༢༠༡༢ ཟླ་ ༩ ཚེས་ ༢༤ རེས་གཟའ་ཟླ་བ།
༄༅། །སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཞི་པ་ཕྱི་ལོ་ ༢༠༡༢ ཟླ་ ༩ ཚེས་ ༡༤ ནས་འགོ་འཛུགས་ཀྱིས་ཕྱི་ཚེས་ ༢༢ ཉིན་རྒྱལ་ཁའི་ངང་ནས་ལེགས་གྲུབ་བྱུང་ཡོད། དེ་ཡང་ཚོགས་དུས་མཐའ་མའི་ཉིན་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་མཇུག་བསྡོམས་གསུང་བཤད་གནང་དོན། རྩ་བའི་ཚོགས་འདུ་ཉིན་བརྒྱད་ལས་ཚོགས་མེད་ཀྱང་ལས་དོན་གང་ཅིའི་ཐོག་ཚགས་ཚུད་དང་མཉམ་རུབ་ཀྱི་ནུས་པ་ཤུགས་ཆེན་པོ་འདོན་ཐུབ་སོང་བསམས་ནས་ཚོགས་གཙོ་སྦྲེལ་པོས་སྤོབས་པ་བྱེད་བཞིན་ཡོད། དེ་ནི་དཔལ་ལྡན་བཀའ་ཤག་དང་བཀུར་འོས་སྤྱི་འཐུས་རྣམ་པ་ཚང་མས་ཐུགས་འགན་བཞེས་པ་ལས་བྱུང་བ་ཞིག་ཡིན། དེར་བརྟེན་འཛིན་སྐྱོང་བཀའ་ཤག་དང་བཀུར་འོས་སྤྱི་འཐུས་རྣམ་པ་ཚང་མར་ཚོགས་གཙོ་སྦྲེལ་པོས་ཐུགས་རྗེ་ཆེ་ཞུ་རྒྱུ་ཡིན། ཉིན་བརྒྱད་ཀྱི་ལས་རིམ་ནང་ཐོག་མར་ཚོགས་གཙོའི་དབུ་འབྱེད་གཏམ་བཤད་ནང་བརྗོད་པ་ལྟར་ང་ཚོས་མྱ་ངན་གུས་འདུད་གྲོས་འཆར་བཞི་ཙམ་བྱུང་ཡོད། དེའི་ནང་ནས་བོད་ནང་དུ་རང་ལུས་མེར་སྲེག་གཏོང་མཁན་ ༥༡ ཁྲོད་ནས་ ༤༡ འདས་གྲོངས་སུ་གྱུར་བ་རྣམས་ལ་བསྔོ༞་སྨོན་ཞུས་པ་ཙམ་དུ་མ་ཟད། འདས་གསོན་གཉིས་ཀའི་ནང་མི་སྤུན་མཆེད་དང། རྒྱ་ཆེ་ས་ནས་བརྗོད་ན། བོད་ས་ཡོངས་རྫོགས་བསམ་པ་གཅིག་མཐུན་ཡིན་པ་དེའི་ཐོག་ནས་ང་ཚོས་མྱ་ངན་གུས་འདུད་ཀྱི་གྲོས་ཆོད་བཞག་ཐུབ་ཡོད། དེ་བཞིན་ཚོགས་ལ་ཉེ་བའི་དམིགས་བསལ་ཚོགས་ཆེན་གྲུབ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་ཆོས་བརྒྱུད་ཁག་གི་བླ་ཆེན་ཁག་དབུ་བཞུགས་ཐོག་བསྔོ་སྨོན་སྨོན་ལམ་གསུང་འདོན་གནང་རྒྱུའི་གོ་སྐབས་ཡོང་གི་རེད། དེ་ཡང་ཉིན་དང་