༢༠༡༢ ཟླ་ ༡༢ ཚེས་ ༧ རེས་གཟའ་པ་སངས།
༄༅། །འདི་གར་ཚངས་དབྱངས་རྒྱ་མཚོ་ལགས་ཀྱིས་གནས་ཚུལ་མཁོ་སྤྲོད་བྱུང་དོན། ཕྱི་ལོ་ ༢༠༡༢ ཟླ་ ༡༢ ཚེས་ ༤ ཉིན་གྱི་དགོང་མོར་མགོ་ལོག་པདྨ་རྫོང་ཐོག་ནས་རང་ལོ་ ༤༥ ཡས་མས་ཡིན་པ་ལ་ལའི་ཆོས་སྐྱབས་ལགས་འཛིན་བཟུང་བྱས་ཡོད་པའི་གནས་ཚུལ་ཐོན་འདུག
དེ་ཡང་གོང་ཚེས་ཉིན་གྱི་དགོང་མོར་ལ་ལའི་ཆོས་སྐྱབས་ལགས་མགོ་ལོག་པདྨ་རྫོང་ཐོག་ནས་འཛིན་བཟུང་བྱས་ཡོད་འདུག་ལ། ཁོང་འཛིན་བཟུང་བྱེད་དགོས་དོན་ཇི་ཡིན་གྱི་གནས་ཚུལ་གསལ་ཁ་བྱུང་ཐུབ་མེད་ཀྱང་། ཕྱི་ཚེས་ ༣ ཉིན་ཀྱི་མཚན་མོར་འཛིན་བཟུང་བྱས་ཡོད་པའི་ཝ་ཤུལ་རྡོར་བྲུག་ལགས་ལ་ནག་ཉེས་ཅི་ཡང་མེད་པས་ཁོང་གློད་དཀྲོལ་གནང་རོགས་ཞེས་རྫོང་ཉེན་རྟོག་ཁང་དུ་ཞུ་གཏུགས་བྱས་པ་ཕྱི་ཚེས་ ༤ ཉིན་ཕྱིན་ཡོད་པའི་རྐྱེན་གྱིས་ཡིན་པར་ཁོང་གི་ནང་མི་དང་ས་གནས་བོད་མི་ཚོས་ངོས་འཛིན་བྱེད་བཞིན་ཡོད་འདུག
ལ་ལའི་ཆོས་སྐྱབས་ཀྱི་ནང་མི་སྤུན་མཆེད་ཚོས་ཁ་སང་ཕྱི་ཚེས་ ༥ ཉིན་ཡར་མར་འབྲེལ་བ་གང་མང་བྱས་པའི་མཐར་ཁོང་མགོ་ལོག་ཁུལ་གྱི་བཙོན་ཁང་དུ་ཡོད་པ་ཤེས་རྟོགས་བྱུང་ཡོད་འདུག་ལ། ཁོང་གི་ནང་མི་སོགས་ཀྱིས་ཁོང་ལ་ཟ་ཆས་སོགས་སྐྱེལ་བར་མགོ་ལོག་ཁུལ་དུ་ཕྱིན་ཡོད་ཀྱང་། ཁོང་དང་ངོ་ཐུག་ཐུབ་མེད་པ་མ་ཟད། ཁོང་འཛིན་བཟུང་བྱེད་དོན་འདི་ཡིན་ཞེས་འགྲེལ་བརྗོད་གང་ཡང་བྱས་མེད། ལ་ལའི་ཆོས་སྐྱབས་ལགས་ནི་མགོ་ལོག་པདྨ་རྫོང་རྡོ་གོང་མ་ཡུལ་ཚོའི་གཉི་མདའ་སྡེ་བའི་ཡུལ་མི་ཡིན་པ་དང་། ད་སྐབས་ཁོང་མགོ་ལོག་པདྨ་རྫོང་ཐོག་ཏུ་རྒྱུན་སྡོད་བྱེད་བཞིན་ཡོད། ཁོང་ནི་ནམ་རྒྱུན་བོད་པ་ནང་ཁུལ་མི་མཐུན་པའི་རིགས་བྱུང་སྐབས། གཟི་བཤད་མཁན་གྱི་མི་སྣ་གལ་ཆེན་ཞིག་ཡིན་པ་དང་། ཁོང་གི་ཕའི་མིང་ལ་ལའི་ཐོས་པ་དང་(སྔོན་ནས་སྐུ་གྲོངས་ཟིན།) མ་མིང་ལ་དོན་སྐྱིད་ཟེར་ཞིང་། ཁོང་གི་ནང་དུ་ཆུང་མ་དང་ཕྲུ་གུ་ཁ་ཤས་ཡོད་འདུག་པ་བཅས།།
