༢༠༡༢ ཟླ་ ༩ ཚེས་ ༢༩ རེས་གཟའ་སྤེན་པ།
༅༅། །ཕྱི་ལོ་ ༢༠༡༢ ཟླ་ ༩ ཚེས་ ༢༩ ཉིན་རྡ་ས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཆོས་རྭར་བཀའ་སྤྱི་ཐུན་མོང་གི་གོ་སྒྲིག་འོག་རྒྱལ་སྤྱི་དང་བོད་ནང་ཞི་བདེ་ཡོང་བའི་ལས་འགུལ་སྤེལ་ཡོད། དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མིའི་སྒྲིག་འཛུགས་ཀྱི་མང་གཙོའི་ཀ་བ་གསུམ་གྱི་མཛད་གཙོ་རྣམ་པ། རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་ནས་དམིགས་བསལ་ཚོགས་ཆེན་གཉིས་པར་བཅར་བའི་ཚོགས་མི་རྣམ་པ། གཞུང་འབྲེལ་མིན་པའི་ཚོགས་པ་ཁག་དང་སེར་སྐྱ་མི་མང་། སློབ་ཕྲུག་བཅས་ཁྱོན་མི་གྲངས་ ༣༠༠༠ བརྒལ་བ་ལྷན་འཛོམས་ཐོག བོད་ཀྱི་ཟློས་གར་ཚོགས་པས་བོད་རྒྱལ་ཁབ་ཆེན་མོའི་རྒྱལ་གླུ་རྔ་རོལ་དང་བཅས་ཕུལ་རྗེས་བོད་བསྟན་སྲིད་མི་རིགས་ཆེད་དུ་རང་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ལ་མྱ་ངན་གུས་འདུད་དང་ངག་བཅད་སྐར་མ་གཅིག་རིང་གནང་གྲུབ་བསྟུན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ལས་འགུལ་དང་འབྲེལ་བའི་གསུང་བཤད་གནང་དོན།
དེ་རིང་གི་ལས་འགུལ་འདི་དམིགས་བསལ་ཚོགས་ཆེན་དང་སྟབས་བསྟུན་ནས་གོ་སྒྲིག་ཞུས་པ་ཞིག་ཡིན། ལས་འགུལ་ལ་ཕེབས་པའི་སྐྱབས་གནས་དགེ་འདུན་གྱི་སྡེ་དང་མང་གཙོའི་ཀ་བ་གསུམ་གྱི་མཛད་གཙོ་ལས་ཟུར་རྣམ་པ། མི་མང་དང་སློབ་ཕྲུག་ཚང་མར་བོད་མི་མང་སྤྱི་འཐུས་ལྷན་ཚོགས་ནས་ཐུགས་རྗེ་ཆེ་ཞུ་རྒྱུ་ཡིན། དེ་རིང་གིལས་འགུལ་འདི་རྒྱལ་སྤྱི་དང་བོད་ནང་ཞི་བདེ་ཡོང་བའི་ཆེད་སྤེལ་བ་རེད། སྔ་དྲོ་༸གོང་ས་མཆོག་གིས་དབུས་བོད་བརྒྱུད་ནང་བསྟན་དང་གཡུང་དྲུང་བོན་བཅས་ཀྱི་བསྟན་བདག་བླ་ཆེན་རྣམ་པ་དབུ་བཞུགས་ཐོག་ཕྱི་ལོ་ ༢༠༠༩ ལོ་ནས་ད་བར་ང་ཚོས་ཤེས་རྟོགས་བྱུང་བའི་བོད་མི་ ༥༡ རང་ལུས་མེར་སྲེག་བཏང་བ་ནས་བོད་མི་ ༤༡ འདས་གྲོངས་སུ་གྱུར་བ་ཁོང་རྣམས་ཀྱི་ཆེད་མཆོད་འབུལ་སྨོན་ལམ་གོ་སྒྲིག་ཞུས་ཡོད། གོ་སྐབས་འདི་ལྟ་བུ་ཡང་ཡང་ཡོང་རྒྱུ་དཀོན་པོ་ཞིག་ཆགས་ཡོད། བོད་ནང་གི་བོད་མི་ཚོས་ད་བར་རྒྱ་ནག་གཞུང་ནས་དམ་བསྒྲགས་ཅན་གྱི་སྲིད་བྱུས་བཟུང་བར་ཞི་རྒོལ་གྱིས་རང་གི་གཅེས་པའི་ལུས་སྲོག་ཚུན་ཆད་བློས་བཏང་སྟེ་དཔའ་མཛངས་ལྡན་པའི་ལས་འགུལ་སྤེལ་བཞིན་ཡོད་པ་མ་ཟད། རྣམ་དཔྱོད་ལྡན་པའི་ལས་འགུལ་སྣ་མང་ཞིག་སྤེལ་དང་སྤེལ་མུས་རེད། རྩ་བའི་འཛམ་གླིང་ནང་ང་ཚོས་འཚེ་མེད་ཞི་བའི་ལས་འགུལ་སྤེལ་རྒྱུ་དང་འབྲེལ་བའི་ཐོག་ནས་ཉམས་ཞིབ་བྱེད་མཁན་དང་། དེའི་སྐོར་དེབ་འབྲི་མཁན་མང་པོ་ཞིག་བྱུང་ཡོད། ཁོང་ཚོའི་གྲས་ནས་སྔ་མོ་ང་ཚོའི་ངོ་ཤེས་ཡིན་པ་ཞིག་གིས་འཚེ་མེད་ཞི་བའི་ཐབས་ལམ་ཐོག་ནས་ལས་འགུལ་སྤེལ་རྒྱུའི་རྣམ་གྲངས་ ༡༨༩ ཙམ་ཡོད་པ་ཁོང་གིས་དེབ་ནང་བཀོད་ཡོད། བོད་ནང་དེང་སང་བོད་མི་ཚོས་རང་གི་རྣམ་དཔྱོད་ཀྱིས་འཚེ་མེད་ཞི་བའི་ཐབས་ལམ་ཐོག་ནས་ལས་འགུལ་སྤེལ་བ་དེ་ཚོ་ད་ཡོད་འཚེ་མེད་ཞི་བའི་ལས་འགུལ་རྣམ་གྲངས་ ༡༨༩ ཡོད་པའི་ཁར་སྣོན་ཐུབ་རྒྱུ་ཡིན་པ་ང་ཚོས་བརྗོད་བཞིན་ཡོད། བོད་དོན་བདེན་མཐའ་མ་གསལ་བར་ང་ཚོའི་ལས་འགུལ་མུ་མཐུད་སྤེལ་དགོས་པ་ཞིག་རེད།
ཁ་སེང་ཚོགས་ཆེན་ཐོག་ལ་ཕྱོགས་སྡོམ་རྒྱབ་གཉེར་ནང་ཞུས་པ་ལྟར་ང་ཚོ་བོད་རིགས་མི་འབོར་ཉུང་ཉུང་ཡིན་པར་བརྟེན་ད་ལྟའི་ཛ་དྲག་གནས་སྟངས་འོག་བོད་མི་གཅིག་གི་ཚེ་སྲོག་ཤོར་བ་དེ་ཡང་ཧ་ཅང་ཕངས་པོ་དང་སེམས་འཚབ་བྱེད་དགོས་པའི་གནད་དོན་ཞིག་ཆགས་ཡོད། དེར་བརྟེན་ང་ཚོས་གཞིས་ལུས་བོད་མི་རྣམས་ལ་རབ་བྱུང་ན། རང་གི་ཚེ་སྲོག་དོར་མི་དགོས་པའི་ཐོག་ནས་མི་ཚེ་ཧྲིལ་པོ་བོད་སྤྱི་པའི་དོན་དུ་ལས་འགུལ་མུ་མཐུད་སྤེལ་ཐུབ་པ་ཡིན་ན། ཧ་ཅང་ཕན་ཐོགས་ཡོང་རྒྱུ་ཡིན་པ་ངས་ཁ་སེང་དམིགས་བསལ་ཚོགས་ཆེན་ཐོག་ཞུ་རྒྱུ་བྱུང། བོད་ནང་གི་ཛ་དྲག་གནས་སྟངས་ད་དུང་མུ་མཐུད་ནས་གནས་ཡོད། བོད་ནང་ནས་ཁ་སེང་དམིགས་བསལ་ཚོགས་ཆེན་ཐོག་འབྲེལ་བ་གནང་མཁན་དང་ཞལ་པར་བརྒྱུད་ནས་གཞིས་བཞུགས་བོད་མི་ཚོའི་སེམས་ཤུགས་ནམ་ཡང་ཆག་རྒྱུ་མིན་པ་གསུངས་བྱུང། འོན་ཀྱང་རེ་ས་དང་ལྟོས་ས་གཅིག་ཡོད་པ་ནི་བཙན་