པོ་དེར་བོད་ནང་གི་ཛ་དྲག་གནས་སྟངས་ཐོག་གདུང་སེམས་མཉམ་སྐྱེའི་གྲོས་ཆོད་གྲོས་འཆར་བཏོན་པ་རེད། དེའི་ཐོག་འཛིན་སྐྱོང་བཀའ་ཤག་དང་སྤྱི་འཐུས་རྣམ་པ་ཚོའི་ངོས་ནས་བོད་ནང་གི་གནས་སྟངས་ཛ་དྲག་གང་འདྲ་ཆགས་ཡོད་མེད་ཀྱི་གནད་དོན་རེ་རེ་བཞིན་སྤྱི་འཐུས་རྣམ་པ་ཚང་མས་གསུངས་པ་དེ་དག་སྤུངས་ན། ད་ལྟའི་གནས་སྟངས་ཛ་དྲག་ཏུ་འགྲོ་བཞིན་པ་འདི་མང་ཚོགས་ཀྱི་གསལ་པོ་མཁྱེན་ཐུབ་རྒྱུའི་གནས་སྟངས་ཤིག་བཟོ་ཐུབ་སོང་བསམ་པའི་རེ་བ་ཞུ་གི་ཡོད། མང་ཚོགས་ནང་ནས་སྤྱིར་བཏང་དེང་སང་གྲོས་ཚོགས་ཀྱི་ལས་རིམ་ལ་ཐུགས་སྣང་གནང་མཁན་ཤུགས་ཆེ་རུ་ཕྱིན་ཡོད། ཕྱི་རྒྱལ་ཁག་ལ་ཡོད་མཁན་ཚོ་ཡིན་ནའང་ཐད་ཀར་དྲ་རྒྱའི་ལམ་ནས་གཟིགས་མཁན་མང་དུ་ཕྱིན་ཡོད། དེ་ཚོར་ཐུགས་སྣང་གནང་བ་དེ་ཧ་ཅང་ཡག་པོ་རེད། ང་ཚོ་འཐབ་རྩོད་བྱེད་མཁན་མི་རིགས་ཤིག་ཡིན་པའི་ཆ་ནས་དགོས་མཁོ་ཞིག་ཀྱང་ཆགས་ཡོད། སོ་སོའི་ཐུགས་སྣང་གནང་བ་བཞིིན་མི་གཞན་ལ་འགྲེལ་བཤད་བརྒྱབ་ཐུབ་ན། བོད་མིའི་སྤྱི་ཚོགས་ཡོངས་ལ་གནས་ཚུལ་ཁྱབ་ཐུབ་པ་དང། མང་ཚོགས་ཀྱི་ཆབ་སྲིད་ཀྱི་གོ་རྟོག་རང་བཞིན་གྱི་མཐོ་རུ་འགྲོ་རྒྱུའི་གནས་སྟངས་ཆགས་ཀྱི་རེད།
དེ་རིང་གྲོས་ཚོགས་འདིའི་ཐོག་ང་ཚོས་དུས་ཚོད་མང་བ་ཞིག་རྩ་བའི་ནམ་རྒྱུན་ཕྱི་ཟླ་ ༩ པའི་གྲོས་ཚོགས་ཚོགས་སྐབས་ལས་བསྡོམས་ཐོག་གོ་བསྡུར་ཞུས་ཀྱི་ཡོད། ཉིན་བརྒྱད་ནང་ནས་ཆུ་ཚོད་དང་སྐར་མ་ཆ་ཚང་ཞིག་གྲངས་ཀ་རྒྱག་རྒྱུ་མ་བྱུང་སྟེ་ཉིན་ལྔ་ཙམ་ཕལ་ཆེར་དཔལ་ལྡན་བཀའ་ཤག་གི་ལས་ཁུངས་གོ་རིམ་བཞིན་ལས་བསྡོམས་སྙན་སྒྲོན་གནང་རྒྱུ་དང། སྤྱི་འཐུས་རྣམ་པ་ཚོས་ཐུགས་འཁུར་ཆེན་པོས་དེའི་ནང་མཉམ་ཞུགས་གནང་བ་ཙམ་མ་ཟད། གནད་དོན་གང་གི་ཐོག་གསུངས་པ་ཡིན་ནའང་རྒྱུ་མཚན་ཁུངས་ལྡན་གསུང་རྒྱུ་དེ་ཡང་དགའ་སྤོབས་སྐྱེས་འོས་པའི་གནས་སྟངས་ཤིག་ཡིན།
