༢༠༡༢ ཟླ་ ༡༠ ཚེས་ ༡༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༡༡ ཉིན་སྤྱིི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨ་རིའི་ཝར་ཇི་ནི་ཡ་(Virginia)མངའ་སྡེའི་གྲོང་ཁྱེར་ཆར་ལོ་སི་ཝེ་ལི་(Charlottesville) ཁུལ་དུ་ཆིབས་སྒྱུར་བསྐྱངས་ཏེ་ཝར་ཇི་ནི་ཡའི་གཙུག་ལག་སློབ་ཁང་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་སྨན་དང་བྱམས་བརྩེའི་སྐོར་གྱི་དམིགས་བསལ་བགྲོ་གླེང་ལྷན་ཚོགས་ཐོག་བཀའ་སློབ་བཀའ་དྲིན་སྩལ་ཡོད་པ་མ་ཟད། ཆར་ལོ་སི་ཝེ་ལིའི་མང་ཚོགས་ལའང་ལམ་སྟོན་བཀའ་སློབ་སྩལ་ཡོད།
དེ་ཉིན་གྱི་ཕྱེད་ཡོལ་མགོན་པོ་གང་ཉིད་མཆོག་གིས་ཝར་ཇི་ནི་ཡ་དང་དེའི་ཉེ་འཁོར་དུ་གནས་སྡོད་བོད་རིགས་ ༤༠༠ ཙམ་ལ་མཇལ་ཁ་དང་བཀའ་སློབ་སྩལ་དོན། ཁྱེད་རང་ཚོ་ཚང་མར་འཚམས་འདྲི་ཡོད། ལོ་ངོ་སྟོང་ཕྲག་ཁ་ཤས་ནང་ད་ལྟའི་དུས་ཚོད་འདི་ལས་སྡུག་པ་ཞིག་ཧ་ལམ་བྱུང་མྱོང་མེད་པ་ལྟ་བུ་བཤད་ཆོག་གི་རེད། ཧ་ལམ་ང་ཚོའི་མི་རིགས་རིག་གཞུང་དང་བཅས་པ་རྩ་རླག་འགྲོ་རྒྱུའི་ཉེན་ཁ་མེད་པ་མ་རེད། འདི་ལྟ་བུའི་དུས་ཚོད་ལ་བསླེབས་ཡོད། འོན་ཀྱང་འདས་པའི་ལོ་ ༦༠ རིང་ལ་ང་ཚོས་ཕྱིར་མིག་ཅིག་བལྟས་ན། བོད་མི་རིགས་ཀྱི་སེམས་ཤུགས་དང་སྙིང་སྟོབས་རྩ་བ་ནས་ཉམས་མེད་པ་ཧ་ཅང་གསལ་པོ་རེད། དཀའ་ངལ་དེ་ལྟ་བུའི་འོག་ཁྱ་རེ་ཁྱོ་རེ་བྱས་ཏེ་བསྡད་ཡོད། བོད་པའི་སེམས་ཤུགས་གཅོག་ཆེད་འཇམ་རྩུབ་སོགས་ཐབས་ཤེས་སྣ་ཚོགས་བྱེད་བཞིན་ཡོད་ཀྱང། བོད་པའི་སེམས་ཤུགས་ཉམས་མེད། གང་ཡིན་ཞེ་ན། ང་ཚོར་བདེན་པ་ཡོད། འདི་ལྟ་བུའི་དུས་ཚོད་འདིར་ང་ཚོ་བོད་པ་ཚོ་ད་བར་ཧ་ཅང་ཡག་པོ་བརྗོད་དགོས་རེད། ད་ལྟ་སྲིད་སྐྱོང་གིས་གསུངས་པ་ལྟར། གཙོ་ཆེ་ཤོས་གཞིས་ལུས་རྒྱ་ཆེའི་མི་མང་སེམས་ཤུགས་ཧ་ལས་པའི་ཆེན་པོ་རེད། བོད་ནང་གི་རྒྱ་ཆེའི་མི་མང་རྣམས་དོན་གྱི་བདག་པོ་རེད། ཁོང་རྣམས་ཀྱི་སེམས་ཤུགས་ནམ་ཡང་ཞུམ་པ་མེད་པའི་ཐོག་གནས་ཡོད། དེ་བཞིན་ང་ཚོ་བཙན་བྱོལ་དུ་ཡོད་མཁན་ཚོ་ཡིན་ནའང་ཡག་ཐག་ཆོད་བརྗོད་དགོས་རེད། ལོ་ ༥༣ འགྲོ་བཞིན་ཡོད། སྐབས་རེ་ང་ཚོས་ལས་ཀ་རིགས་ཁ་ཤས་ལ་བསམ་བློ་བཏང་ན། ཧ་ལམ་ང་ཚོ་སོ་སོའི་ལུང་པར་ཡོད་སྐབས་ལས་ཀྱང་ལས་ཀ་ཚགས་ཚུད་པ་དང་སྤུས་དག་པ་ཡོད་པ་ཕལ་ཆེར་བརྗོད་ཆོག་གི་རེད། བོད་ནང་གི་འབྲོག་པ་ཚོར་ཡང་ཤོད་ཀྱི་ཡོད། ད་ལྟའི་དུས་ཚོད་འདི་སྐད་ལོག་རྒྱག་རྒྱུའི་དུས་ཚོད་མ་རེད། ད་ལྟའི་དུས་ཚོད་འདི་སློབ་སྦྱོང་ཐོག་རིག་པ་སྒྲིམ་ཤུགས་བརྒྱབ་སྟེ་སློབ་སྦྱོང་དང་ལག་རྩལ་སོགས་གང་ཅིའི་ཐད་ལ་ཡིན་རུང་སོ་སོ་རང་གིས་འགན་ཆ་ཚང་ཞིག་འཁྱེར་ཐུབ་པ་ཙམ་མ་ཟད། རྒྱ་མི་རིགས་ཀྱི་དེང་དུས་ཀྱི་ཤེས་ཡོན་སླེབས་སར། ང་ཚོ་བོད་པ་ཆ་ཚང་སླེབ་ཐུབ་པ་ཞིག་བྱེད་དགོས་ཀྱི་རེད་ཅེས་ཤོད་ཀྱི་ཡོད།
ང་ཚོ་བཙན་བྱོལ་ནང་ཡོད་མཁན་ཚོ་ཡིན་ནའང་སྐད་ཡིག་ཤེས་པ་ཙམ་དང་སྤྱིར་བཏང་སློབ་གྲྭ་ཐོན་ཙམ་མིན་པར། རིགས་གཅིག་རྐང་འཛིན་བྱས་ཏེ་སོ་སོ་ལས་རིགས་གང་དང་གང་ནང་ཡོད་ནའང་། དེར་སོ་སོས་འགན་ཆ་ཚང་ཞིག་འཁྱེར་ཐུབ་པ་ཞིག་ང་ཚོར་དགོས་ཀྱི་འདུག་ཅེས་སྔོན་མ་ནས་བཤད་ཡོད། དེར་བརྟེན་ང་ཚོ་ཚང་མས་དུས་ཚོད་འགྱུར་བ་འགྲོ་གི་ཡོད་པ་མཐོང་ཆོས་སུ་ཡོད་ལ་འཛམ་གླིང་འདིའི་ཆོས་ཉིད་རེད། འདི་ལྟ་བུ་འགྲོ་བཞིན་པའི་སྐབས་ང་ཚོས་དེ་ལུགས་ཀྱི་སློབ་སྦྱོང་ཐོག་ནས་གྲ་སྒྲིག་བྱེད་རྒྱུ་དེ་ཧ་ཅང་གལ་ཆེན་པོ་རེད། ཅེས་བཀའ་སློབ་སྩལ་ཡོད་པ་མ་ཟད། ༸གོང་ས་མཆོག་གིས་སྔ་ལོ་མགོན་པོ་གང་ཉིད་མཆོག་གི་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་མི་མང་གིས་འོས་འདེམས་བྱས་པའི་འགོ་ཁྲིད་ཚོར་རྩིས་སྤྲོད་མཛད་པ་དེ་ནི་མགོན་པོ་གང་ཉིད་མཆོག་སེམས་ཤུགས་ཆགས་པ་དང་། ཡང་ན་བོད་དོན་ཐོག་རེ་བ་བརླག་པ་སོགས་ལ་བརྟེན་ནས་རྩིས་སྤྲོད་