བྱོལ་ནང་དུ་ཡོད་པའི་བོད་མི་ཚོ་ཡིན་པ་ཧ་ཅང་གསལ་པོ་རེད། དེར་བརྟེན་གཞིས་ལུས་བོད་མི་ཚོས་བློས་གཏོང་ཆེན་པོ་བྱས་པ་དེ་ང་ཚོས་རྒྱལ་སྤྱིའི་སྤྱི་ཚོགས་དང་འཛམ་གླིང་ཁྱོན་ཡོངས་སུ་དྲིལ་བསྒྲགས་བྱས་ཏེ་རྒྱབ་སྐྱོར་འཚོལ་ཐབས་བྱ་རྒྱུ་དེ་ང་ཚོ་མི་རེ་ངོ་རེའི་འགན་རེད། བོད་མིའི་སྒྲིག་འཛུགས་འདི་བཞིན་མི་སྒེར་རེ་ཟུང་ལ་དབང་བ་ཞིག་མ་རེད། སྒྲིག་འཛུགས་འདི་བོད་མི་ཡོད་དོ་ཅོག་གིས་དེའི་ནང་འགན་ཁུར་དགོས་པ་དེ་ཧ་ཅང་གལ་ཆེན་པོ་ཡིན།
མང་ཚོགས་ནང་གནས་ཚུལ་གསལ་པོ་བཟོ་དགོས་པ་ཞིག་ལ་བར་ལམ༸གོང་ས་༸སྐྱབས་མགོན་ཆེན་པོ་མཆོག་གིས་ཨི་ཊ་ལི་དང་ལ་དྭགས་སུ་ཐུགས་ཕམ་བྱུང་བའི་བཀའ་སློབ་ཕེབས་པ་དེ་དག་ལ་ཁ་སེང་དམིགས་བསལ་ཚོགས་ཆེན་ཐེངས་གཉིས་པའི་ཐོག་ནས་སྤྱི་མོས་ཀྱི་གྲོས་ཆོད་ཅིག་གཏན་ལ་ཕབ་ཡོད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐུགས་ཕམ་འབྱུང་གཞི་དེ་ཡང་༸གོང་ས་མཆོག་གིས་བཙན་བྱོལ་བོད་གཞུང་མེད་པ་བཟོས་སོང་། ཞེས་སྤྱི་ཚོགས་ནང་ཟེར་མཁན་དེ་ཚོས་ཐུགས་ཕམ་བྱུང་བ་མ་གཏོགས་ང་ཚོའི་སྤྱི་ཚོགས་ནང་དབུ་མའི་ལམ་དང་རང་བཙན་ལྟ་གྲུབ་ཀྱི་འགལ་ཟླའི་དབང་གིས་ཐུགས་ཕམ་བྱུང་བ་དེ་འདྲ་རྩ་བ་ནས་མ་རེད། ཅེས་འདིར་བསྐྱར་ལྡབ་ཞུ་འདོད་བྱུང། རང་བཙན་བརྗོད་སྐབས་ལོ་རྒྱུས་ཐོག་ནས་བོད་ཆོལ་ཁ་གསུམ་ཡོངས་སུ་རྫོགས་པ་རང་བཙན་ཡིན་པའི་གནས་བབ་ཡོད་ལ། བོད་ཆོལ་ཁ་གསུམ་ཡོངས་སུ་མ་འདུས་པའི་རང་བཙན་གྱི་གནས་བབ་ཡོད་པ་གསལ་པོ་རེད། ད་ལྟ་དབུ་མའི་ལམ་གྱི་སྲིད་བྱུས་དེས་བོད་ཆོལ་ཁ་གསུམ་དང་བོད་མི་རིགས་ཡོངས་རྫོགས་ལ་རང་སྐྱོང་གི་གནས་བབ་ཚད་མཐོན་པོ་ཞིག་ཐོབ་པ་ཡིན་ན། ད་ལྟའི་དངོས་ཡོད་གནས་སྟངས་ལ་གཞི་བཅོལ་བའི་ཐོག་ནས་ང་ཚོ་བོད་པའི་ངོ་བོ་དང་སྐད་ཡིག རིག་གཞུང་། ཁོར་ཡུག་དང་བཅས་པ་སྲུང་སྐྱོབ་བྱེད་ཐུབ་པའི་གནས་བབ་ཞིག་བསྐྲུན་དགོས་པ་ཡིན། དེར་བརྟེན་དངོས་ཡོད་སྟངས་ལ་གཞི་བཅོལ་བའི་ཐོག་ནས་ད་ལྟའི་ཐབས་ལམ་འདི་འཚོལ་བཞིན་ཡོད།
