ཕྱི་ལོ་ ༢༠༠༩ ཟླ་ ༣ ཚེས་ ༢༤ རེས་གཟའ་མིག་དམར།
༄༅། །འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ཕྱི་ལོ་ ༢༠༠༩ ཟླ་ ༣ ཚེས་ ༢༡ ཉིན་མགོ་ལོག་རྨ་ཆེན་རྫོང་ཁོངས་སུ་ཡོད་པའི་ར་རྒྱ་དགོན་པའི་དུས་འཁོར་གྲྭ་ཚང་གི་དགེ་འདུན་པ་རང་ལོ་ ༢༨ དུ་སོན་པའི་བཀྲིས་བཟང་པོ་ལགས་ཞུ་བ་ཞིག་རྨ་ཆུའི་ནང་མཆོངས་ཏེ་རང་སྲོག་བཅད་དགོས་བྱུང་བའི་གནས་ཚུལ་ཐོན་འདུག
གནས་ཚུལ་དེ་ཐོག་མའི་བྱུང་རྐྱེན་ནི་ཕྱི་ལོ་ ༢༠༠༩ ཟླ་ ༣ ཚེས་ ༡༠ ཉིན་ར་རྒྱ་དགོན་པའི་ཚོགས་ཆེན་འདུ་ཁང་སྟེང་གསུམ་བཅུའི་དུས་དྲན་དང་སྟབས་བསྟུན་བོད་ཀྱི་རྒྱལ་དར་སྒྲེང་འཛུགས་བྱས་པ་དང་ཡིག་ཆ་སབྱར་འགྲེམས་བྱས་པའི་གནས་ཚུལ་ཐོན་པ་ལྟར་རྫོང་ཉེན་རྟོག་པས་དགེ་འདུན་པ་བཀྲིས་བཟང་པོ་ལགས་ཀྱིས་གཙོས་དགེ་འདུན་པ་ཁག་གཅིག་འཛིན་བཟུང་གིས་ཚ་འདྲི་བྱས་ཡོད་པ་དང་། ཕྱི་ཚེས་ ༢༡ ཉིན་དགེ་འདུན་པ་བཀྲིས་བཟང་པོ་ལགས་ནས་ས་གནས་སྤྱི་བདེ་ཉེན་རྟོག་པར་བོད་ཀྱི་རྒྱལ་དར་སྒྲེང་འཛུགས་ཀྱིས་ལས་འགུལ་སྤེལ་མཁན་ང་རང་ཡིན་པས་ཁོང་ཚོ་གློད་བཀྲོལ་གཏོང་དགོས། ཞེས་བརྗོད་རྐྱེན་དགེ་འདུན་པ་གཞན་ཚོ་གློད་བཀྲོལ་བཏང་ཡོད་ཀྱང་། དེ་རྗེས་བཀྲིས་བཟང་པོ་ལགས་གློ་བུར་ཕྱི་ཕྱོགས་སུ་བྲོས་ཏེ་རྨ་ཆུའི་ནང་མཆོངས་ཏེ་རང་སྲོག་བཅད་ཡོད་པ་རེད། གནས་ཚུལ་དེས་རྐྱེན་པས་ར་རྒྱ་དགོན་གྱི་དགེ་འདུན་པས་སྣེ་ཁྲིད་པའི་མི་མང་ཆིག་སྟོང་ལྷག་ནས་ས་གནས་སྤྱི་བདེ་ལས་ཁུངས་ཀྱི་སྒོ་འགྲམ་དུ་བོད་ཀྱི་རྒྱལ་དར་འཕྱར་ཞིང་མི་གསོད་ཁྲག་སྦྱོར་གྱི་ལས་ཀ་མཚམས་འཇོག་དགོས་པའི་ངོ་རྒོལ་སྐད་འབོད་བྱས་འདུག་པ་ལྟར། ཕྱི་ཚེས་ ༢༢ ཉིན་ར་རྒྱ་དགོན་པའི་ཚོགས་ཆེན་དགེ་བསྐོས་དགེ་སློང་དཔལ་ལྡན་རྒྱ་མཚོ་ལགས་ཀྱིས་གཙོསདགེ་འདུན་པ་བརྒྱ་མ་ཟིན་ཙམ་འཛིན་བཟུང་བྱས་ཡོད་པའི་གནས་ཚུལ་ཐོན་ཡོད་པ་དང་། (རྒྱ་ནག་གཞུང་འབྲེལ་གསར་འགྱུར་ཐོག་དགེ་འདུན་པ་དྲུག་འཛིན་བཟུང་བྱས་པ་ལས་གཞན་དགེ་འདུན་པ་ ༨༩ ལྷག་གིས་མགོ་བཏགས་ཞུས་སྐོར་གསལ་བཤད་བྱས་ཡོད་ཀྱང་།) དོན་དངོས་ཐོག་དགེ་འདུན་པ་བརྒྱ་མ་ཟིན་ཙམ་འཛིན་བཟུང་བཀག་ཉར་བྱས་ཡོད་པ་གསལ་པོ་མཚོན་ཡོད། དེ་བཞིན་ད་ལྟའི་ཆར་མགོ་ལོག་ཁུལ་དང་རྨ་ཆེན་རྫོང་སོགས་ནས་སྤྱི་བདེ་མི་སྣ་དང་དྲག་ཆས་ཉེན་རྟོག་པ་ཁྱོན་ཆེ་ར་རྒྱ་ཁུལ་དུ་འབྱོར་ཏེ་ས་གནས་སུ་དམ་བསྒྲགས་ཤིན་ཏུ་ཆེན་པོ་བྱེད་བཞིན་ཡོད་པའི་གནས་ཚུལ་ཐོན་འདུག
