ཕྱི་ལོ་ ༢༠༠༩ ཟླ་ ༣ ཚེས་ ༡༢ རེས་གཟའ་ཕུར་བུ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བརྟན་བཞུགས་སྐབས་བཞུགས་ཁྲེི་རིན་པོ་ཆེར་འཁོད་པ།
༄༅། །གངས་ལྗོངས་བོད་རྒྱལ་ཁབ་ཆེན་པོའི་ཆོས་སྲིད་གཉིས་ཀྱི་བླ་ན་མེད་པའི་དབུ་ཁྲིད་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་གཞུང་མང་ལྷ་སྡེ་མི་སྡེ་ཡོངས་ནས་ཕྱི་ལོ་ ༢༠༠༩ ཕྱི་ཟླ་ ༣ ཚེས་ ༡༠ ནས་ ༢༠༡༠ ཕྱི་ཟླ་ ༣ ཚེས་ ༡༠ བར་བོད་མིའི་ཞི་བའི་སྒེར་ལངས་དང་གཞུང་མང་བཙན་བྱོལ་དུ་འབྱོར་ནས་ལོ་ངོ་ལྔ་བཅུ་འཁོར་བའི་དུས་དྲན་སྲུང་བརྩི་ཞུ་རྒྱུའི་ལས་རིམ་ཁོངས་སུ་དུས་དྲན་འགོ་འཛུགས་དང་མཇུག་བསྡོམས་གཉིས་ལ་བརྟན་བཞུགས་རྒྱས་པ་རེ་བསྟར་འབུལ་ཞུ་རྒྱུའི་གསོལ་བ་ཕུར་ཚུགས་སུ་བཏབ་པ་ལྟར་བཀའ་བཞེས་ཟབ་མོ་སྨིན་སྩལ་བྱུང་སྟེ་ལོ་ལྔ་བཅུའི་ལས་རིམ་འགོ་འཛུགས་ཀྱི་ཐོག་མར་སྒ་རྗེ་ཁམས་སྤྲུལ་རིན་པོ་ཆེ་མཆོག་དང་། རྣམ་གྲྭ་མཁན་རིན་པོ་ཆེ་རྣམ་གཉིས་དབུ་བཞུགས་ཐོག་བླ་སྤྲུལ་ཁག་དང་། སྐུ་བཅར་རྣམ་གྲྭའི་འདུས་ཚོགས་དགེ་འདུན་པ་ཞལ་གྲངས་ ༤༠ ནས་ཉིན་གྲངས་བདུན་རིང་སྐུའི་ཚེ་སྒྲུབ་སྔོན་དུ་སོང་བ་བཞིན།
མཁའ་འགྲོ་སྡེ་ལྔས་གར་སྟབས་དང་བཅས་མདོག་མཐུན་གྱི་དར་སྣེ་བཟུང་སྟེ་བཞུགས་ཁྲི་རིན་པོ་ཆེའི་མདུན་དུ་འཁོད་བཞིན་པ།
བོད་རྒྱལ་ལོ་ ༢༡༣༦ རབ་བྱུང་བཅུ་བདུན་པའི་ས་གླང་ཕྱི་ལོ་ ༢༠༠༩ ཕྱི་ཟླ་ ༣ ཚེས་ ༩ ཉིན་བརྟན་བཞུགས་དངོས་གཞིའི་སྔ་དྲོ་ཆུ་ཚོད་ ༦ པའི་ཐོག་དཔལ་ས་སྐྱ་བདག་ཁྲི་རིན་པོ་ཆེ་མཆོག་དབུ་བཞུགས་ཀྱིས་ཆོག་གྲ་འདུས་ཚོགས་ནས་སྐུའི་ཚེ་སྒྲུབ་ཀྱི་གསུང་ཆོག་གནང་བ་དང་། དེ་རྗེས་ཆུ་ཚོད་ ༨།༠༠ ཡོལ་ཙམ་ལ་བཞུགས་སྒར་ཕོ་བྲང་ནས་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་། བོད་མི་མང་སྤྱི་འཐུས་ཚོགས་གཙོ། བཀའ་བློན་ཁྲི་པ་བཅས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། སྐུ་བཅར་རྣམ་གྲྭའི་དགེ་འདུན་པས་སེར་སྦྲེངས་བསྟར་སྒྲིག་དང་དུང་རྒྱ་སྤོས་སྣེ་སོགས་ཀྱི་སྔོན་བསུས། གཙུག་ལག་ཁང་གི་ཡང་སྟེང་ནས་བོད་གཞུང་ཟློས་གར་གྱིས་ཕེབས་བརྡའི་རོལ་ཆ་གཏོང་བཞིན་པར་ཐེག་ཆེན་ཆོས་གླིང་གཙུག་ལག་ཁང་དུ་གདན་ཞུས་ཀྱིས་བཞུགས་ཁྲི་རིན་པོ་ཆེར་༸ཞབས་སོར་འཁོད་བསྟུན་དབུ་བཞུགས་རྡོ་རྗེ་སློབ་དཔོན་དཔལ་ས་སྐྱ་བདག་ཁྲི་རིན་པོ་ཆེ་མཆོག་ནས་མཇལ་དར་རྐྱང་འབུལ་ཞུས་པ་དང་སྦྲགས་འདུས་ཚོགས་ནས་ཞལ་འདོན་རྒྱུན་ཆགས་གསུམ་པ་དང་། ༸རྒྱལ་བའི་འཁྲུངས་རབས་གསོལ་འདེབས། པཎ་གྲུབ་བཅུ་བདུན་གྱི་གསོལ་འདེབས། གུ་རུའི་ཐུགས་དམ་གནད་སྐུལ་སོགས་ཆོས་སྤྱོད་ཁག་གསུང་མུས་སྐབས་གསོལ་ཇ་དང་བཞེས་འབྲས་བཅས་འདེགས་འབུལ་ཞུས་རྗེས་ཐོག་མར་བསུན་ཟློག་གི་ཆོ་ག་རོལ་མོ་བྱིན་འབེབས་སྐབས་མཁའ་འགྲོ་སྡེ་ལྔས་གར་སྟབས་དང་བཅས་ཕེབས་ཏེ་སོ་སོའི་མདོག་མཐུན་གྱི་དར་སྣེ་བཟུང་སྟེ་བཞུགས་ཁྲི་རིན་པོ་ཆེའི་མདུན་དུ་འཁོད། ཞལ་འདོན་ཚིག་བསྟུན་གྱིས་དབུ་བཞུགས་རྡོ་རྗེ་སློབ་དཔོན་མཆོག་ནས་དར་སྣེ་གཅོད་བྲེགས་ཀྱིས་མཁའ་འགྲོ་མ་རྣམས་སྐུ་གླུད་ཀྱི་མདུན་དུ་འཁོད་རྗེས་ཡོན་བདག་ནས་སྐུ་གླུད་ལ་སྒྲོན་དར་དང་མཁའ་འགྲོ་འཁོར་བཅས་ལ་ཡོན་དང་། དར། དཀར་སྤྲོ། ཚོགས་བཅས་ཕུལ་ཏེ་ཕྱིར་གཤེགས་རྗེས་གནས་ཆུང་དང་། དགའ་གདོང་། ཚེ་རིང་མཆེད་ལྔ་བཅས་སྐུ་གསོལ་དང་སྦྲགས་བཞུགས་ཁྲི་རིན་པོ་ཆེའི་མདུན་དུ་གར་འཆམ་ཕུལ་པ་དང་བླ་ཆེན་ཁག་ལ་མཇར་དར་རྐྱང་འབུལ་ཞུས་རྗེས་བླ་ཆེན་རྣམ་པ་སྐུ་བཞེངས་ཐོག་བཞུགས་ཁྲི་རིན་པོ་ཆེའི་མདུན་དུ་འཁོད།
གཞུང་བསྟེན་དགྲ་ལྷའི་གཙོ་བོ་གནས་ཆུང་དང་། དགའ་གདོང་། ཚེ་རིང་མཆེད་ལྔ་བཅས་བཞུགས་ཁྲི་རིན་པོ་ཆེའི་མདུན་དུ་འཁོད་བཞིན་པ།