སྤྱི་འཐུས་རྣམ་པ་ཚོ་ས་གནས་ཆ་བགོས་བྱས་ཏེ་ས་གནས་ས་ཐོག་ཏུ་ཕེབས་ཀྱི་ཡོད། སོ་སོའི་ས་གནས་ཀྱི་གནས་བབ་གང་ཡིན་པ་དེ་དག་སྔོན་མ་དང་མི་འདྲ་བར་དེང་སང་གི་གནད་དོན་གསུངས་སྐབས། གནད་དོན་ཟབ་རྒྱས་དང་ཁུངས་སྐྱེལ་རྒྱུ་ཡོད་པའི་བཀའ་མོལ་ཁོ་ན་གསུངས་པར་བརྟེན། དེའི་དབར་གྲོས་ཚོགས་འཐུས་མི་མིན་པ་དེ་དག་ལ་བཀའ་འདྲི་ཞུ་སྐབས་གྲོས་ཚོགས་ཀྱི་བགྲོ་གླེང་གནས་ཚད་མཐོ་པོ་འདུག ཅེས་གསུང་མཁན་བྱུང་སོང། ང་ཚོ་སྤྱི་ཡོངས་ཀྱི་བོད་མི་མང་སྤྱི་འཐུས་ལྷན་ཚོགས་ཀྱི་ཆེ་མཐོང་ལ་ཕན་རྒྱུའི་གནས་སྟངས་ཤིག་ཆགས་པ་རེད་བསམ་གྱི་ཡོད། དུས་ཚོད་ཐུང་ཐུང་ཞིག་གི་ནང་ལས་ཁུངས་རེ་རེའི་བཀའ་བློན་རྣམ་པས་ཕྱི་པོ་ག་ཚོད་བཞུགས་དགོས་བྱུང་ནའང་བཞུགས་ཏེ་སྤྱི་འཐུས་མི་རེ་ངོ་རེའི་བཏང་བའི་དྲི་བ་ཆ་ཚང་ལ་ལན་འདེབས་ཞིབ་ཕྲ་སྐྱོན་གནང་བ་དེ་དག་བརྒྱུད་ནས་མང་ཚོགས་ཐུགས་སྣང་གནང་མཁན་ཡིན་ནའང་། ང་ཚོའི་དཀའ་ངལ་དེ་གྲོས་ཚོགས་ནང་སླེབས་སོང་། འཛིན་སྐྱོང་བཀའ་ཤག་གི་དགོངས་པ་འདི་འདྲ་བཞེས་ཀྱི་ཡོད་པ་གསལ་པོ་ཆགས་སོང་བསམ་པའི་གནས་སྟངས་ཆགས་ཐུབ་རྒྱུའི་རེ་བ་ཞུ་གི་ཡོད། རྩ་བའི་གྲོས་ཚོགས་ནང་གྲོས་ཚོགས་འཐུས་མི་དང་། བཀའ་བློན་རྣམ་པ། འབྲེལ་ཡོད་ལས་བྱེད་རྣམ་པ་ཕེབས་ཀྱི་ཡོད། ད་ལན་ཟུར་ཉན་རྣམ་པ་བཞུགས་སའི་ས་ཆ་ཡང་མང་པོ་མེད། འོན་ཀྱང་གྲོས་ཚོགས་ནང་གང་གསུངས་པ་དེ་འཛིན་སྐྱོང་བཀའ་ཤག་གི་ངོས་ནས་མང་ཚོགས་ལ་གསལ་བཤད་བྱེད་དགོས་རྒྱུ། མང་ཚོགས་ལ་གསལ་པོ་ཆགས་དགོས་པའི་གནས་སྟངས་ཁོ་ན་གསུངས་པར་བརྟེན། དེ་དོན་ཕན་ཐོགས་ཆེན་པོ་བྱུང་སོང་ཞེས་ཞུ་རྒྱུ་ཡིན། དེ་ནས་གོང་དུ་དཔལ་ལྡན