད་རྒྱབ་སྐྱོར་གནང་ཐུབ་རྒྱུའི་རེ་བ་ཞུ་བཞིན་ཡོད། དེང་སྐབས་ངོས་རང་ཉི་ཧོང་ཁུལ་དུ་ཡོད་ཅིང་ངོས་ཀྱིས་སྐུ་ཉིད་མཆོག་གི་སྲིད་འཛིན་གྱི་ལས་དུས་གཉིས་པའི་སྐབས་ལས་དོན་གང་སྤྱིའི་ཐད་བྱ་བ་ལམ་ལྷོངས་ཡོང་བའི་སྨོན་འདུན་ཞུ་རྒྱུ་ཡིན། བཀྲ་ཤིས་བདེ་ལེགས། ཞེས་པའི་གསུང་འཕྲིན་སྩལ་ཡོད།
གསུང་འཕྲིན་ངོ་མ་དབྱིན་ཡིག་ནང་ཡོད་པ་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་དབྱིན་ཡིག་དེར་རྩ་འཛིན་ཡོང་བ་ཞུ།།
