༢༠༡༢ ཟླ་ ༡༢ ཚེས་ ༣ རེས་གཟའ་ཟླ་བ།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་ཕྱི་ལོ་ ༢༠༡༢ ཟླ་ ༡༢ ཚེས་ ༢ ཉིན་བཏང་གནས་ནང་འཁོད་དོན།
ཕྱི་ལོ་ ༢༠༡༢ ཟླ་ ༡༢ ཚེས་ ༢ ཉིན་བོད་ནས་གནས་ཚུལ་འབྱོར་བའི་ནང་གསལ། ཕྱི་ཟླ་ ༡༡ ཚེས་ ༣༠ ཉིན་རང་ལུས་མེར་སྲེག་གིས་རྒྱ་གཞུང་ལ་ངོ་རྒོལ་གནང་མཁན་རྒྱལ་གཅེས་དཔའ་བོ་གཟའ་རུའི་དཀོན་མཆོག་སྐྱབས། རང་ལོ་ ༢༩ ཡིན་པ་ཁོང་ཕྱི་ཟླ་ ༡༢ ཚེས་ ༡ ཉིན་གྱི་དགོང་མོ་རྔ་པ་རང་སྐྱོང་ཁུལ་གྱི་ལྟེ་གནས་འབར་ཁམས་སུ་འདས་གྲོངས་གྱུར་ཡོད་ཀྱང་། ཁོང་གི་རུས་ཐལ་ཞིག་མ་གཏོགས་སྐུ་ཕུང་ནང་མིར་ཕྱིར་སྤྲད་མེད་པ་དང་། མཛོད་དགེ་ཕྱོགས་གཙོ་བོར་གྱུར་པའི་བོད་མི་སྐྱ་སེར་དང་རྒན་གཞོན་ཁྱད་མེད་དུ་རྒྱལ་གཅེས་དཔའ་བོ་དཀོན་མཆོག་སྐྱབས་ཀྱི་ནང་མིར་གདུང་སེམས་མཉམ་སྐྱེ་སྟོན་ཆེད་དང་མྱ་ངན་གུས་འདུད་ཞུ་བར་བཅར་མཁན་གྱི་བོད་མི་ཧ་ཅང་མང་པོ་
ཡོང་མུས་ཡིན་འདུག་པ་བཅས།།
