༢༠༡༠ ཟླ་ ༨ ཚེས་ ༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༠ ཟླ་ ༨ ཚེས་ ༢༨ ནས་ ༢༩ བཅས་ཉིན་གཉིས་རིང་ཨ་རིའི་རྒྱལ་ས་ཝ་ཤིང་ཊོན་བོད་རིགས་མཐུན་ཚོགས་ཀྱིས་གོ་སྒྲིག་འོག་ཨ་རིའི་མངའ་སྡེ་སི་ཡཱ་ཊེལ་(Seattle) ནང་ལོ་འཁོར་བོད་ཀྱི་དུས་སྟོན་ཐེངས་བཅོ་ལྔ་པ་དེ་ཚོགས་གཏན་འཁེལ་འདུག དེ་ཡང་ཨ་རིའི་རྒྱལ་ས་ཝ་ཤིང་ཊོན་བོད་རིགས་མཐུན་ཚོགས་ཀྱིས་འདི་ལོའི་བོད་ཀྱི་དུས་སྟོན་དེ་འདི་ལོ་བོད་མདོ་ཁམས་སྐྱེ་རྒུ་མདོར་ས་ཡོམ་གྱི་གོད་ཆག་ཕོག་པ་རྣམས་ལ་རྗེས་དྲན་སྲུང་བརྩི་ཞུ་ཆེད་དུ་འཚོགས་རྒྱུ་ཡིན་པའི་གསལ་བསྒྲགས་སྤེལ་ཡོད། ཉིན་གཉིས་རིང་བོད་ཀྱི་དུས་སྟོན་སྐབས་གནའ་དེང་བོད་ཀྱི་གཞས་སྣ་འཁྲབ་སྟོན་དང་ལག་ཤེས་འགྲེམས་སྟོན། བོད་ཀྱི་ཐུན་མིན་ཁ་ཟས་དང་རྣམ་གྲྭ་དགེ་འདུན་པས་རྡུལ་ཚོན་དཀྱིལ་འཁོར་བཞེང་རྒྱུ། དེ་བཞིན་དེང་དུས་བོད་མི་ན་གཞོན་ཁྲོད་ཀྱི་གཞས་པ་གྲགས་ཅན་ཁག་གཅིག་གིས་གླུ་གཞས་གཏོང་རྒྱུ་ཡིན་འདུག་པ་བཅས།།