མཛད་པ་ཞིག་མིན་པར། ཕྱི་ནང་གི་གནས་ཚུལ་མང་པོ་ཞིག་ལ་བསྟུན་ཏེ་བཟང་ཕྱོགས་ཀྱི་འགྱུར་བ་ཞིག་ཕྱིན་ཡོད་སྐོར་བཀའ་སློབ་སྩལ་བ་དང་ལྷན། མཛད་སྒོ་དེའི་ཐོག་ཕེབས་པའི་སྲིད་སྐྱོང་བློ་བཟང་སེང་གེ་མཆོག་གིས་༸གོང་ས་མཆོག་གི་ཐུགས་རེ་ལྟར་གང་ཡོང་ཅི་ཡོང་གནང་ཡོད་སྐོར་བཀའ་སློབ་སྩལ་དོན། བློ་བཟང་སེང་གེ་ལགས་ཀྱིས་ཀྱང་འགན་འཁྱེར་ཏེ་ད་བར་གཙོ་ཆེ་ཤོས་རྒྱ་གར་གཞུང་གིས་མཚོན་ཕྱི་ཕྱོགས་སུ་འབྲེལ་བ་བྱེད་རྒྱུ་དེ་དག་ཧ་ཅང་ཡག་པོ་ཡོང་གི་འདུག རྩ་བའི་འབྲེལ་བ་ཡག་པོ་ཆགས་ཡོད་སྟབས། བློ་བཟང་སེང་གེ་ལགས་ཀྱིས་བརྗོད་པ་ལྟར་རེད། རེ་འདུན་ཞུས་པའི་གྲས་ཏག་ཏག་དགོངས་བཞེས་གནང་བ་ཧ་ཅང་ཡག་པོ་བྱུང་སོང། དེ་བཞིན་ཨ་རིའི་སྲིད་གཞུང་དང་ཡུ་རོབ་སོགས་ཀྱི་གྲོས་ཚོགས་ཀྱི་འཐུས་མི་རྣམས་ཐུག་རྒྱུ་བྱུང་བ་དེ་དག་ཧ་ཅང་ཡག་པོ་བྱུང་འདུག དེ་དག་མུ་མཐུད་ནས་འདི་ལྟར་འགྲོ་གི་རེད། གང་ལྟར་ང་ཚོ་མང་གཙོའི་ཐོག་འགྲོ་རྒྱུ་དེ་འཛམ་གླིང་འདིའི་སྟེང་ངོམ་ཆོག་པ་ཞིག་ཆགས་ཡོད། གཙོ་ཆེ་ཤོས་རྒྱ་ནག་གཞུང་ལ་ང་ཚོས་ལུགས་སྲོལ་རྙིང་པར་འཐམ་ནས་འགྲོ་གི་མེད་པ་དང་།
ང་ཚོས་གསར་བརྗེར་མ་དགའ་བ་བྱས་ནས་འདི་གར་འཐབ་རྩོད་བྱེད་ཀྱི་ཡོད་པ་ཞིག་མིན་པར། གང་ལྟར་ང་ཚོས་དེང་རབས་དང་མཐུན་པ་མང་གཙོའི་ལམ་ཞིག་གི་སྟེང་འགྲོ་གི་ཡོད་པ་མཐོང་སྐབས། དངོས་གནས་མ་འདྲ་བ་ཞིག་འདུག རྒྱ་མིས་ཏཱ་ལའི་བླ་མ་བདུད་རེད་ཅེས་བརྗོད་ཀྱི་ཡོད། ངོས་ཀྱིས་བདུད་ཡིན། ངོས་ཀྱི་མགོ་ལ་རྭ་ཅོ་ཡོད་ཅེས་བརྗོད་ཀྱི་ཡོད། གང་ལྟར་བདུད་སྡུག་ཅག་ཅིག་མིན་པར་བརྒྱ་ཆ་བརྒྱ་མང་གཙོའི་ལམ་ཐོག་འགྲོ་མཁན་བདུད་ཅིག་ཆགས་ཡོད། དེར་བརྟེན་ཆབ་སྲིད་ཀྱི་ཐོག་འགྱུར་བ་ཕྱིན་པ་དེ་དགོས་པ་རྒྱུ་མཚན་དང་ཕྱོགས་མང་པོ་ཞིག་ལ་བསམ་བློ་བཏང་སྟེ་འགྱུར་བ་བཏང་བ་ཞིག་རེད། འདི་ལོ་ཕྱི་ཟླ་ ༢ པར་དུས་འཁོར་དབང་ཆེན་ཚར་རྗེས་ངོས་ཀྱི་མིག་གཡོན་མ་དེ་གཤག་བཅོས་བྱས་པ་ཡིན། སྤྱིར་བཏང་མིག་འབྲས་ལ་སྐྱོན་རྩ་བ་ནས་མེད། འོན་ཀྱང་མིག་སྒྲིབ་ལྟ་བུ་སླེབས་འདུག་པ་དེ་གཤག་བཅོས་བྱས་རྗེས་མིག་གིས་ཧ་ཅང་གསལ་པོ་མཐོང་གི་འདུག ངོས་རང་ལྡི་ལིར་ངལ་གསོ་བརྒྱབ་ནས་བསྡད་ཡོད། དེ་དུས་བི་བི་སི་གསར་འགོད་པ་སྐྱེས་དམན་ཞིག་དེ་སྔ་ངོས་རང་ཐུག་མྱོང་ཡོད་ཅེས་བརྗོད་ཀྱི་འདུག ངོས་ཀྱིས་ཁོང་ལ་རྩེད་མོ་དང་སྦྲགས་ངོས་ཀྱི་མིག་གཤག་བཅོས་བྱས་ཏེ་ཧ་ཅང་གསལ་པོ་འདུག་པ་མ་ཟད། ཁྱེད་རང་གི་དཔྲལ་བའི་སྟེང་གི་གཉེར་པ་དེ་དག་མཐོང་གི་འདུག་ཅེས་བརྗོད་པ་ཡིན།
འོན་ཀྱང་ཚུར་ཕྱོགས་འདིར་མཐོང་གི་མི་འདུག་ཅེས་བརྗོད་སྐབས། ཁོང་གིས་ཀྱང་ངོས་ལ་རྩེད་མོ་དང་སྦྲགས་མིག་གཡས་པ་མ་མཐོང་བ་དེར་དགའ་བ་ཡོད་ཅེས་བརྗོད་བྱུང། དེ་ནས་ཟླ་བ་བདུན་པའི་ནང་མིག་གཡས་པའི་སྒྲིབ་དེ་ཡང་གཤག་བཅོས་བྱས་སྟབས་ཧ་ཅང་གསལ་པོ་ཆགས་ཡོད། གང་ལྟར་ངོས་ཀྱི་མིག་གཤག་བཅོས་ཏེ་ཧ་ཅང་ཕན་ཐོགས་བྱུང་། བློ་བདེ་པོ་བྱོས། སྤྱིར་བཏང་གཟུགས་པོ་བདེ་ཐག་ཆོད་ཡིན། རྒྱ་གར་དུ་སྐྱེས་ཚར་བྱུང་བའི་སྲིད་སྐྱོང་བློ་བཟང་སེང་གེ་ལགས་ཀྱིས་འགན་འཁྱེར་གྱི་ཡོད། དེ་སྔོན་ངོས་ཀྱིས་བློ་བཟང་སེང་གེ་ལགས་སུ་རྩེད་མོ་བརྩེས་ཏེ་བོད་ཡིག་དང་བོད་སྐད་སློབ་ཆུང་གི་བོད་སྐད་ལྟ༌བུ་རྒྱག་གི་འདུག ཅེས་བརྗོད་ཀྱི་ཡོད། ད་ཆ་ཧ་ཅང་ཡག་ཏུ་ཕྱིན་འདུག དེང་དུས་ཀྱི་ཤེས་ཡོན་ཐོག་ཡ་ང་བག་ཚ་བྱ་རྒྱུ་ཕལ་ཆེར་མེད། ཧ་ཅང་ཡག་པོ་རེད། ཚང་མ་བློ་བདེ་པོ་བྱོས། ང་ཚོ་མི་རབས་གཅིག་གི་རྗེས་ལ་གཅིག་གིས་མཐུད་ཡོང་གི་ཡོད་པར་བརྟེན། ང་ཚོ་ཧ་ཅང་བརྟན་པོ་ཆགས་ཀྱི་ཡོད། ཁྱེད་རང་ཚོ་མི་མང་ཚོ་ཡིན་རུང་ཆིག་སྒྲིལ་གྱི་ནུས་པའི་ཐོག་ཚང་མས་ཕྱར་གྲུ་མཉམ་འདེགས་བྱ་རྒྱུ་ཧ་ཅང་གལ་ཆེན་པོ་ཡིན་པ་སེམས་ལ་འཇོག་རོགས། ཐུགས་རྗེ་ཆེ་བཀྲ་ཤིས་བདེ་ལེགས། ཞེས་བཀའ་སློབ་སྩལ་ཡོད། །
