༢༠༡༢ ཟླ་ ༡༢ ཚེས་ ༦ རེས་གཟའ་ཕུར་བུ།
༄༅། །འདི་གའི་ཆེད་གཉེར་གསར་འགོད་པ་སྒྲུབ་བརྒྱུད་ཉི་མས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༢ ཟླ་ ༡༢ ཚེས་ ༦ ཉིན་སྔ་དྲོའི་ཆུ་ཚོད་ ༩ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གདན་ས་དགའ་ལྡན་ནས་འབྲས་སྤུངས་བློ་གསལ་གླིང་གཙུག་ཁང་གི་ཆོས་རའི་མདུན་ཐང་དུ་ཆིབས་སྒྱུར་སྐབས་དགའ་ལྡན་ཁྲི་རིན་པོ་ཆེ་མཆོག་དང་། ཤར་རྩེའི་ཆོས་རྗེ་བློ་བཟང་བསྟན་འཛིན་མཆོག བློ་གླིང་མཁན་པོ་རྟོགས་ལྡན་རིན་པོ་ཆེ་མཆོག སེར་སྨད་མཁན་པོ་ཡེ་ཤེས་ངག་དབང་འབྱོར་ལྡན་མཆོག་གི་དབུས་གསུང་ཆོས་སྦྱིན་བདག་གི་སྐུ་ཚབ་རྣམ་པ། བློ་གསལ་གླིང་གྲྭ་ཚང་གི་དབུ་ཆོས་རྣམ་གསུམ་བཅས་ཀྱིས་སྤྱན་རྒྱ་སྤོས་སྣེས་སྔོན་བསུས་ཏེ་གཙུག་ལག་ཁང་གི་རྟེན་གཙོ་དང་མགོན་ཁང་བཅས་ལ་གནས་གཟིགས་མཛད་རྗེས་ཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་ལམ་རིམ་གསོལ་འདེབས་དང་། ལམ་མཆོག་སྒོ་འབྱེད། ཡོན་ཏན་གཞིར་གྱུར་མ་བཅས་གསུང་འདོན་མཚམས་དགའ་ལྡན་ཁྲི་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས་རྗེས་༸གོང་ས་མཆོག་གིས་ཆོས་འབྲེལ་དབུ་འཛུགས་མཛད་དོན།
དེ་རིང་ཁ་སང་འཛམ་གླིང་འདིའི་སྟེང་ཟབ་མོ་རྟེན་འབྱུང་གི་དེ་ཁོ་ན་ཉིད་གསུང་ནའང་འདྲ། བདག་ལས་གཞན་གཅེས་པའི་བྱང་ཆུབ་སེམས་ལ་དོ་སྣང་གསར་པ་ཞིག་སླེབས་དུས་འཛམ་བུ་གླིང་གི་རྒྱན་དུ་གྱུར་པ་འདྲ་ཞིག་ཆགས་ཀྱི་ཡོད། དེ་ཆགས་རྒྱུའི་རྒྱུ་མཚན་རྟེན་འབྲེལ་ཟབ་མོ་ཇི་བཞིན་གཟིགས་པས་བྱས་ཏེ་གཞིའི་གནས་ཚུལ་གཏན་ལ་ཕབ་རྒྱུ་དང་འགྲེལ་བཤད་རྒྱག་རྒྱུ་ཡག་ཤོས་ཞིག་དེ་ཆགས་ཡོད། དེ་ལྟ་བུའི་ལྟ་གྲུབ་ལ་རང་གིས་ཉམས་བཞེད་དང་གཞན་ལའང་འདོམས་པར་གནང་བའི་མཛད་པ་འཕྲིན་ལས་ཐོག་ནས་འཛམ་བུ་གླིང་རྒྱན་དུ་འགྱུར་རྒྱུ་གསུང་ཡོད། ཅེས་སོགས་ཀྱི་སྔོན་འགྲོའི་ཆོས་འབྲེལ་མཛད་དེ་ལམ་རིམ་བཀའ་ཁྲིད་དབུ་འཛུགས་མཛད་ཡོད། དེ་བཞིན་ཕྱི་ཚེས་ ༥ ཉིན་ཕྱི་དྲོ་དགའ་ལྡན་དུ་ཉིན་མཐའ་མའི་ཆོས་ཐུན་མ་གྲོལ་ཁར་༸གོང་ས་མཆོག་གིས། དེ་རིང་དགའ་ལྡན་དུ་ཆོས་འབྲེལ་ཉིན་དྲུག་རིང་གྲ་འགྲིག་ཡག་པོ་ཞེ་དྲག་བྱུང་། ཤར་རྩེ་གྲྭ་ཚང་དང་བྱང་རྩེ་གྲྭ་ཚང་གི་དངོས་གནས་དང་དོད་འཁུར་བླང་སྟེ་ཞེ་དྲག་གཟབ་གཟབ་གནང་སོང་། 
