༢༠༡༢ ཟླ་ ༩ ཚེས་  ༢༧ རེས་གཟའ་ཕུར་བུ།
༅༅། །ཕྱི་ལོ་ ༢༠༡༢ ཟླ་ ༩ ཚེས་ ༡༨ ཉིན་སྔ་དྲོ་ཆུ་ཚོད་ ༨ ཐོག་མན་སྤར་ས་གནས་འགོ་འཛིན་ལས་ཁུངས་ནས་གོ་སྒྲིག་འོག་སློབ་གྲྭ་ཁག་དང་དགོན་སྡེ་ཁག དེ་བཞིན་ཁྱབ་ཁོངས་གཞིས་གྲོང་ཁག་བདུན་ནང་སྐོར་སྐྱོད་སྐབས་སེར་སྐྱ་རྒན་གཞོན་ཚང་མས་ལས་འགུལ་ལ་ཆེ་མཐོང་ལྡན་པའི་ཐོག་ནས་ཕེབས་བསུ་ཞུ་རྗེས། གྲོང་ཁྱེར་ཨམ་སྦི་ཀ་སྤུར་གྱི་ཁྲོམ་གཞུང་དུ་ཁྲོམ་སྐོར་གནང་ཡོད། སྐབས་དེར་རྒྱ་གར་ས་གནས་ཡུལ་མི་ཚོས་བོད་དོན་ལ་གདུང་སེམས་མཉམ་སྐྱེའི་རྒྱབ་སྐྱོར་ཤུགས་ཆེ་གནང་ཡོད། དེ་ནས་ཕྱི་ཚེས་ ༡༩ ཉིན་གྲོང་ཁྱེར་ཨམ་སྦི་ཀ་སྤུར་ས་གནས་སུ་བདེན་པའི་མེ་ལྕེ་སྐོར་སྐྱོད་སྐབས་སྐུ་མགྲོན་གཙོ་བོ་ས་གནས་འཕགས་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཀྲི་ཨ་སེ་ཌེབ་ལགས་དང་གནད་ཡོད་མི་སྣ་བཅས་མཛད་སྒོར་མཉམ་བཞུགས་ཀྱིས་བདེན་པའི་མེ་ལྕེ་དང་འབྲེལ་བའི་བོད་དོན་ཐོག་ལ་གསུང་བཤད་གནང་རྗེས་མཚན་རྟགས་བསྡུ་རུབ་དང་། ཧིན་སྐད་ཐོག་བོད་དོན་དྲིལ་བསྒྲགས་ཀྱི་ཡིག་ཆ་གང་མང་འགྲེམས་སྤེལ་གནང་ཡོད། དེ་རྗེས་ཁྱོན་མི་གྲངས་ ༢༠༠ ཚང་འཛོམས་གྱིས་སྐོར་སྐྱོད་གནང་ཡོད། གཞན་ཡང་ཕྱི་ཚེས་ ༢༡ ཉིན་མན་སྤར་ནས་ཨོ་རི་ས་ཕུན་ཚོགས་གླིང་བོད་མིའི་གཞིས་ཆགས་ཀྱི་ས་གནས་འཐུས་ཚོགས་ཀྱི་ཚོགས་གཞོན་བློ་ལྡན་ལགས་དང་། ས་གནས་མཉམ་འབྲེལ་གྱི་ཚོགས་གཙོ་པདྨ་མཐར་ཕྱིན་ལགས་གཉིས་ལ་བདེན་པའི་མེ་ལྕེ་བརྒྱུད་སྤྲོད་གནང་ཡོད་པ་བཅས།།