ཕྱི་ལོ་ ༢༠༠༩ ཟླ་ ༣ ཚེས་ ༣ རེས་གཟའ་མིག་དམར།
ས་གླང་ལོའི་ཚེས་གཅིག་སྔ་དྲོ་སྐུ་བཅར་རྣམ་གྲྭའི་མཁན་རིན་པོ་ཆེ་དབུ་བཞུགས་ཐོག་རྣམ་གྲྭའི་དགེ་འདུན་པ་རྣམས་ནས་ལྷ་མོའི་བསྐངས་གསོ་འདོན་སྐུལ་གནང་བཞིན་པ།
༄༅། །ས་གླང་གནམ་ལོ་རང་ཞལ་གསར་དུ་ངོམས་པའི་རྟེན་འབྱུང་གི་ཉིན་དང་པོའི་སྔ་དྲོ་ཆུ་ཚོད་ ༧ པའི་ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཡང་སྟེང་དུ་དཔལ་ལྡན་འདོད་ཁམས་དབང་ཕྱུག་མའི་ཚེས་གཏོར་རྟེན་འབུལ་དངོས་གཞིའི་ཐོག་མར་སྐུ་བཅར་རྣམ་གྲྭའི་མཁན་རིན་པོ་ཆེ་མཆོག་ནས་བདག་ཅག་གངས་ཅན་པ་རྣམས་ཀྱི་ལྷ་སྐལ་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་ཆེན་པོ་རྗེ་བཙུན་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་གི་བཞུགས་ཁྲི་རིན་པོ་ཆེར་རྟེན་གསུམ་འདེགས་འབུལ་ཞུས་རྗེས་ལྷ་མོའི་བསྐངས་གསོ་དབུ་སྐུལ་བཀའ་དྲིན་བསྐྱངས་སྐབས་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་སོགས་ཆེད་བཅར་གནང་ཡོད་པ་རེད་འདུག ཆུ་ཚོད་ ༩ པར་མཛད་བཅར་བ་རྣམས་གདན་འཛོམས་ཐོག་སྐུ་བཅར་རྣམ་གྲྭ་གསུང་ཞབས་རྣམས་ནས་ཞལ་འདོན་ཚིག་མཚམས་སོ་སོར་རྣམ་གྲྭའི་མཁན་རིན་པོ་ཆེ་མཆོག་གི་༸རྒྱལ་བའི་བཞུགས་ཁྲི་རིན་པོ་ཆེར་བཀྲ་ཤིས་པའི་རྟགས་བརྒྱད་དང་། རྒྱལ་སྲིད་སྣ་བདུན། རྫས་བརྒྱད་བཅས་རིམ་འབུལ་གྱིས་ཤིས་བརྗོད་དང་བཅས་གསུང་རྗེས་ཁྲིམས་ཞིབ་པ་ཆེ་བ་དང་། བོད་མི་མང་སྤྱི་འཐུས་ཚོགས་གཙོ། བཀའ་བློན་ཁྲི་ཚབ་དཔལ་ལྡན་ཆོས་རིག་བཀའ་བློན་མཆོག་བཅས་ནས་མལ་རྟེན་གསུམ་འདེགས་འབུལ་ཞུས་རྗེས་དཔལ་ལྡན་བཀའ་བློན་ཁྲི་ཚབ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ནས་གཞིས་བྱེས་བོད་རིགས་ཡོངས་ལ་སྩལ་བའི་གསུང་འཕྲིན་སྒྲོག་སྦྱངས་གནང་བསྟུན་ཚོགས་ལངས་པ་གཉིས་ནས་གཞུང་ཆེན་ལྔའི་ཐོག་བགྲོ་གླེང་ཡང་གནང་ཡོད་པ་རེད། དེ་རྗེས་གསོལ་ཇ་དང་བཞེས་འབྲས་བཅས་འདེགས་འབུལ་དང་འབྲེལ་བོད་གཞུང་ཟློས་གར་ཚོགས་པའི་གར་ཕྲུག་ནས་གར་གཟིགས་འབུལ་ཞུས་པ་དང་། དེ་ནས་བགྲོ་གླེང་པ་རྣམ་གཉིས་ནས་ཚིག་བཀྲ་དང་བཅས་བཞུགས་ཁྲི་རིན་པོ་ཆེར་མཇལ་དར་ཕུལ་བ་དང་སྦྲགས་ཕྱག་སྲུང་གནང་སྟེ་སྔ་དྲོའི་རིང་ཆོས་ཕྱོགས་ཀྱི་དངོས་གཞིའི་མཛད་སྒོ་གྲུབ།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་སྩལ་བའི་ལོ་གསར་གྱི་གསུང་འཕྲིན་དཔལ་ལྡན་བཀའ་བློན་ཁྲི་ཚབ་ཆོས་རིག་བཀའ་བློན་མཆོག་ནས་སྒྲོག་སབྱངས་གནང་བཞིན་པ།
ཐེངས་འདིའི་མཛད་སྒོར་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། རང་དབང་ཅན་གྱི་སྡེ་ཚན་ཁག་གི་འགན་འཛིན། སྤྱི་འཐུས་རྣམ་པ། ལྷན་ཁང་སོ་སོའི་དྲུང་ཆེ་ཆུང་རྣམ་པ། དེ་བཞིན་གཞུང་ཞབས་རྣམ་པ་དང་། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་འགན་འཛིན་དང་སེར་སྐྱ་མི་མང་རྣམས་དགུང་གསར་ཆོས་ཕྱོགས་ཀྱི་ཚེས་གཏོར་དུ་བཅར་བཞུགས་གནང་ཡོད་འདུག
བོད་གཞུང་ཟློས་གར་ཚོགས་པའི་གར་ཕྲུག་པས་གར་གཟིགས་འབུལ་ཞུ་བཞིན་པ།
བོད་ཚེས་ ༣ ཉིན་གྱི་སྔ་དྲོ་ཆུ་ཚོད་ ༨ པའི་ཐོག་ལྷ་རྒྱལ་རི་རྟེན་མཁར་དུ་༸རྒྱལ་བའི་བཞུགས་ཁྲི་རིན་པོ་ཆེར་མཇལ་དར་སྒྲོན་འབུལ་གནང་བ་དང་ཆབས་ཅིག་གནས་ཆུང་དགེ་འདུན་པ་དབུ་བཞུགས་ཐོག་བླ་མ་ལྷ་སྲུང་ཡུལ་ལྷ་གཞི་བདག་རྣམས་ལ་བསངས་མཆོད་འབུལ་ལམ་ཞུས་པ་དང་། མི་མང་རྣམས་པས་གཅིག་རྗེས་གཉིས་མཐུད་ཀྱི་༸རྒྱལ་བའི་སྐུ་ཕྱྭ་དང་བོད་བསྟན་སྲིད་ཀྱི་སླད་དུ་སྐུ་རླུང་དར་འཛུགས་སོགས་དཀར་ཕྱོགས་སྐྱོང་བའི་ཆོས་སྲུང་ཁག་གི་ཐུགས་དམ་གནས་བསྐུལ་སྐྱོར་འདོན་བྱས་པ་དང་། བསངས་མཆོད་ཀྱི་ཆོ་ག་གྲུབ་མཚམས་སེར་སྐྱ་མི་མང་རྣམས་པས་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས་དཀར་ཕྱོགས་སྐྱོང་བའི་ལྷ་སྲུང་རྣམས་ཀྱིས་དབུ་འཕང་དགུང་ལ་འདེགས་སླད་ལྷ་རྒྱལ་འཐེན་ཏེ་བསངས་གསོལ་གྱི་མཛད་སྒོ་གྲུབ་པ་བཅས་ཀྱི་གནས་ཚུལ་དུ།
