༢༠༡༢ ཟླ་ ༡༡ ཚེས་ ༥ རེས་གཟའ་ཟླ་བ།
༄༅། །གསར་འགྱུར་བརྒྱུད་ལམ་ཁག་ནང་གནས་ཚུལ་ཐོན་གསལ་ལྟར་ན། ཁམས་སྐྱེ་རྒུ་མདོ་འཁྲི་འདུ་རྫོང་། ཉ་འཚོ་ཟིལ་དཀར་དགོན་གྱི་དགེ་འདུན་པ་བསྟན་འཛིན་ཤེས་རབ་ལགས་ལ་རྒྱ་ནག་གཞུང་གིས་ལོ་གཅིག་གི་ཁྲིམས་ཐག་བཅད་འདུག་ཀྱང་། ཁྲིམས་ཐག་གཅོད་དུས་ཕྱིར་བསྒྲགས་བྱས་མི་འདུག དེ་ཡང་དགེ་འདུན་པ་བསྟན་འཛིན་ཤེས་རབ་ལགས་ལ་ཟི་ལིང་གྲོང་ཁྱེར་གྱི་ཁྲིམས་ཁང་ཞིག་ནས་དུས་ཡུན་ལོ་གཅིག་རིང་དུས་བཀག་བཙུན་འཇུག་གིས་ཁྲིམས་ཐག་བཅད་ཡོད་པ་དང་། ཟླ་བ་གསུམ་གྱི་སྔོན་ལ་ནང་མི་དང་ཐུག་འཕྲད་བྱེད་མི་ཆོག་པའི་གནས་ཚུལ་ཉེན་རྟོག་མི་སྣས་ནང་མི་ལ་ཁ་པར་བརྒྱུད་བཤད་ཡོད་འདུག
འདི་ལོའི་ཟླ་བ་ ༡༠ ཚེས་ ༡ ཉིན་ཁམས་སྐྱེ་རྒུ་མདོ་འཁྲི་འདུ་རྫོང་རྫ་སྟོད་ཤང་། དར་དམར་སྡེ་པ་ནས་ཡིན་པའི་ཉ་འཚོ་ཟིལ་དཀར་དགོན་གྱི་དགེ་འདུན་པ་བསྟན་འཛིན་ཤེས་རབ་ལགས། རྫ་སྟོད་ཡུལ་ཚོ་ནས་རྒྱ་ནག་གི་ཉེན་རྟོག་པས་འཛིན་བཟུང་བཙན་འཁྲིད་བྱས་རྗེས་ནང་མི་སྤུན་མཆེད་རྣམས་ཀྱིས་ཉེན་རྟོག་ལས་ཁང་དུ་འབྲེལ་བ་བྱས་ཏེ། ཁོང་གང་དུ་ཡོད་མེད་དང་གནས་སྟངས་ཇི་ཆགས། དེ་བཞིན་ས་གནས་གང་དུ་བཀག་ཉར་བྱས་ཡོད་མེད་རྩད་གཅོད་བྱས་ཀྱང་། འབྲེལ་ཡོད་ཉེན་རྟོག་པས་གང་ཡང་འགྲེལ་བརྗོད་བྱས་མེད་པ་རེད། ཁོང་རྒྱ་ནག་གཞུང་གིས་བཙན་ཁྲིད་བཀག་ཉར་བྱེད་དོན་སོགས་གསལ་པོ་ཤེས་རྟོགས་ཐུབ་མི་འདུག་ཀྱང་།
ལོ་འདིའི་ཟླ་ ༢ ཚེས་ ༨ ཉིན་ཉ་འཚོ་ཟིལ་དཀར་དགོན་གྱི་གྲྭ་མང་དང་། དེར་ཡོད་ཀྱི་མི་མང་ནས་རྒྱ་གཞུང་ལ་ཞི་བའི་སྐད་འབོད་བྱེད་སྐབས། ཁོང་མཉམ་ཞུགས་བྱས་པའི་རྐྱེན་གྱིས་ཡིན་སྐོར་འབྲེལ་ཡོད་ཁག་གཅིག་གིས་འགྲེལ་བརྗོད་བྱས་འདུག ད་ལྟའི་ཆར་རྒྱ་ནག་གཞུང་གིས་རྫ་སྟོད་སོགས་སུ་དམ་བསྒྲགས་བྱེད་བཞིན་ཡོད་པའི་གནས་ཚུལ་ཞིབ་ཕྲ་ཤེས་རྟོགས་ཐུབ་མེད། ཉ་འཚོ་ཟིལ་དཀར་དགོན་གྱི་དགེ་འདུན་པ་བསྟན་འཛིན་ཤེས་རབ་ལགས་ནི་རང་ལོ་ ༢༨ ཡིན་པ་དང་། ཕ་ཡི་མིང་ལ་འཇམ་ཆོས་དང་། མ་ཡི་མིང་ལ་པདྨ་བདེ་སྐྱིད་བརྗོད་ཅིང་། ཁོང་ལ་སྤུན་མཆེད་བདུན་ཡོད་པ་ལས་ལྔ་པ་དེ་ཡིན་པ་དང་། ཁོང་ནི་རྒྱུན་ལྡན་ནས་ཀུན་སྤྱོད་བཟང་ལ་མི་རིགས་ཀྱི་ལ་རྒྱ་ཆེ་བ། སློབ་སྦྱོང་ལ་ཧུར་བརྩོན་ལྡན་པ་ཞིག་ཡིན་འདུག །