་སྲིད་སྐྱོང་མཆོག་གིས་གསུང་པ་ལྟར། གྲོས་ཚོགས་ནང་ཁྲིམས་བཟོའི་ལས་དོན་དང་འབྲེལ་བའི་ཐོག་ནས་སྲིད་སྐྱོང་དུ་མཚན་བསྒྱུར་ཐུབ་པ་བྱུང་ཡོད། གཞི་རྩའི་འདི་གར་ལང་ནས་ཚོགས་གཙོའི་མིང་ཐོག་ནས་གཏམ་བཤད་བྱེད་མཁན་གྱིས་ཚོགས་གཙོའི་མིང་ཞིག་འཁྱེར་ཡོད་པར་བརྟེན། གནད་དོན་གང་ཅིའི་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་བཞེད་གང་ཡོད་པ་རྣམས་ཤེས་ཀྱི་ཡོད་པའི་གནས་སྟངས་ཤིག་ཆགས་ཡོད། འོན་ཀྱང་སྐབས་རེ་བརྗོད་བདེ་མིན་དེ་འདྲ་ཡོང་བཞིན་ཡོད། ཐེངས་འདིར་བཀའ་བློན་ཁྲི་པའི་མཚན་བྱང་དེ་བཞིན་སྲིད་སྐྱོང་དུ་བསྒྱུར་ཐུབ་པའི་རྒྱུ་མཚན་ལ་བརྟེན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དགོངས་གཞིའི་ནང་བཀའ་བློན་ཁྲི་པའི་མཚན་བྱང་དེ་བཞིན་སྲིད་སྐྱོང་དུ་བསྒྱུར་དགོས་པའི་དགོས་པ་གཞན་གང་ཡང་མེད། ཁྲིམས་ཀྱི་གནས་བབ་ལྷག་ཆེད། སྔ་མོ་མགོན་པོ་གང་ཉིད་མཆོག་གིས་སྲིད་སྐྱོང་སྟག་བྲག་རིན་པོ་ཆེ་ཆོག་གི་སྐུ་མདུན་ནས་བརྩིས་བཞེས་རྗེས་ད་ཆ་སྲིད་སྐྱོང་བློ་བཟང་སེང་གེ་ལགས་སུ་རྩིས་སྤྲོད་མཛད་བཞིན་ཡོད་པའི་བཀའ་སློབ་ཕེབས་པ་དེས་བོད་གཞུང་དགའ་ལྡན་ཕོ་བྲང་མཚམས་ཆད་ཀྱང་མང་གཙོ་ཚད་དང་ལྡན་པའི་ལམ་ལུགས་དེ་རྒྱུན་མ་ཆད་པར་བོད་གཞུང་གི་གནད་བབ་མུ་མཐུད་གནས་རྒྱུ་ཞིག་དང། ད་ལྟའི་མིང་བྱང་ལ་བསྒྱུར་བ་བཏང་མིན་ལ་མ་ལྟོས་པར་བོད་ཕྱི་ནང་གཉིས་ཀྱི་བོད་མི་ཚང་མས་ངོས་འཛིན་གནང་བ་ཡིན་ན། ཁྲིམས་མཐུན་གྱི་གནས་བབ་ཆགས་རྒྱུར་ཕན་ཐོགས་ཡོད་པར་བརྟེན། ཁ་སེང་བཅའ་ཁྲིམས་བསྐྱར་བཅོས་ཀྱིས་སྲིད་སྐྱོང་དུ་གཏན་འབེབས་བྱུང་རྗེས་ཚོགས་གཙོ་སྦྲེལ་པོས་གྲོས་ཚོགས་སུ་ཐུགས་རྗེ་ཆེ་ཞུ་རྒྱུ་བྱུང། སླར་ཡང་ཐུགས་རྗེ་ཆེ་ཞུ་རྒྱུའི་འདོད་པ་བྱུང།
