༢༠༡༢ ཟླ་ ༡༠ ཚེས་ ༡༡ རེས་གཟའ་ཕུར་བུ།
༄༅། །འདི་ལོའི་ཕྱི་ཟླ་ ༡༠ ཚེས་ ༢༡ ནས་ ༢༣ བར་ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རཱག་ནང་དུ་མང་གཙོ་དང་གསར་འགྱུར་བརྒྱུད་ལམ་དབར་གྱི་འབྲེལ་ལམ་ཐོག་རྒྱལ་སྤྱིའི་ལྷན་ཚོགས་ཕོ་རོམ་ ༢༠༠༠ Forum 2000 Conference ཞེས་པ་ཞིག་ཚོགས་སྐབས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཀྱང་མཉམ་ཞུགས་གནང་རྒྱུ་ཡིན་འདུག ལྷན་ཚོགས་དེ་བཞིན་དེ་སྔ་ཅེཀ་སྤྱི་མཐུན་རྒྱལ་ཁབ་ཀྱི་སྲིད་འཛིན་ཟུར་པ་སྐུ་གཤེགས་ཝག་ལེབ་ཧ་ཝེལ་ Václav Havel མཆོག་གི་མངོན་འདོད་ཡིན་འདུག ཐེངས་འདིའི་རྒྱལ་སྤྱིའི་ལྷན་ཚོགས་སྐབས་འགྲོ་བ་མིའི་ཐོབ་ཐང་དང་མང་གཙོ་སོགས་སྲིད་འཛིན་དམ་པ་མཆོག་གིས་གཙིགས་ཆེར་འཛིན་བཞིན་པའི་རིན་ཐང་དེ་དག་གོང་མཐོར་ཇི་ལྟར་གཏོང་ཐབས་བྱ་རྒྱུ་ཙམ་མ་ཟད། གཅིག་བསྡུས་དབང་འཛིན་པའི་ལམ་ལུགས་ལ་སྐྱོན་བརྗོད་བྱ་རྒྱུ། དེ་བཞིན་སྲིད་འཛིན་དམ་པ་ཁོང་གི་བོད་ཀྱི་གནད་དོན་ཐོག་སེམས་འཚབ་དང་དོ་སྣང་ཧ་ཅང་ཡོད་པར་བརྟེན། གལ་ཏེ་ཁོང་སྐུ་འཚོ་བཞུགས་ཡོད་ཚེ་སྲིད་སྐྱོང་བློ་བཟང་སེང་གེ་མཆོག་ལ་ཐེངས་འདིའི་ལྷན་ཚོགས་སུ་འཚམས་འདྲི་ཞུ་རྒྱུ་ཡིན་པ་ང་ལ་ཡིད་ཆེས་གཙང་མ་ཡོད། ཅེས་ལྷན་ཚོགས་དེའི་ཚོགས་གཙོ་སྐུ་ཞབས་ཇ་ཀུབ་ཀེལ་པལ་ (Jakub Klepal) མཆོག་གིས་ངོ་སྤྲོད་གནང་ཡོད།  གཞན་ཡང་ཚོགས་གཙོ་སྐུ་ཞབས་ཇ་ཀུབ་ཀེལ་པལ་མཆོག་གིས་མུ་མཐུད་གསུང་དོན། ངའི་བསམ་པར་མང་གཙོ་དང་འགྲོ་བ་མིའི་ཐོབ་ཐང་ལ་རྒྱབ་སྐྱོར་བྱ་རྒྱུའི་ལས་འགུལ་དེ་རྒྱལ་སྤྱིའི་ནང་མུ་མཐུད་གནས་རྒྱུ་ཞིག་ཡིན་པ་མ་ཟད། ང་ཚོའི་རྒྱལ་ནང་གནས་ཚུལ་གྱི་ཤུགས་རྐྱེན་འོག་མ་ཚུད་པར་ཅེཀ་སྤྱི་མཐུན་རྒྱལ་ཁབ་ཀྱི་ཕྱི་འབྲེལ་སྲིད་བྱུས་ནང་རིན་ཐང་དེ་དག་གནད་དོན་གཙོ་བོ་ཞིག་ཏུ་མུ་མཐུད་གནས་རྒྱུར་ཡིད་ཆེས་ཡོད། ཅེས་གསུང་ཡོད་པ་བཅས།།