༢༠༡༢ ཟླ་ ༡༠ ཚེས་ ༢༣ རེས་གཟའ་མིག་དམར།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༡༡ ཉིན་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པརཱག་ནང་དུ་ཕོ་རམ་ ༢༠༠༠ ཞེས་པའི་ལྷན་ཚོགས་ (Forum 2000) སུ་ཡུལ་དེའི་དེ་སྔའི་སྲིད་བློན་གཞོན་པ་སྐུ་ཞབས་མར་ཊིན་བྷུར་སིཀ་མཆོག་ཆེད་ཕེབས་གནང་སྟེ་བོད་མིའི་སྒྲིག་འཛུགས་ཀྱི་སྲིད་སྐྱོང་་བློ་བཟང་སེང་གེ་མཆོག་དང་མཇལ་འཕྲད་གནང་ཡོད། སྐབས་དེར་སྐུ་ཞབས་མར་ཊིན་བྷུར་སིཀ་མཆོག་གིས་ཆབ་སྲིད་འགོ་ཁྲིད་པ་ཚོས་དཔལ་འབྱོར་གྱི་ཁེ་ཕན་ཁོ་ནའི་ཆེད་བཟང་སྤྱོད་ཀྱི་རིན་ཐང་ལ་སྣང་ཆུང་བྱ་ཐབས་མེད་པ་དང། བོད་ཀྱི་གནད་དོན་སེལ་ཆེད་རྒྱ་ནག་འགོ་ཁྲིད་ཚོས་བོད་མིའི་སྐུ་ཚབ་དང་ལྷན་ཞི་མོལ་གནང་ཆེད་ཅེཀ་སྤྱི་མཐུན་རྒྱལ་ཁབ་ཀྱིས་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་རེ་འདུན་ཤུགས་ཆེ་བཏོན་ཡོད། གཞི་རྩའི་སྐུཞབས་མར་ཊིན་བྷུར་སིཀ་མཆོག་ཕྱི་ལོ་ ༡༩༨༨ ལོར་བོད་ནང་དུ་གཟིགས་སྐོར་དུ་བསྐྱོད་སྐབས་བོད་མིས་རྒྱ་ནག་གཞུང་གི་སྲིད་བྱུས་ལ་གཞི་བའི་རྔམ་སྟོན་ཁྲོམ་སྐོར་བྱས་པ་དངོས་སུ་གཟིགས་ཡོད།
དེ་བཞིན་ཇར་མན་གྲོང་ཁྱེར་བྷར་ལིན་ནང་རྟེན་གཞི་བྱས་པའི་བྷར་ལིན་ཧམ་བོལ་གཙུག་ལག་སློབ་གྲྭའི་ Berlin’s Humboldt University ནང་བོད་དང་རྒྱ་ནག་རིག་པའི་མཁས་དབང་ལྕམ་སྐུ་ཇར་མི་ལ་པེ་ཝི་ཀོ་ཝ་ Ms Jarmila Ptáčková མཆོག་གིས་རྒྱ་ནག་གཞུང་ནས་ལོ་ངོ་ ༥༠ ལྷག་རིང་བོད་དེ་བཞིན་རྒྱ་ནག་གི་མངའ་ཁོངས་སུ་བསྡུ་ཐབས་བྱས་པའི་སྲིད་བྱུས་དེ་ལམ་ལྷོང་ལྡན་པ་ཞིག་བྱུང་མེད། དེར་བརྟེན་ད་ཆ་རྒྱ་ནག་གཞུང་གིས་བོད་མིའི་མངོན་འདོད་ལ་བསམ་ཞིབ་གང་ཡང་མེད་པའི་ཐོག་ནས་བོད་ནང་ཆེད་མངགས་རྒྱ་རིགས་མང་པོ་སྤོ་ཤུགས་བྱས་དང་བྱེད་མུས་ཡིན། དེང་སྐབས་བོད་ནང་ཡར་རྒྱས་དང་འཛུགས་སྐྲུན་ལ་ཁ་གཡར་ཏེ་རྒྱ་རིགས་ཧ་ཅང་མང་པོ་བོད་ནང་སྤོ་ཤུགས་བྱས་པ་དེས་བོད་མི་རྣམས་རང་གི་ལུང་པའི་ནང་གྲངས་ཉུང་མི་རིགས་ཤིག་ཏུ་འགྱུར་བཞིན་ཡོད། ཅེས་གསུངས།