དེ་མཚུངས་ང་ཚོ་བཙན་བྱོལ་སྒྲིག་འཛུགས་ནང་མང་གཙོའི་འཕེལ་རིམ་གྱི་གོམ་སྟབས་མང་པོ་ཞིག་བརྒྱབ་ཚར་བ་རེད། ད་དུང་ཡིན་ནའང་གོམ་པ་རྒྱག་དགོས་པའི་གནས་སྟངས་མང་པོ་ཞིག་ལྷག་ཡོད། ལྷག་པར་ལྷོ་ཕྱོགས་གཞིས་ཆགས་ལུགས་བདེ་གཉིས་ལྟ་བུར་ཆ་མཚོན་ན་ས་གནས་འཐུས་ཚོགས་དང་རང་ལྡན་ཚོགས་ཆུང་གི་དཀའ་ངལ་དེ་ཡང་ཐེངས་འདིའི་གྲོས་ཚོགས་ལམ་ནས་སེལ་ཐུབ་པའི་རེ་བ་ཞུ་བཞིན་ཡོད་ལ་སེལ་ཐུབ་པ་དགོས་རེད་བསམ་བཞིན་འདུག དེ་བཞིན་ས་ཁུལ་འགའ་ཤས་ནང་ས་གནས་འཐུས་ཚོགས་ཚུགས་མ་ཐུབ་པའི་གནས་སྟངས་དེ་ཡང་ཐེངས་འདིར་བཅའ་ཁྲིམས་བསྐྱར་བཅོས་ཕྱིན་པ་དེས་བཅའ་ཁྲིམས་དོན་ཚན་ ༧༨ ནང་གསེས་གཉིས་པའི་ ༼ཁ༽ དེར་བསྒྱུར་བཅོས་བཏང་ཐུབ་པར་བརྟེན་ས་གནས་གཞན་ནང་དུའང་འཛུགས་ཐུབ་རྒྱུའི་རེ་བ་ཞུ་བཞིན་ཡོད།
ང་ཚོའི་ཁ་གཏད་དེ་རྒྱ་ནག་སྲིད་གཞུང་རེད། རྒྱ་ནག་སྲིད་གཞུང་དེ་འགོ་ཁྲིད་མི་འགའ་ཤས་ཀྱིས་ཟིན་ནས་བསྡད་ཡོད། རྩ་བའི་ཆ་ནས་འདས་པའི་ལོ་ ༣༠ ནང་རྒྱ་ནག་གི་གནས་བབ་སྔར་དང་མི་འདྲ་བར་ཧ་ཅང་ཤུགས་ཆེ་རུ་ཕྱིན་ཡོད། དཔལ་འབྱོར་དང་དམག་དོན། ཆབ་སྲིད་དབང་ཆ་སོགས་ཕྱོགས་གང་ཅིའི་ཐོག་ནས་སྟོབས་ཤུགས་ཧ་ཅང་ཆེ་རུ་ཕྱིན་ཟིན། དཔལ་འབྱོར་ཐོག་ནས་རྒྱ་ནག་དེང་སྐབས་ཨང་གཉིས་པར་ལྟ་བུར་རྩི་བཞིན་ཡོད། དེ་བཞིན་དམག་དོན་ཐོག་འཛམ་གླིང་ནང་ཨང་གཉིས་པ་གསུམ་པ་གང་རུང་ཞིག་ལ་སླེབས་ཀྱི་ཡོད། འོན་ཀྱང་རྒྱ་ནག་ནང་དུ་ཡར་རྒྱས་དེ་དག་འོག་འཛམ་གླི༝ང་ནང་ཆབ་སྲིད་དང་དམག་དོན། དཔལ་འབྱོར་སོགས་ཀྱིས་གནོན་ཤུགས་སྤྲོད་ཐུབ་པའི་གནས་བབ་ཡོད་པ་ཡིན་ནའང་། ད་ལྟའི་རྒྱ་ནག་ནང་དཀའ་ངལ་ཆེན་པོ་དེ་འདྲ་མང་པོ་ཞིག་འཕྲད་བཞིན་པ་དེ་ཡང་ང་ཚོས་བརྒྱུད་ལམ་ཁག་