ཕྱི་ལོ་ ༢༠༠༩ ཟླ་ ༢ ཚེས་ ༡༩ རེས་གཟའ་ཕུར་བུ།
༄༅། །དཔལ་ལྡན་བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་མཆོག་ཕྱི་ལོ་ ༢༠༠༩ ཕྱི་ཟླ་ ༢ ཚེས་ ༢༢ ཕྱི་དྲོ་ནས་ཕྱི་ཟླ་ ༣ ཚེས་ ༡ ཕྱི་དྲོ་བར་ལྷོ་ཕྱོགས་སྦེལ་ཀོབ་གཞིས་སྒར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཆིབས་སྒྱུར་དང་སྟབས་བསྟུན་འདུ་སྐོང་གནང་བའི་མི་མང་ཚོགས་ཆེན་དུ་གསུང་བཤད་གནང་སླད་གཞུང་འབྲེལ་ཕྱོགས་སྐྱོད་བསྐྱང་གཏན་འཁེལ་ཡོད།
དཔལ་ལྡན་བཀའ་བློན་ཁྲི་པ་མཁས་དབང་ཟམ་གདོང་བློ་བཟང་བསྟན་འཛིན་མཆོག
དེ་ཡང་དཔལ་ལྡན་བཀའ་བློན་ཁྲི་པ་མཆོག་ཕྱི་ཟླ་ ༢ ཚེས་ ༢༢ ཉིན་གྱི་ཕྱི་དྲོ་རྡ་ས་ནས་སྣུམ་འཁོར་ཐོག་པ་ཀོར་དང་དེ་ནས་མེ་འཁོར་བརྒྱུད་ལྡི་ལིར་ཕེབས་ཐོན་གྱིས་ཚེས་ ༢༣ ཉིན་ཕེབས་འབྱོར་གནང་རྒྱུ་དང་། ཕྱི་དྲོ་ལྡི་ལི་ནས་མཁའ་ལམ་བརྒྱུད་སྦེང་ལོར་དང་དེ་ནས་སྣུམ་འཁོར་བརྒྱུད་སྦེལ་ཀོབ་གཞིས་སྒར་དུ་ཕེབས་འབྱོར་གནང་རྒྱུ། ཕྱི་ཚེས་ ༢༤ ནས་ ༢༦ བར་ཉིན་གྲངས་གསུམ་རིང་རྒྱ་གར་ལྷོ་ཕྱོགས་སྦེལ་ཀོབ་གཞིས་སྒར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཆིབས་སྒྱུར་དང་སྟབས་བསྟུན་འདུ་སྐོང་གནང་རྒྱུའི་མི་མང་ཚོགས་ཆེན་དུ་གསུང་བཤད་གནང་རྒྱུ་དང་། ཕྱི་ཚེས་ ༢༦ ཉིན་རྒྱབ་སྦེལ་ཀོབ་ནས་སྦེང་ལོར་ཕེབས་ཐོན་གནང་རྒྱུས་མཚོན་ཕྱི་ཚེས་ ༢༧ དང་ ༢༨ ཉིན་གྲངས་གཉིས་རིང་སྦེང་ལོར་བཞུགས་ཞག་གནང་འཆར་དང་། དེ་རྗེས་སྦེང་ལོར་ནས་མཁའ་ལམ་བརྒྱུད་ལྡི་ལིར་ཕྱིར་ཕེབས་གནང་གྲུབ་རྗེས་རིམ་པས་གྷ་གལ་བརྒྱུད་ཕྱི་ཟླ་ ༣ ཚེས་ ༡ ཉིན་རྡ་སར་ཕེབས་འབྱོར་གནང་རྒྱུ་ཡིན་པའི་གནས་ཚུལ་དུ།།