ཕྱོགས་མཚུངས་སྐབས་དེར་སྲིད་སྐྱོང་བློ་བཟང་སེང་གེ་མཆོག་གིས་གསུང་དོན། བོད་ཀྱི་དཀའ་ངལ་དེ་བོད་ནང་ཡར་རྒྱས་དང་འཛུགས་སྐྲུན་ཇི་ཙམ་བྱས་མིན་གྱི་གནས་ཚུལ་ཞིག་མིན། བོད་ཀྱི་དཀའ་ངལ་ཐུག་ས་དེ་བོད་ནང་འགྲོ་བ་མིའི་ཐོབ་ཐང་ཡོད་མེད་ཀྱི་གནས་སྟངས་ལ་ཐུག་ཡོད། བཙན་དབང་འོག་སུད་ཀྱང་བསྡད་འདོད་བྱེད་ཀྱི་མ་རེད། རྒྱ་ནག་གཞུང་གིས་བོད་ནང་སྤྱི་ཚོགས་རིང་ལུགས་ཀྱི་ལྷ་ཡུལ་བསྐྲུན་རྒྱུ་ཡིན་སྐོར་བརྗོད་ཡོད། འོན་ཀྱང་དོན་དངོས་ཐོག་བོད་མི་ཚོས་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་འོག་མནར་གཅོད་དང་དཀའ་སྡུག་ཚད་མེད་མྱངས་དང་མྱོང་བཞིན་ཡོད། བོད་རྒྱའི་དཀའ་ངལ་སེལ་ཆེད་ཐབས་ལམ་གཙོ་བོ་ནི་དབུ་མའི་ལམ་གྱི་སྲིད་བྱུས་ཡིན། དབུ་མའི་ལམ་གྱི་སྲིད་བྱུས་་གཞི་ལ་བཞག་སྟེ་ང་ཚོས་རྒྱ་ནག་འགོ་ཁྲིད་ཚོ་དང་ལྷན་གྲོས་མོལ་བྱ་རྒྱུའི་གྲ་སྒྲིག་ཨང་གསར་ཡོད། ཕྱི་ལོ་ ༢༠༠༢ ལོ་ནས་ཕྱི་ལོ་ ༢༠༡༠ ཟླ་ ༡ བར་རྒྱ་ནག་དཔོན་རིགས་དང་ལྷན་གྲོས་མོལ་ཐེངས་དགུ་ཙམ་གནང་ཡོད། རྒྱ་ནག་གཞུང་གིས་དམ་བསྒྲགས་བྱ་རྒྱུ་ནི་རྒྱ་ནག་ཕྱི་ནང་གཉིས་སུ་བྱེད་བཞིན་ཡོད།
དཔེར་ན། དྲ་རྒྱ་དང་གསར་འགྱུར་བརྒྱུད་ལམ་ཐོག་དམ་བསྒྲགས་ཆེད་ནད་འབུ་རིགས་འདྲ་མིན་བཏང་ནས་གནས་ཚུལ་དམ་བསྒྲགས་བྱེད་ཐབས་བྱས་དང་བྱེད་མུས་ཡིན། ཞེས་སོགས་ཀྱི་གསུང་བཤད་གནང་བ་མ་ཟད། ཕྱི་ལོ་ ༢༠༠༩ ནས་ད་བར་བོད་ནང་དུ་བོད་མི་ ༥༦ རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་དམ་བསྒྲགས་ཅན་གྱི་སྲིད་བྱུས་ལ་ངོ་རྒོལ་གནང་ཡོད། སྐབས་དེར་བོད་མི་ཞི་རྒོལ་བ་རྣམས་ལ་རྒྱ་ནག་གཞུང་གིས་དམ་བསྒྲགས་དང་སྡུག་སྦྱོང་མནར་གཅོད་བཏང་བར་བརྟེན་བོད་མི་ཚོའི་སེམས་ནང་འཁོན་འཛིན་ཆེན་པོ་བཟོ་བཞིན་ཡོད། དེ་སྔའི་རྒྱ་ནག་གི་བྱུང་རབས་ནང་རྒྱ་ནག་ལྕགས་རི་རིང་པོ་བརྒྱབ་སྟེ་སོག་པོའི་དམག་དཔུང་གི་བཙན་འཛུལ་འགོག་ཐབས་བྱས་ཡོད་ཀྱང། དེ་ལྟར་ལམ་ལྷོང་བྱུང་མེད། ཕྱོགས་མཚུངས་དེང་སྐབས་རྒྱ་ནག་གཞུང་གིས་དྲ་རྒྱའི་རང་དབང་ཐོག་དམ་བསྒྲགས་བྱེད་ཆེད་མེའི་ལྕགས་རི་ཆེན་མོ་ Great Wall ཞེས་པ་བཟོས་ཡོད་ཀྱང། རྒྱ་ནག་དང་བོད་ནང་སྔ་ཕྱི་མ་གཏོགས་རང་དབང་གི་ཉིན་མོ་ཤར་ངེས་ཡིན། ཞེས་སོགས་ཀྱི་གསུང་བཤད་གནང་ཡོད།
དེ་ཉིན་སྔ་དྲོ་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་གོང་མའི་འཐུས་མི་སྐུ་ཞབས་པི་ཊར་བྷ་ར་ཊི་སི་ཀི་Senator Petr Bratský མཆོག་གིས་སྲིད་སྐྱོང་མཆོག་གྲོས་ཚོགས་གོང་མའི་ (Senate) ནང་མགྲོན་འབོད་ཞུས་པ་ལྟར་ཕེབས་ཡོད། སྐབས་དེར་ཇ་རོ་མིར་སི་ཏེ་ཏི་ན་མཆོག་ Senator Jaromír Štětina དང་ཅེཀ་སྤྱི་མཐུན་རྒྱལ་ཁབ་ཀྱི་དེ་སྔའི་སྲིད་བློན་གཞོན་པ་སྐུ་ཞབས་མར་ཊིན་བྷུར་སིག་Mr Martin Bursík མཆོག གྲོས་ཚོགས་མཐུས་མི་ཟུར་པ་ལྕམ་སྐུ་ཀ་ཏི་རི་ན་ཇེཀ་སི་ Ms Kateřina Jacques མཆོག་བཅས་ཀྱང་མཉམ་ཞུགས་གནང་ཡོད། སྐབས་དེར་གྲོས་ཚོགས་གོང་མའི་འཐུས་མི་སྐུ་ཞབས་པི་ཊར་བྷ་ར་ཊི་སི་ཀི་མཆོག་གིས་གསུང་དོན། བོད་ནང་གི་བོད་མི་ཚོར་རང་གི་མངོན་འདོད་ཕྱིར་འདོན་རྒྱུའི་ཐོབ་ཐང་ཡོད་པ་དེར་དམ་བསྒྲགས་བྱེད་བཞིན་ཡོད། ང་ཚོས་རྒྱ་ནག་འགོ་ཁྲིད་ཚོ་དང་ལྷན་གྲོས་མོལ་སྐབས་བོད་མི་ཚོའི་གནད་དོན་ཐོག་རྒྱབ་སྐྱོར་ཞུ་རྒྱུ་ཡིན། ཞེས་གསུངས་པར་སྲིད་སྐྱོང་མཆོག་གིས་ཅེཀ་སྤྱི་མཐུན་རྒྱལ་ཁབ་ཀྱི་གྲོས་ཚོགས་བོད་དོན་རྒྱབ༌སྐྱོར་ཚོགས་པའི་འཐུས་མི་རྣམས་ཀྱིས༌བོད་མིའི་བདེན་དོན་ལ་རྒྱབ་སྐྱོར་གནང་བར་གཞིས་བྱེས་བོད་མི་ཡོངས་ཀྱིས་ཚབ་ཞུས་ཏེ་སྙིང་ཐག་པ་ནས་བཀའ་དྲིན་ཆེ་ཞུས་ཡོད་པ་བཅས།།
