ཕྱི་ལོ་ ༢༠༠༩ ཟླ་ ༣ ཚེས་ ༡༥ རེས་གཟའ་ཟླ་བ།

༄༅། །འདི་གར་ཁུངས་ལྡན་གྱི་གནས་ཚུལ་འབྱོར་བར་གཞིགས་ན། ཕྱི་ལོ་ ༢༠༠༩ ཟླ་ ༣ ཚེས་ ༡༢ ཉིན་དཀར་མཛེས་ས་ཁུལ་ཉག་རོང་རྫོང་དུ་གནས་ཡུལ་བོད་མི་ཁག་གཅིག་ནས་ངོ་རྒོལ་སྐད་འབོད་དང་ཡིག་ཆ་འགྲེམས་གཏོར་བྱས་པའི་གནས་ཚུལ་ཐོན་འདུག གནས་ཚུལ་དེ་དག་ཐོན་རྗེས་བོད་མི་གསུམ་ཙམ་འཛིན་བཟུང་བྱས་ཡོད་པའི་ཁྲོད་ནས་བོད་མི་གཅིག་ལ་སྤྱི་བདེ་ཉེན་རྟོག་པས་ཉེས་རྡུང་ཚབས་ཆེ་བཏང་སྟེ་རྐང་པ་བཅགས་ཡོད་པའི་གནས་ཚུལ་ཐོན་འདུག ཉག་རོང་རྫོང་ཁོངས་སུ་ཟླ་འདིིའི་ཚེས་ ༡༢ གོང་གཞུང་གི་ལས་ཁུངས་ཁག་གི་མདུན་དུ་བོད་རང་བཙན་གྱི་སྦྱར་ཡིག་འགྲེམས་སྦྱར་དང་། སློབ་གྲྭ་ཞིག་གི་ནང་བོད་ཀྱི་རྒྱལ་དར་གསང་བའི་ཐོག་སྒྲེང་འཛུགས་ཀྱི་གནས་ཚུལ་ཐོན་པ་སོགས་ལ་བརྟེན་རྫོང་ཉེན་རྟོག་པས་ཚེས་ ༡༢ ཉིན་གྱི་དགོང་དྲོ་འཛིན་བཟུང་བྱས་པའི་བོད་མི་གསུམ་པོ་དེ་དག་ཁྲོམ་དཀྱིལ་དུ་ཁྲིད་དེ་ཁོང་ཚོའི་རོགས་པ་རྩིས་སྤྲོད་བྱེད་མཁན་བྱུང་ཚེ་དངུལ་གྱི་བྱ་དགའ་སྤྲོད་རྒྱུའི་གསལ་བསྒྲགས་བྱས་ཡོད་པའི་གནས་ཚུལ་ཐོན་བཞིན་ཡོད་པ་རེད།།