༢༠༡༢ ཟླ་ ༡༠ ཚེས་ ༡༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༡༤ རེས་གཟའ་ཉི་མའི་ཉིན་༸གོང་ས་མཆོག་ཨ་རིའི་མངའ་སྡེ་བྷོ་སི་ཊོན་དུ་ Boston ༸ཞབས་སོར་བདེ་བར་འཁོད་སྐབས། གནམ་ཐང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་ཏཱ་ལའི་བླ་མའི་བཟང་སྤྱོད་སྲུང་སྐྱོབ་ཐེབས་རྩ་ཁང་ The Dalai Lama Center for Ethics and transformative values.གི་འགན་འཛིན་སྐུ་ཞབས་བསྟན་འཛིན་པིར་ཡ་དར་ཤི་ནི་མཆོག་སོགས་ཀྱིས་ཕེབས་བསུ་གཟབ་རྒྱས་ཞུས་ཡོད། དེ་རྗེས་གཙུག་ལག་སློབ་གྲྭ་དང་མཐོ་སློབ་ཁང་གི་ཞལ་ངོ་ Deans རྣམས་ཚང་འཛོམས་ཐོག་༸གོང་ས་མཆོག་ཞབས་སོར་འཁོད་ཡོད། སྐབས་དེར་ཞལ་ངོ་རྣམ་པས་མགོན་པོ་གང་ཉིད་མཆོག་ལ་ཤེས་ཡོན་ཐོག་ལྟ་གྲུབ་ཇི་འདྲ་ཡིན་སྐོར་བཀའ་འདྲི་ཞུས་པར་༸གོང་ས་མཆོག་གིས་བཀའ་ལན་སྩལ་དོན། བདེ་སྡུག་གི་ཚོར་བ་མྱོང་མཁན་སྐྱེ་འགྲོ་སུ་འདྲ་ཞིག་ཡིན་རུང་མི་ཚེ་བདེ་སྐྱིད་ལྡན་པ་ཞིག་འདོད་ཀྱི་རེད། མིའི་ཀླད་པས་སེམས་ཚོར་བཟང་ངན་གྱི་དབྱེ་བ་འབྱེད་ཤེས། ང་ཚོས་རྒྱུན་དུ་ཕྱིའི་སྣང་ཚུལ་ཙམ་གྱི་རྗེས་སུ་འབྲེང་བཞིན་ཡོད། སྣང་ཚུལ་དང་གནས་ཚུལ་དབར་ཁྱད་པར་ཡོད། ཤེས་ཡོན་གྱི་དགོས་དམིགས་གཙོ་བོ་ནི་ཁྱད་པར་དེ་ཉུང་དུ་བཏང་སྟེ་ང་ཚོས་ལས་དོན་ཇི་འདྲ་ཞིག་གདོང་ལེན་བྱེད་སྐབས། དངོས་ཡོད་གནས་ཚུལ་དང་མཐུན་པའི་ཐོག་ནས་ལངས་ཕྱོགས་བཟུང་ཐུབ་པ་བྱ་རྒྱུ་དེ་ཡིན།
ངོས་རང་མི་འདོད་བཞིན་དུ་བོད་ནས་བྲོས་བྱོལ་ཡོང་བ་རེད། གནས་སྟངས་དེས་ངོས་ལ་རིག་གཞུང་འདྲ་མིན་དང་མི་སྣ་མང་པོ་ཞིག་ཐུག་རྒྱུའི་གོ་སྐབས་གསར་པ་ཞིག་ཀྱང་བྱུང་ཡོད། དེར་བརྟེན་ངོས་ཀྱིས་འཛམ་གླིང་གི་དངོས་ཡོད་གནས་སྟངས་ཇི་ཡིན་ཤེས་རྒྱུའི་གོ་སྐབས་བྱུང་བ་རེད། སྤྱིར་བོད་ལ་འཛམ་གླིང་མཐོ་སྒང་ཞེས་འབོད་བཞིན་ཡོད་ནའང། འཛམ་གླིང་གི་སྣེ་གསུམ་པར་གྲགས་ཤིང་རྒྱུགས་ཆུ་ཆེན་པོ་མང་པོ་ཞིག་གི་འབྱུང་ཁུངས་ཆགས་ཡོད། རྒྱུགས་ཆུ་དེ་དག་གིས་ཨེ་ཤི་ཡའི་མི་འབོར་ཐེར་འབུམ་མང་པོའི་འཚོ་བའི་རྟེན་གཞིར་གྱུར་ཡོད། དེར་བརྟེན་བོད་ཀྱི་ཞི་བདེའི་སྲོལ་རྒྱུན་བཞིན་ཁོར་ཡུག་སྲུང་སྐྱོབ་བྱ་རྒྱུ་དེ་ཡང་ཧ་ཅང་གལ་ཆེན་པོ་ཆགས་ཡོད། ཤེས་ཡོན་གྱི་དམིགས་ཡུལ་དེ་དག་དོན་འཁྱོལ་ཡོང་ཆེད་ཕན་རླབས་ཆེན་པོ་ཡོད། རྒྱ་ནག་དམར་ཤོག་ཚོགས་པའི་འགོ་ཁྲིད་ཚོས་ཨ་རི་བཙན་རྒྱལ་རིང་ལུགས་ཞེས་སྐྱོན་བརྗོད་བྱེད་བཞིན་དུ་རང་གི་ཕྲུ་གུ་རྣམས་འདིར་ཤེས་ཡོན་ཆེད་གཏོང་བཞིན་ཡོད་པ་དེས་ཤེས་ཡོན་གལ་ཆེན་པོ་ཡིན་པ་མཚོན་བཞིན་ཡོད། ཅེས་བཀའ་ལན་སྩལ། དེ་ནས་བོད་མི་ཚོས་རིག་གནས་འདྲ་མིན་ཐོག་སྦྱང་རྒྱུ་གལ་ཆེ་ཡིན་པའི་རྒྱུ་མཚན་ཇི་ཡིན། ཞེས་དྲི་བ་ཞུས་པར་བཀའ་ལན་སྩལ་དོན། བོད་ཀྱི་རིག་གཞུང་དང་ཁོར་ཡུག་སྲུང་སྐྱོབ་ཀྱི་ལས་འགན་དེ་དག་དོན་འཁྱོལ་ཡོང་ཆེད་རྒྱ་རིགས་ཁྲོད་མཁས་དབང་མང་པོ་ཡོད་པ་བཞིན་བོད་རིགས་ཁྲོད་དེ་མཚུངས་མཁས་པ་གང་ཙམ་འཐོན་རྒྱུ་གལ་ཆེན་པོ་ཡིན། ཞེས་བཀའ་ལན་སྩལ། དེ་ནས་འགོ་ཁྲིད་ཀྱི་ཡོན་ཏན་གཙོ་བོ་ཇི་འདྲ་ཡིན་ནམ་ཞེས་དྲི་བ་ཞུས་པར་༸གོང་ས་མཆོག་གིས་བཀའ་ལན་སྩལ་དོན། བྱམས་བརྩེ་ལྡན་པ་ཞིག་དང་ཕུགས་རྒྱང་རིང་པོའི་དམིགས་ཡུལ་འཛིན་ཐུབ་པ། སེམས་ཐག་ཆོད་པོ། ཕྱོགས་ཡོངས་ཀྱི་གནས་ཚུལ་ལ་བལྟ་ཐུབ་པ་དགོས། ཅེས་བཀའ་ལན་སྩལ་ཡོད་པ་བཅས།།
