༢༠༡༢ ཟླ་ ༡༠ ཚེས་ ༢༠ རེས་གཟའ་སྤེན་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་མངའ་སྡེ་ཀོ་ནེཀ་ཊིའི་གཙུག་ལག་སློབ་གཉེར་ཁང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ་ཕྱི་ལོ་ ༢༠༡༢ ཟླ་ ༡༠ ཚེས་ ༡༩ ཉིན་གྱི་སྔ་དྲོ་མགོན་པོ་གང་ཉིད་མཆོག་གིས་གིས་ཨ་རིའི་མངའ་སྡེ་ཀོ་ནེཀ་ཊིའི་གཙུག་ལག་སློབ་གཉེར་ཁང་གི་ཚོགས་ཁང་ནང་དགེ་སློབ་དང་གནད་ཡོད་མི་སྣ་སོགས་ལ་ཆོས་ཉམས་ལེན་བྱེད་སྟངས་དང་ལྐོག་ཟ་རུལ་སུངས་ཀྱི་བྱ་ཕྱོགས་ལ་གདོང་ལེན་བྱེད་ཕྱོགས་སྐོར་བཀའ་སློབ་སྩལ་དོན། དེ་རིང་ངོས་རང་འདི་གར་བཅར་ཏེ་ཁྱེད་རང་ཚོ་དང་ཐུག་རྒྱུ་བྱུང་བ་ཧ་ཅང་དགའ་པོ་བྱུང་། ཁྱེད་རང་ཚོ་ཚང་མར་ཐོག་མར་ངོས་ཀྱིས་འཚམས་འདྲི་ཞུ་རྒྱུ་ཡིན། སྤྱིར་བཏང་ཆོས་ལུགས་གང་ཞིག་ཡིན་རུང་ཤེས་པའི་ཐོག་ནས་ཉམས་ལེན་བྱ་རྒྱུ་ཧ་ཅང་གལ་ཆེན་པོ་རེད།
དཔེར་ན། རྒྱ་གར་གྱི་མི་རྣམས་སྤྱི་ཡོངས་ཆ་ན་ཆོས་ལུགས་དང་འབྲེལ་ཆེན་པོ་ཡོད་སྟབས། དོན་དག་གང་ཡིན་ཧ་མ་གོ་ཡང་ཆོ་ག་བཏོན་སྟེ་བདུག་སྤོས་དང་མེ་ཏོག་སོགས་ལྷ་དབང་ཕྱུག་གི་སྐུ་འདྲའི་འགྲམ་དུ་ཕུལ་ནས་གསོལ་བ་འདེབས་ཀྱི་ཡོད། འོན་ཀྱང་ཁོང་ཚོས་ཉིན་རེའི་འཚོ་བའི་ནང་ལྐོག་ཟ་རུལ་སུངས་ཀྱི་བྱ་སྤྱོད་རིགས་ལ་སྣང་མེད་གཏོང་གི་འདུག གལ་ཏེ་སྐུ་འདྲ་དེའི་ཞལ་ནས་ཚུན་མིན་གྱི་ལས་ཀའི་རིགས་བྱས་ན་འགྲིག་གི་མེད་ཅེས་གསུང་ཐུབ་ཀྱི་ཡོད་ན། དེ་ལྟར་གསུང་གི་རེད། འོན་ཀྱང་སྐུ་འདྲར་གསུང་བྱོན་རྒྱུ་མེད་པར་བརྟེན། མི་དེ་དག་གིས་མཆོད་པ་ཕུལ་ནས་ལྷར་སྐྱབས་འཇུག་ཞུ་སྐབས། རེ་ཟུང་གི་ལས་དོན་ཁག་གཅིག་བདེ་བླག་ངང་སྒྲུབ་ཀྱི་ཡོད་སྟབས། ལྷས་ཆོག་མཆན་གནང་བར་ངོས་འཛིན་བྱེད་ཀྱི་ཡོད། རྒྱུ་མཚན་དེ་འདྲའི་ཐོག་ནས་ཆོས་ལ་དད་པ་ཡོད་མེད་དེ་མི་སྒེར་པ་ཞིག་གི་དོན་དག་རེད། ང་ཚོས་ཆོས་ལ་དད་པ་དང་ཡིད་ཆེས་བྱས་རྗེས་ཉམས་ལེན་བསམ་པ་རྣམ་དག་ཐོག་ནས་བྱ་རྒྱུ་ཧ་ཅང་ཆེན་པོ་རེད།
རྒྱུ་འབྲས་རྟེན་འབྱུང་ལ་ཡིད་ཆེས་ཡོད་པ་ཞིག་ཡིན་ན། སྔ་དྲོ་རང་ཉིད་གཉིད་ལས་སད་རྗེས་རང་ཉིད་ཀྱི་སྐྱབས་གནས་ཡིད་ལ་དྲན་པ་བྱས་ཏེ་རྟག་ཏུ་གསོལ་བ་འདེབས་དགོས། མདོར་ན། ང་ཚོས་རང་རྒྱུད་སྔར་ལྷག་བཟང་པོ་ཞིག་ཡོང་ཐབས་སུ་འབད་བརྩོན་ཤུགས་ཙམ་བྱ་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད། ཅེས་སོགས་ཀྱི་བཀའ་སློབ་དང་སློབ་ཕྲུག་ཚོའི་དྲི་བ་ཁག་ལ་བཀའ་ལན་ཡང་སྩལ་ཡོད་པ་བཅས། །
