ཕྱི་ལོ་ ༢༠༠༩ ཟླ་ ༢ ཚེས་ ༢༠ རེས་གཟའ་པ་སངས།
༄༅། །རིགས་ལམ་སློབ་གཉེར་ཁང་གི་རིག་གནས་རབ་འབྱམས་པ་སྐུ་ཞབས་ཡེ་ཤེས་དགའ་པ་ལགས་ནས་གུང་གསེང་དང་སློབ་ཞོར་དུ་ངལ་བར་ཞུམ་མེད་ངང་ནས་རང་ཡུལ་རང་གཅེས་ཀྱི་ཐོག་ནས་ལོ་རྒྱུས་སྨྲ་བ་པོ་མང་པོ་ཞིག་ལོ་རེ་ནས་ལོ་རེ་དང་ཟླ་རེ་ནས་ཉིན་རེ་བཅས་སུ་མ་བསྡད་པར་ཇེ་ཉུང་དུ་འགྲོ་མུས་ལ་བརྟེན་ཁོང་ནས་རྒན་རབས་རྣམ་པའི་དྲུང་ནས་ངག་རྒྱུན་ཐོག་བཤད་སྲོལ་ཡོད་རིགས་ཁག་དུས་ཚོད་ཁོམ་མིན་ལ་མ་བལྟོས་པར་རག་ཟིན་དང་། ཕྱོགས་བསྡུས། དེ་ནས་ཕྱོགས་སྒྲིག་བཅས་བྱས་པ་སོགས་དུས་རིམ་དེ་དག་བརྒྱུད་དེ་རྒྱ་ཆེའི་ཀློག་པ་པོ་རྣམས་ཀྱི་སྤྱན་ལམ་དུ་དེབ་འདི་འགྲེམས་སྤེལ་ཐུབ་པ་བྱུང་འདུག
བན་དེ་ཁོང་ནས་བརྩམས་པའི་འབའ་ཐང་གི་ལོ་རྒྱུས་སྲིད་པ་རྒན་པོའི་ངག་སྒྲོས་སེམས་ཀྱི་ཉི་ཟླའི་ཞེས་པའི་དཔེ་དེབ་འདིར་ཤོག་གྲངས་ ༣༧༠ དང་། དོན་ཚན་བདུན་ནང་ཕྱོགས་སྒྲིག་གནང་འདུག དོན་ཚན་དང་པོ། བོད་ཀྱི་ལོ་རྒྱུས་རགས་ཙམ་གླེང་བ། དོན་ཚན་གཉིས་པ། ཁམས་ཀྱི་ལོ་རྒྱུས་རགས་ཙམ་གླེང་བ། དོན་ཚན་གསུམ་པ། འབའ་སྡེ་མངའ་རིས་ཞིང་ཁམས་སྤྱིའི་སྣོད་བཅུད་ཀྱི་བཀོད་པ། དོན་ཚན་བཞི་པ། འབའ་སྡེ་མངའ་རིས་ཞིང་ཁམས་ཀྱི་མངའ་ཁོངས་རང་བྱོན་མི་འགྱུར་བསམ་གྲུབ་ཞིང་སྐོར་རྫོང་གི་སྣོད་བཅུད་ཀྱི་སྐོར། དོན་ཚན་ལྔ་པ། ཆོས་སྡེ་ཆེན་པོ་འབའ་འཛིན་དགོན་བདེ་ཆེན་ཆོས་གླིང་གི་བྱུང་བ། དོན་ཚན་དྲུག་པ། འབའ་སྡེ་དང་འབྲེལ་བའི་ལོ་རྒྱུས་དམག་འཁྲུག་ཇི་བྱུང་གི་སྐོར། དོན་ཚན་བདུན་པ། རང་བྱོན་རྫོང་གི་སྡེ་ཤོག་བཅོ་ལྔ་དང་འབའ་འཛིན་དགོན་བདེ་ཆེན་ཆོས་གླིང་གི་སེར་སྐྱ་ཡོངས་ནས་རྒྱ་དམར་དང་འཁྲུག་འཛིང་ཐེངས་མང་བྱས་པའི་ཁྲག་དང་མིག་ཆུའི་ལོ་རྒྱུས་བཅས་སྲོང་པོའི་སྒོ་ནས་ཕྱི་རབས་ལོ་རྒྱུས་སྨྲ་བ་པོ་རྣམས་ཀྱིས་ཞིབ་འཇུག་བྱ་ཆེད་ཀྱི་གཞི་འཛིན་བྱ་ཡུལ་ལྟ་བུ་ཞིག་ཏུ་མངོན་ཡོད་པ་ནི་བརྗོད་དུ་མེད་པ་ཞིག་ཡིན།
དཔལ་ལྡན་ཆོས་རིག་བཀའ་བློན་མཆོག་ནས་དཔེ་དེབ་དབུ་འབྱེད་གནང་བཞིན་པ།
ཕྱག་དེབ་དབུ་འབྱེད་སྐབས་དཔལ་ལྡན་ཆོས་རིག་བཀའ་བློན་མཆོག་དང་། སྤྱི་འཐུས་བེ་རི་འཇིགས་མེད་དབང་རྒྱ་ལགས། སྤྱི་འཐུས་འབའ་པ་སྐལ་བཟང་རྒྱལ་མཚན་ལགས། སྤྱི་འཐུས་གསེར་རྟ་ཚུལ་ཁྲིམས་བཅས་གདན་ཞུ་གནང་འདུག སྤྱི་འཐུས་འབའ་པ་སྐལ་བཟང་རྒྱལ་མཚན་ལགས་ནས་དེབ་འདིའི་བྱུང་རིམ་བཅས་རྒྱས་བཤད་གནང་རྗེས་སྤྱི་འཐུས་གསེར་རྟ་ཚུལ་ཁྲིམས་ལགས་ནས་དེབ་འདིའི་ངོ་སྤྲོད་གསལ་་བཤད་གནང་བ་དང་། སྤྱི་འཐུས་བེ་རི་འཇིགས་མེད་དབང་རྒྱལ་ལགས་ནས་དེབ་འདིའི་ལོ་རྒྱུས་ཕྱེད་ཙམ་འགྲེལ་བརྗོད་གནང་རྗེས་སྐུ་མགྲོན་གཙོ་བོ་དཔལ་ལྡན་ཆོས་རིག་བཀའ་བློན་མཆོག་ནས་འབའ་ཐང་གི་ལོ་རྒྱུས་འདི་ལྟ་བུ་ཞིག་རྩོམ་སྒྲིག་གནང་བར་བསྔགས་བརྗོད་དང་སྦྲགས་འཚམས་འདྲིའི་མཇལ་དར་ཞིག་ཀྱང་རྩོམ་སྒྲིག་པར་སྒྲོན་ཡོད་པ་བཅས་ཀྱི་གནས་བསྡུས་སུ།།