བརྟན་བཞུགས་དངོས་གཞིར་སློབ་དཔོན་ལྷར་བསྐྱེད་སོགས་རིམ་བཞིན་གསུངས་ཏེ་རིག་འཛིན་བརྒྱུད་སྐུལ་གྱི་གསུང་ཚིག་མཐའ་མ་འཆི་མེད་ཚེ་ཡི་དངོས་གྲུབ་སྩོལ་ཞེས་མཚམས་སུ་དབུ་བཞུགས་རྡོ་རྗེ་སློབ་དཔོན་སྐུ་བཞེངས་ཀྱིས་ཚེ་མདའ་སློབ་དཔོན་ལ་ཕུལ་ཏེ་གསོལ་འདེབས་མཎྜལ་རྒྱས་པ་འདོན་བསྐུལ་གནང་གྲུབ་རྗེས་དབུ་བཞུགས་རྡོ་རྗེ་སློབ་དཔོན་མཆོག་ནས་མཎྜལ་ལྗགས་བཤད་སྐབས་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་། བཀའ་བློན་ཁྲི་པ་མཁས་དབང་ཟམ་གདོང་བློ་བཟང་བསྟན་འཛིན་རིན་པོ་ཆེ་མཆོག་རྣམ་གཉིས་ནས་མཎྜལ་ཚོམ་བུ་ཟུར་འདེགས་ཞུས། མཎྜལ་ལྗགས་བཤད་གྲུབ་མཚམས་དབུ་བཞུགས་རྡོ་རྗེ་སློབ་དཔོན་སྐུ་བཞེངས་ཀྱིས་ཚོམ་བུ་འབུལ་བཞེས་དང་མུ་མཐུད་སྐུ་རྟེན། གསུང་རྟེན། ཐུགས་རྟེན། བུམ་པ། ཚེ་ཆང་། ཚེ་རིལ། ཚེ་མདའ། འབྲང་རྒྱས་དབང་། དྲག་པོ། ཞི་བ། རྒྱས་པ་བཅས་དང་། བཀྲིས་རྟགས་བརྒྱད། རྒྱལ་སྲིད་སྣ་བདུན། བཀྲིས་རྫས་བརྒྱད་བཅས་ཚིག་བསྟུན་གྱིས་ཕུལ་ཏེ་མཇལ་ཞུ་མཛད། དེ་ནས་ཁྲིམས་ཞིབ་པ་ཆེ་བ་དང་། བོད་མི་མང་སྤྱི་འཐུས་ཚོགས་གཙོ། བཀའ་བློནཁྲི་པ་བཅས་ནས་མཎྜལ་རྟེན་གསུམ་འདེགས་འབུལ་ཞུས་རྗེས་མཇལ་ཞུ་དང་ཆབས་ཅིག་བླ་ཆེན་ཁག་ལ་མཇལ་ཕྱག་སྩལ། འབུལ་དངོས་རྣམས་རིམ་པས་སྤྱན་བསྟར་ཞུ་སྐབས་༸རྒྱལ་བའི་ཞབས་བརྟན་དང་། བསམ་པ་ལྷུན་འགྲུབ། བསམ་པ་མྱུར་འགྲུབ། བར་ཆད་ལམ་སེལ་བཅས་གསུང་མུར་གསོལ་ཇ་གཉིས་པ་དང་། ཚོགས་ཡོན་བཅས་འདེགས་འབུལ་དང་།
དཔལ་ས་སྐྱ་བདག་ཁྲི་རིན་པོ་ཆེ་མཆོག་ནས་མཎྜལ་ལྗགས་བཤད་གནང་སྐབས་བཀའ་ཁྲི་མཆོག་དང་སྤྱི་འཐུས་ཚོགས་གཙོ་མཆོག་རྣམ་གཉིས་ནས་མཎྜལ་ཚོམ་བུ་ཟུར་འདེགས་ཞུ་བཞིན་པ།
གཏང་རག་མལ་གཞུང་མང་སྐུ་ཚབ་དཔལ་ལྡན་ཆོས་རིག་བཀའ་བློན་ཚེ་རིང་ཕུན་ཚོགས་མཆོག་ནས་འདེགས་འབུལ་གྱིས་མཇལ་ཞུ་དང་བསྟུན་ཁྲིམས་ཞིབ་པ་ལས་ཟུར་དང་། བོད་མི་མང་སྤྱི་འཐུས་ཚོགས་གཙོ་གཞོན་པ། བཀའ་བློན་ལས་ཟུར་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་ལས་ཟུར་རྣམ་པ། སྤྱི་འཐུས་ལས་ཐོག་རྣམ་པ། དྲུང་ཆེ་ལས་ཐོག་རྣམ་པ་བཅས་ལ་རིམ་བཞིན་མཇལ་ཕྱག་གནང་གྲུབ་རྗེས་ཞལ་འདོན་འཆར་ཁ་མ་དང་། ཐུབ་བསྟན་རིས་མེད་རྒྱས་པའི་སྨོན་ལམ། གསོལ་འདེབས་བདེན་པའི་རྔ་སྒྲ། སངས་རྒྱས་བསྟན་འབར་མ། མཆོག་གསུམ་ཤིས་བརྗོད་བཅས་གསུང་མུར་མཐར་ཀ་ཁྲི་སྒྲོགས། བདེན་ཚིག་སྨོན་ལམ་བཅས་གསུངས། དུས་བཟང་དེ་དང་སྟབས་བསྟུན་བོད་སློབ་ཁག་བཞིི་ནས་འཛིན་རིམ་བདུན་པའི་སློབ་ཕྲུག་བཞི་དང་། འཛིན་རིམ་བརྒྱད་པའི་སློབ་ཕྲུག་བཞི་བཅས་སློབ་མ་གྲངས་བརྒྱད་ནས་༸གོང་ས་མཆོག་གི་སྐུ་མདུན་དུ་རིགས་ལམ་གྱི་བགྲོ་གླེང་རྩོད་ཕུད་ཕུལ་བ་དང་། དེ་ནས་སློབ་མ་རྣམས་ལ་༸གོང་ས་མཆོག་གིས་མཇལ་ཕྱག་གནང་བ་དང་བཀའ་སློབ་བཀའ་དྲིན་ཆེ་བ་ཕེབས་རྗེས་ཁྲིམས་ཞིབ་པ་ཆེ་བ་མཆོག་དང་། བོད་མི་མང་སྤྱི་འཐུས་ཚོགས་གཙོ་མཆོག བཀའ་བློན་ཁྲི་པ་མཆོག་བཅས་ནས་སྤྱན་རྒྱ་སྤོས་སྣེ་སོགས་ཀྱི་གཙུག་ལག་ཁང་ནས་བཞུགས་སྒར་ཕོ་བྲང་དུ་གདན་ཞུས་གནང་སྟེ་བརྟན་བཞུགས་ཀྱི་མཛད་སྒོ་དངོས་གཞི་ལེགས་པར་གྲུབ།
བརྟན་བཞུགས་ཐོག་བཅར་བའི་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་ཞལ་འདོན་དང་གསོལ་འདེབས་སྨོན་ལམ་རྩེ་གཅིག་ཏུ་ཞུ་བཞིན་པ།
ཐེངས་འདིའི་བོད་གཞུང་མང་ལྷ་སྡེ་མི་སྡེ་ཡོངས་ནས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུ་སྐབས་མང་གཙོའི་ཀ་བ་གསུམ་གྱི་མཛད་གཙོ་རྣམ་པས་དབུས་རང་དབང་ཅན་གྱི་སྡེ་ཚན་ཁག་གི་འགན་འཛིན་ལས་ཟུར་རྣམ་པ། སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པས་དབུས་སྲི་ཞུའི་ལས་བྱེད་ཆེ་ཕྲ་རྣམས་དང་། གཞན་ཡང་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་འགན་འཛིན། སེར་སྐྱ་མི་མང་དང་སློབ་ཕྲུག དེ་བཞིན་ཆེད་དུ་བཅར་བའི་དད་ཅན་ཕྱི་རྒྱལ་ཡུལ་ཁག་གི་མི་མང་བཅས་མི་གྲངས་ ༧༠༠༠ བརྒལ་བ་བཅར་ཞུགས་གནང་ཡོད་འདུག
བརྟན་བཞུགས་ཐོག་བཅར་བའི་སེར་སྐྱ་མི་མང་སྟོང་ཚོ་བརྒལ་བའི་ཟུར་ཆ་གཅིག