ཐུགས་རྗེ་ཆེ། དེ་ནས་དགེ་འདུན་ཚོགས་དམངས་ཚོ་ཡིན་ནའང་ཚ་བ་དང་ཆོས་ཐུན་རིང་པོ་ཡིན་ཡང་། ཚང་མས་དང་གྲུང་གྲུང་བྱས་ཏེ་གསན་བཞུགས་རྒྱུ་ཡག་པོ་ཞེ་དྲག་འདུག་དགའ་པོ་བྱུང་ཐུགས་རྗེ་ཆེ། སང་ཉིན་ནས་གནས་སྤོས་པ་ཙམ་མ་གཏོགས་མུ་མཐུད་ཆོས་ཐུན་རེད་བྱེད་རྒྱུ་ཡིན་ཐུགས་རྗེ་ཆེ། ཞེས་བཀའ་སློབ་སྩལ།
དེ་བཞིན་དེ་ཉིན་ཕྱི་དྲོ་ཆུ་ཚོད་ ༣ ཐོག་༸གོང་ས་མཆོག་སྒོ་མང་གྲྭ་ཚང་དུ་ཆིབས་སྒྱུར་གྱིས་འདུ་ཁང་གི་རྟེན་གཙོ་རྣམས་ལ་གནས་གཟིགས་སྒྲུབ་བསྟུན། མཁན་བླ་སྤྲུལ་དང་སྦྱིན་བདག་ཁག་གཅིག་བཅས་ཁྱོན་མི་གྲངས་ ༣༠༠ བརྒལ་བའི་འདུས་ཚོགས་སུ་གསོལ་ཇ་འབྲས་སིལ་འདེགས་འབུལ་ཞུས། དེ་རྗེས་སྒོ་མང་གྲྭ་ཚང་གི་མཁན་པོ་ཡོན་ཏན་དམ་ཆོས་མཆོག་གིས་མཎྜལ་རྟེན་གསུམ་འདེགས་འབུལ་ཞུས་གྲུབ་བསྟུན། ༸རྒྱལ་བའི་ཕོ་བྲང་དུ་ཆིབས་སྒྱུར་གྱི་བཞུགས་ཞག་གནང་གི་ཡོད་འདུག
ཕྱི་ཚེས་ ༦ ནས་ ༨ བར་སྒོ་མང་གྲྭ་ཚང་དུ་བཞུགས་ཞག་མཛད་ཀྱི་ཡོད་འདུག ད་ཐེངས་གསུང་ཆོས་ཀྱི་སྦྱིན་བདག་ནི། ཡོངས་འཛིན་གླིང་ཚང་བླ་བྲང་དང་ཤར་རྩེ་གྲྭ་ཚང་གཉིས་ཀྱི་གཙོས་བྱང་རྩེ་གྲྭ་ཚང་དང་འབྲས་སྤུངས་ཚོགས་ཆེན། འབྲས་སྤུངས་སྒོ་མང་གྲྭ་ཚང་། འབྲས་བློ་གསལ་གླིང་གྲྭ་ཚང་། སེར་བྱེས་གྲྭ་ཚང་། སེར་སྨད་གྲྭ་ཚང་། རྒྱུད་གྲྭ་སྟོད་སྨད་གཉིས། ཆོས་སྡེ་ཆེན་པོ་བཀྲིས་ལྷུན་པོ། རྭ་སྟོད་གྲྭ་ཚང་། བློ་གླིང་སྤྲུལ་སྐུ་ལྷན་ཚོགས། སེར་བྱེས་བྲག་རི་བླ་བྲང་། ཌོཀ་ཊར་བཱེ་རི་བཅས་དང། དེ་བཞིན་བླ་མ་བཟོད་པ་རིན་པོ་ཆེའི་ཆོས་ཚོགས་ནས་དངོས་སུ་སྦྱིན་བདག་ཁོངས་སུ་ཞུགས་མི་འདུག་ཀྱང་གསུང་ཆོས་ལ་ཞལ་འདེབས་ཕོན་ཆེན་ཕུལ་ཡོད་འདུག གཞན་ཡང་གསུང་ཆོས་ལ་ཞལ་འདེབས་ཇི་བྱུང་མཇུག་བསྡོམས་སྐབས་༸གོང་ས་མཆོག་དབུ་བཞུགས་ཐོག་ཚོགས་དབུས་སུ་བྱུང་སོང་ལྷག་གི་རྩིས་ཁྲ་ཁ་གསལ་ཞིག་སྒྲོགས་སྦྱང་གནང་འཆར་ཡོད་འདུག་པ་བཅས།།