དེར་བརྟེན་རང་བཙན་རྩོད་མཁན་ཡིན་ནའང་ཐོབ་ཐང་ཡོད། འོན་ཀྱང་ལས་འགུལ་སྤེལ་བའི་སྐབས་སུ་ང་ཚོའི་དཀའ་ངལ་སེལ་དགོས་ན། རྒྱ་ནག་གཞུང་དང་སྐད་ཆ་མ་བཤད་པར་སེལ་ཐུབ་ཐབས་མེད་པའི་རང་བཞིན་ཆགས་ཡོད་པ་ཧ་ཅང་གསལ་པོ་རེད། དེར་བརྟེན་རྒྱ་ནག་གཞུང་ལ་ཕོག་ཐུག་གང་འདྲ་འགྲོ་བཞིན་ཡོད་མེད་ཀྱི་གནས་སྟངས་གང་འདྲ་ཆགས་གི་ཡོད་མེད་དེ་ཚོ་ཐོག་ལས་འགུལ་སྤེལ་སྐབས་བསམ་ཞིབ་བྱ་དགོས་པ་ཧ་ཅང་གལ་ཆེན་པོ་ཆགས་ཡོད། འོན་ཀྱང་གཞི་རིམ་མི་མང་ཚོས་གལ་ཏེ་འདི་ལྟ་བུའི་བསམ་ཚུལ་ཐོག་འགལ་ཟླ་ཆགས་རྒྱུའི་སེམས་ཁྲལ་ཡོད་ཚེ་སེམས་ཁྲལ་གནང་མི་དགོས། ཞེས་ཞུ་རྒྱུ་ཡིན། གང་ཡིན་བརྗོད་ན། ང་ཚོ་སྒང་ལ་སྡོད་མཁན་ཚོ་ཕན་ཚུན་འཆམ་མཐུན་ངང་གནས་བཞིན་ཡོད། དེ་བཞིན་གཞི་རིམ་མང་ཚོགས་ནང་ཁུལ་འཆམ་མཐུན་ཐོག་གནས་དགོས་རྒྱུ་གལ་ཆེན་པོ་ཡིན་པ་ལས་༸གོང་ས་མཆོག་ཐུགས་ཕམ་བྱུང་བའི་རྒྱུ་མཚན་ལ་བརྟེན་ནས་མང་ཚོགས་ནང་ལ་བསམ་ཚུལ་མ་མཐུན་པ་དང་མ་འགྲིག་པ་བྱུང་བ་ཡིན་ན་ལམ་ནོར་ཐོག་འགྲོ་གི་ཡོད། ཅེས་དེ་རིང་གསལ་པོ་བྱས་ནས་ཞུ་འདོད་བྱུང། ཞེས་གསུང་བཤད་གནང་ཡོད།
དེ་ནས་བོད་མི་མང་སྤྱི་འཐུས་ཁག་གཅིག་དང་ཕྱི་རྒྱལ་ཡུལ་གྲུ་ཁག་ནས་ཚོགས་བཅར་བའི་སྐུ་ཚབ་ཁག་གཅིག་གིས་སོ་སོ་གནས་ཡུལ་གྱི་སྐད་རིགས་ཐོག་ནས་བོད་དོན་ལས་འགུལ་གྱི་གསུང་བཤད་རིམ་པ་གནང་སྟེ་སྨོན་ལམ་གསུང་འདོན་གནང་བཞིན་ཟས་བཅད་ཐོག་ཕྱི་དྲོ་ཆུ་ཚོད་ ༣ པར་སྲིད་སྐྱོང་བློ་བཟང་སེང་གེ་མཆོག་གིས་ལས་འགུལ་དང་འབྲེལ་བའི་གསུང་བཤད་གནང་ཡོད། བོད་ཀྱི་ཟློས་གར་ཚོགས་པ་ནས་བདེན་ཚིག་སྨོན་ལམ་གསུང་སྐུལ་གྱིས་ཚང་མས་མཉམ་དུ་འུར་འདོན་གནང་སྟེ་ལས་འགུལ་གྲོལ། ད་ཐེངས་ཀྱི་ལས་འགུལ་ནང་མཉམ་ཞུགས་གནང་མཁན་ཚང་མས་བོད་མིའི་སྐྱིད་སྡུག་མཉམ་མྱོང་ཡིན། ཞེས་འཁོད་པའི་མགོ་རས་དཀར་པོ་རེ་དང་དཔུང་པར་བོད་སྐྱོབ། ཅེས་པའི་རས་ནག་པོ་རེ་དཀྲིས་ཏེ་མིས་བཟོས་པ་དང་འབྱུང་བའི་གནོད་འཚེ་ཕོག་ཡུལ་ཚང་མར་དམིགས་པ་མ་ཟད། རྒྱལ་སྤྱི་དང་བོད་ནང་ཞི་བདེ་ཡོང་ཆེད་ལས་འགུལ་སྤེལ་བ་ཞིག་ཡིན་འདུག་པ་བཅས།།
