༢༠༡༢ ཟླ་ ༡༢ ཚེས་ ༤ རེས་གཟའ་མིག་དམར།
༄༅།།འདི་གར་ཁུངས་ལྡན་གནས་ཚུལ་འབྱོར་བའི་ནང་གསལ། བོད་ནས་གནས་ཚུལ་མུ་མཐུད་ཐོན་བཞིན་པ་ལྟར་ན། བླ་བྲང་དགོན་པའི་དགེ་འདུན་པ་མགོ་ལོག་འཇིགས་མེད་དམ་འཇིགས་མེད་རྒྱ་མཚོ་ལགས་རྒྱ་ནག་གཞུང་གིས་ཕྱི་ལོ་ ༢༠༠༨ ལོར་འཇིགས་བྲལ་ཞེས་པའི་གློག་བརྙན་དཔར་ལེན་བྱས་པ་དང་འབྲེལ་བ་ཡོད་པར་བསྙད་བཏགས་པ་སོགས་ལས་ད་བར་སྔ་རྗེས་ཐེངས་གསུམ་ཙམ་འཛིན་བཟུང་བཀག་ཉར་བྱས་ཡོད་པ་མ་ཟད། མཐའ་མ་ཕྱི་ལོ་ ༢༠༡༢ ཟླ་ ༩ ཚེས་ ༢༠ ཉིན་བླ་བྲང་དགོན་ནས་གཙོས་གྲོང་ཁྱེར་ཁུལ་བསྐྱོད་རྗེས་གར་སོང་ཆ་མེད་དུ་གྱུར་ཏེ་ད་བར་སྤུན་མཆེད་ཉེ་འབྲེལ་ཚོས་བརྩད་གཅོད་ག་ཚད་བྱས་ཀྱང་ཤེས་རྟོགས་མེད་པར་གྱུར་ཡོད།
ཉེ་དུས་གློ་བུར་དུ་ཕྱི་ལོ་ ༢༠༡༢ ཟླ་ ༡༡ ཚེས་ ༢༨ ཉིན་ཀན་སུའུ་ཞིང་ཆེན་སྤྱི་བདེ་ཐིང་གི་མིང་ཐོག་ནས་མགོ་ལོག་འཇིགས་མེད་གར་ཡོད་དང་ཁུངས་སྣེ་རྩིས་སྤྲོད་བྱེད་མཁན་ལ་རྒྱ་སྒོར་ཁྲི་ ༢༠ བྱ་དགའ་སྤྲོད་རྒྱུའི་འཛིན་བཟུང་བཀའ་རྒྱ་ལག་འཁྱེར་ཁ་དཔར་ཐོག་བཏང་ཡོད་པ་མ་ཟད། བཀའ་རྒྱའི་ནང་མགོ་ལོག་འཇིགས་མེད་ནས་ཆེད་མངགས་མི་བསད་པའི་ཉེས་འཛུགས་བྱས་ཡོད། མགོ་ལོག་འཇིགས་མེད་དམ་འཇིགས་མེད་རྒྱ་མཚོ་ལགས་ནི། ཕྱི་ལོ་ ༡༩༦༩ ལོར་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གསེར་རྟ་རྫོང་ཁོངས་སུ་སྐྱེས་པ་དང༌། བླ་བྲང་དགོན་པའི་དགེ་འདུན་པ་ཡིན་ཞིང༌། དུས་རྒྱུན་དུ་བོད་ཀྱི་སྤྱི་དོན་ལ་ལྷག་བསམ་ཆེན་པོས་འགན་འཁུར་ལེན་ཏེ་ཞབས་ཞུ་སྒྲུབ་མཁན་ཞིག་ཡིན་པ་མ་ཟད། ཡ་རབས་ཚུལ་ལྡན་གྱི་དགེ་འདུན་པ་ཞིག་ཡིན་པ་ལས། དེ་ལྟའི་མི་གསོད་ཁྲག་སྦྱོར་གྱི་ལས་འགུལ་སྤེལ་མཁན་ཞིག་རྩ་བ་ནས་མིན་པ་ཡོངས་གྲགས་ཡིན་ཡང༌།
ད་རེས་གློ་བུར་དུ་རྒྱ་ནག་གཞུང་གི་སྤྱི་བདེ་ཚན་པས་ཁ་དཔར་ཐོག་གནས་འཕྲིན་དེ་འདྲ་ཞིག་ཁྱབ་སྤེལ་བྱེད་བཞིན་པ་དེའི་ཐོག་ནས་མགོ་ལོག་འཇིགས་མེད་ལགས་སུ་ཉེས་མེད་ཉེས་འཛུགས་ཀྱིས་སྲོག་ཁྲིམས་གཅོད་རྒྱུའི་ཐབས་ཤེས་བྱེད་ཀྱི་ཡོད་པ་དེ་ནི་ཁོང་དང་ཁོང་འདྲ་བའི་བོད་ནང་ཉིན་མཚན་དབྱེར་མེད་རྒྱ་ནག་གཞུང་གི་དྲག་གནོན་སྲིད་བྱུས་འོག་དཀའ་སྡུག་མྱོང་བཞིན་པའི་སྲིད་དོན་བཙོན་པ་ཚོའི་གནས་སྟངས་ལ་དོ་སྣང་གནང་མཁན་ཡོངས་ཀྱིས་བློ་ཚབས་ཆེན་པོ་བྱ་གཞི་ཞིག་ཏུ་གྱུར་ཡོད་པས་ངེས་པར་དུ་རྒྱ་ནག་གཞུང་གིས་བོད་མི་གང་བྱུང་འཛིན་བཟུང་དང་ཁྲིམས་ཀྱི་འགྲོ་ལུགས་མ་བརྒྱུད་པར་རང་དགར་ཁྲིམས་གཅོད་འདྲ་མིན་བྱེད་བཞིན་པ་དེ་ནི་བོད་མི་ཡོངས་ཀྱིས་བློ་ཚབས་ཆེན་པོ་བྱ་གཞི་ཞིག་ཏུ་གྱུར་ཡོད།།
