༢༠༡༢ ཟླ་ ༡༠ ཚེས་ ༡༥ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༡༠ ཚེས་ ༡༡ ཉིན་༸གོང་ས་མཆོག་གིས་ཨ་རིའི་ཝིར་ཇི་ནི་ཡ་མངའ་སྡེའི་གྲོང་ཁྱེར་ཆར་ལོ་སི་ཝི་ལིའི་ Charlottesville ནང་རྟེན་གཞི་བྱས་པའི་ཝིར་ཇི་ནི་ཡའི་གཙུག་ལག་སློབ་ཁང་University of Virginia གི་པེ་ར་མོན་ཌི་ Paramount Theatre ཚོགས་ཁང་ཆེན་མོའི་ནང་ ཆིབས་སྒྱུར་བསྐྱངས་སྐབས། ས་གནས་བོད་མི་ཚོས་ལག་ཏུ་དཀར་གཙང་མཇལ་དར་ཐོགས་ཏེ་ཕེབས་བསུ་གཟབ་རྒྱས་ཞུས། དེ་རྗེས་མགོན་པོ་གང་ཉིད་མཆོག་ཚོགས་ཁང་དུ་༸ཞབས་སོར་འཁོད་མཚམས་ཆར་ལོ་སི་ཝི་ལིའི་གྲོང་སྡེའི་སྤྱི་ཁྱབ་པ་ Mayor སྐུ་ཞབས་སཏ་ཨིན་ཌ་ར་ཧུ་ཇ་ Satyendra Huja. མཆོག་གིས་ཕེབས་བསུའི་སྣེ་ལེན་གཟབ་རྒྱས་ཞུས། ཚོགས་ཁང་ནང་ཝིར་ཇི་ནི་ཡའི་གཙུག་ལག་སློབ་གྲྭའི་སྨན་གཅོས་ལྟ་སྐྱོང་གི་ཤེས་ཡོན་ཚན་པའི་འགན་འཛིན་སྐུ་ཞབས་ལེ་སི་ལི་བྷི་ལེཀ་ཧལ་ Prof. Leslie Blackhall
མཆོག་དང་། ཝིར་ཇི་ནི་ཡའི་གཙུག་ལག་སློབ་གྲྭའི་སྨན་གཅོས་ལྟ་སྐྱོང་གི་ཤེས་ཡོན་ཚན་པའི་གཙུག་ལག་སློབ་དཔོན་སྐུ་ཞབས་ཇོར་ཇི་བྷེ་ལར་ Prof. George Beller མཆོག ཝིར་ཇི་ནི་ཡའི་གཙུག་ལག་སློབ་གྲྭའི་སྨན་གཅོས་ལྟ་སྐྱོང་གི་ཤེས་ཡོན་ཚན་པའི་གཙུག་ལག་སློབ་དཔོན་སྐུ་ཞབས་ཌོ་རི་ཀེ་ཕོན་ཊེན་ Prof. Dorrie K. Fontaine མཆོག ཝིར་ཇི་ནི་ཡའི་གཙུག་ལག་སློབ་གྲྭའི་གོ་ལའི་འཕྲོད་བསྟེན་ལྟ་སྐྱོང་ཚན་པའི་འགན་འཛིན་གཙུག་ལག་སློབ་དཔོན་སྐུ་ཞབས་རི་ཆ་ཌི་གུ་རེན་ཌི་མཆོག་ Prof. Richard Guerrant སོགས་མཉམ་ཞུགས་གནང་ཡོད། དེ་ཡང་བགྲོ་གླེང་ལྷན་ཚོགས་སྐབས་ཀྱི་བརྗོད་གཞི་གཙོ་བོ་ནི། དུས་རབས་ཉེར་གཅིག་པའི་སྨན་བཅོས་ལྟ་སྐྱོང་གི་ལམ་ལུགས་ནང་བྱམས་བརྩེའི་གལ་གནད། ཅེས་པ་དེ་ཡིན། སྐབས་དེར་༸གོང་ས་མཆོག་གིས་བཀའ་སློབ་སྩལ་དོན། ཆོས་གྲོགས༌ཕོ་མོ་ཚོ། ངོས་རང་ཁྱེད་རྣམ་དང་མཇལ་བ་ཧ་ཅང་དགའ་པོ་བྱུང་བས་ཚང་མར་འཚམས་འདྲི་ཞུ་རྒྱུ་དང། ངོས་རང་སྨན་བཟའ་མྱོང་བ་ཙམ་ལས་སྨན་པ་ཞིག་མིན་སྟབས། སྨན་བཅོས་ཐོག་ཉམས་མྱོང་ཕྲན་བུ་ལས་མེད། ཅེས་ཞལ་ཤོབ་མཛད་པ་དང་སྦྲགས། མུ་མཐུད་བཀའ་སློབ་སྩལ་དོན། སྨན་པས་བྱམས་བརྩེའི་རྣམ་པ་སྟོན་ཚེ། ང་ཚོའི་སེམས་ལྷོད་ལ་བབ་སྟེ་སེམས་ནང་གདེང་ཚོད་ཡོང་བཞིན་པ་ནི་སྨན་པ་གཏུག་མཁན་གྱི་ནད་པ་ཚང་མར་ཉམས་མྱོང་ཡོད། ལུས་པོའི་འཕྲོད་བསྟེན་ནི་སེམས་དང་འབྲེལ་བ་ཡོད། སེམས་ཞི་བདེ་ལྷོད་པོ་ཡོད་ན། ལུས་ནད་ཀྱིས་མནར་ནའང་དྲག་སྐྱེད་མགྱོགས་པོ་ཡོང་རྒྱུ་ཡིན། ཞེས་བཀའ་སློབ་སྩལ་རྗེས་ཝིར་ཇི་ནི་ཡའི་གཙུག་ལག་སློབ་གྲྭའི་སྨན་གཅོས་ལྟ་སྐྱོང་གྱི་ཤེས་ཡོན་ཚན་པའི་གཙུག་ལག་སློབ་དཔོན་སྐུ་ཞབས་ཌོ་རི་ཀེ་ཕོན་ཊེན་མཆོག་གིས་སྨན་ཁང་ནང་བྱམས་བརྩེའི་ལྟ་སྐྱོང་། ཞེས་པའི་ལས་གཞི་དངོས་སུ་ནད་པ་ཚོར་སྨན་པས་ལག་བསྟར་བྱེད་སྐབས་ནང་ཆོས་ནས་གསུང་པའི་དྲན་པ་ཉེར་བཞག་གི་བསམ་བློ་དེས་ཕན་ཐོགས་ཧ་ཅང་ཡོད་སྐོར་གསུང་སྐབས། ༸གོང་ས་མཆོག་གིས་སེམས་ཆགས་སྡང་དྲག་པོའི་གཞན་དབང་དུ་སོང་བ་དང། སེམས་མ་སྐྱིད་པ་ཧ་ཅང་བྱུང་སྐབས་བསམ་བློ༞་བཟང་ཕྱོགས་ཐོག་ལམ་སེང་འགྲོ་ཐུབ་རྒྱུ་ཁག་པོ་ཡིན་པ་དང། སྐབས་དེར་དབུགས་འབྱུང་རྔུབ་དང་འབྲེལ་བའི་ནང་ཆོས་ནས་གསུང་པའི་སེམས་གནས་ཐབས་ཀྱི་ཏིང་ངེ་འཛིན་དགུ ཞེས་པ་ཉམས་ལེན་བྱེད་ཐུབ་ཚེ་ཕན་ཐོགས་ཧ་ཅང་ཡོད་སྐོར་བཀའ་སློབ་སྩལ། ཕྱོགས་མཚུངས་༸གོང་ས་མཆོག་གིས་འཆི་བའི་གནས་སྐབས་དང་འབྲེལ་ནས་བཀའ་སློབ་སྩལ་དོན། འཆི་བ་ནི་མི་ཚེའི་ཆ་ཤས་ཤིག་ཡིན་པར་ངོས་འཛིན་ཐུབ་རྒྱུ་ཧ་ཅང་གལ་ཆེན་པོ་ཡིན། བསམ་བློ་དེར་ང་ཚོས་གོམས་འདྲིས་བསྟེན་ཐུབ་པ་ཡིན་ན། མཐར་ང་ཚོ་འཆི་བའི་གནས་སྐབས་སུ་དེ་ཙམ་དངངས་སྐྲག་མི་ཡོང་བར་སེམས་དལ་ལྷོད་ཡོང་རྒྱུར་ཧ་ཅང་ཕན་ཐོགས་ཡོད། ཚེ་ཕྱི་མ་ཁས་ལེན་མིན་ལ་མ་ལྟོས་པར་མི་ཚེ་དོན་དང་ལྡན་པ་ཞིག་བསྐྱལ་རྗེས་མཐར་འཆི་བའི་གནས་སྐབས་སུ་བློ་བདེ་པོ་བྱས་ནས་འགྲོ་ཆོག་གི་རེད། ཅེས་བཀའ་སློབ་སྩལ། འཆི་བའི་གནས་སྐབས་སུ་ཀུན་སློང་བཟང་པོ་ཞིག་འཁྱེར་ན། ཚེ་ཕྱི་མར་སྐྱེ་བ་བཟང་པོ་ཞིག་ལེན་རྒྱུ་ཧ་ཅང་ཐག་ཆོད་པ་ཞིག་རེད། བྱམས་བརྩེའི་ཐོག་ནས་ནད་པར་སྨན་བཅོས་བྱ་རྒྱུ་དེ་ཕན་ཐོགས་ཆེན་པོ་ཡོད་པ་ཡོངས་གྲགས་ངོས་འཛིན་བཞིན་ཡོད། འོན་ཀྱང་ཐབས་ལམ་འདི་གོང་འཕེལ་ཇི་ལྟར་གཏོང་ཐུབ་མིན་ཐོག་ང་ཚོས་ཉམས་ཞིབ་མང་ཙམ་བྱས་ཏེ་ད་ལྟའི་སྨན་བཅོས་ལྟ་སྐྱོང་ནང་མ་འདེང་པའི་ཆ་དེ་དག་བཀང་ཐུབ་རྒྱུར་བསམ་བློ་གཏོང་དགོས། འཛམ་གླིང་ནང་མང་གཙོའི་ལམ་ལུགས་ཚད་མཐོ་ཤོས་ཡོད་པའི་ཨ་རིའི་རྒྱལ་ཁབ་ཏུ་སྨན་བཅོས་ལྟ་སྐྱོང་གི་ལས་གཞི་འདིའི་ཐབས་ལམ་རྣམ་པ་འདྲ་མིན་འཚོལ་ཞིབ་ཀྱིས་ཡར་རྒྱས་གཏོང་རྒྱུ་གལ་ཆེན་པོ་ཆགས་ཡོད། མི་ཚེ་བདེ་ནས་བདེ་བར་འགྲོ་བའི་རྒྱུ་གཙོ་བོ་ནི་སྙིང་ཐག་པ་ནས་གཞན་དོན་འབའ་ཞིག་ཆེད་བསམ་བློ་གཏོང་རྒྱུ་དེ་ཡིན། རང་ལ་བྱམས་བརྩེའི་བསམ་པ་ཡོད་ཚེ་སེམས་ནང་ཁོང་ཁྲོ་དང་ཕྲག་དོག ཆགས་སྡང་སོགས་ཀྱི་སྐབས་མེད། དེར་བརྟེན་ཁྱིམ་ཚང་ནས་རྒྱལ་ཁབ་ཀྱི་ཞི་བདེ་ཡོང་མིན་ནི་གཙོ་བོ་བྱམས་བརྩེའི་བསམ་པར་རག་ལུས་ཡོད། ཅེས་སོགས་བཀའ་སློབ་སྩལ། ཉིན་གུང་ལྗགས་སྨིན་གྲུབ་བསྟུན། ༸གོང་ས་༸སྐྱབས་མགོན་ཆེན་པོ་མཆོག་གིས་སྲིད་སྐྱོང་བློ་བཟང་སེང་གེ་མཆོག་དང་ལྷན་ས་གནས་བོད་རིགས་ཁག་གཅིག་ལ་བླང་དོར་བཀའ་སློབ་སྩལ་ཡོད། ཚོགས་ཁང་དུ་མི་གྲངས་ ༡༡༠༠ ལྷག་བཅར་ཡོད། བགྲོ་གླེང་གྲུབ་བསྟུན། མགོན་པོ་གང་ཉིད་མཆོག་གིས་ཆར་ལོ་སི་ཝི་ལིའི་ཚོམས་ཆེན་དུ་མི་གྲངས་ ༣༥༠༠ ལ་འཇིག་རྟེན་སྤྱི་ལ་སྨན་པའི་བཟང་སྤྱོད། ཅེས་པའི་བརྗོད་གཞིའི་ཐོག་བཀའ་སློབ་སྩལ་ཡོད་པ་བཅས།།