ནས་ཤེས་ཀྱི་ཡོད། ད་ལྟ་འགྲོ་བཞིན་པའི་འགོ་ཁྲིད་འཕོ་འགྱུར་གྱི་གནས་སྟངས་དེ་ཡང་ཕྱིར་གྲགས་བྱེད་མ་ཐུབ་པའི་གནས་བབ་ལྟ་བུ་དཀའ་ངལ་མང་པོ་ཞིག་འཕྲད་བཞིན་ཡོད། དཔལ་འབྱོར་ཡར་རྒྱས་ཀྱི་གནས་བབ་དང་འབྲེལ་བའི་ཐོག་ནས་རྒྱ་ནག་ནང་དུ་ངལ་རྩོལ་བ་ཧ་ཅང་མང་པོར་དཀའ་ངལ་འཕྲད་བཞིན་ཡོད། ཁྱིམ་སྡོད་ཀྱི་གནས་སྟངས་དེའི་དབང་གིས་ད་ལྟ་འགའ་ཤས་ཀྱིས་ཚོད་དཔག་བྱེད་སྟངས་ལ་གཞིགས་ན། རྒྱ་ནག་གྲོང་གསེབ་ཁག་ནས་རྒྱལ་སའི་ནང་ལས་ཀ་བྱེད་མཁན་རྒྱ་མི་རིགས་ཕལ་ཆེར་ས་ཡ་གཉིས་ལྷག་ཙམ་ཡོད་སྐོར་བརྗོད་བཞིན་ཡོད། འོན་ཀྱང་ཁྱིམ་སྡོད་ཀྱི་འགྲོ་སྟངས་དེའི་ཐོག་ནས་རྒྱ་མི་རིགས་གྲོང་གསེབ་ནས་རྒྱལ་སར་སླེབས་པ་དེ་དག་ལ་ཤེས་ཡོན་དང་རྒས་ཡོལ། དེ་བཞིན་ངལ་རྩོལ་བ་སྤྱིར་སྟངས་ཀྱི་ཐོབ་ཐང་དེ་དག་རག་གི་མེད་པ་དེ་ང་ཚོས་ཤེས་བཞིན་ཡོད། རྒྱུ་མཚན་དེ་ལ་བརྟེན་ནས་རྒྱ་ནག་ནང་དུ་སྤྱི་ཚོགས་དང་ཆབ་སྲིད་ཀྱི་བརྟན་ལྷིང་མི་ཡོང་བའི་རྒྱུ་རྐྱེན་གཙོ་བོ་གཅིག་གནས་སྟངས་དེ་དག་ཆགས་བཞིན་ཡོད།
དེ་བཞིན་ས་ཆའི་བདག་དབང་ཐོག་ཡིན་ནའང་རེད། ས་གནས་དཔོན་རིགས་ཚོས་བཙན་དབང་ཐོག་ནས་ས་ཆ་ཧམ་བཤད་བྱས་པ་སོགས་དཀའ་ངལ་མང་པོ་ཞིག་འཕྲད་བཞིན་ཡོད། ངལ་རྩོལ་བ་དེ་དག་ཁྲིམས་མཐུན་གྱི་གནས་བབ་ཐོག་ནས་རྒྱལ་སའི་ནང་སྡོད་མི་ཆོག་པའི་གནས་སྟངས་དང་ས་ཆའི་བདག་དབང་སོགས་རྒྱུ་མཚན་མང་པོ་ཞིག་ལ་བརྟེན། ལྐོག་ཟ་རུལ་སུངས་ཤུགས་ཆེ་རུ་འགྲོ་བཞིན་ཡོད་པ་དང་། ལྐོག་ཟ་རུལ་སུངས་ཤུགས་ཆེ་དྲགས་པའི་རྐྱེན་གྱིས་རྒྱ་ནག་གཞུང་གི་དགྲ་བོ་དང་པོ་དེ་ལྐོག་བཟའ་རུལ་སུངས་རྩིས་ཀྱི་ཡོད། ད་ལྟའི་རྒྱ་ནག་གི་ནང་འགྱུར་འགྲོས་ཆེན་པོ་འདི་འདྲ་ཞིག་འགྲོ་བཞིན་པའི་སྐབས། རྒྱ་ནག་རྒྱལ་ནང་དུ་ནང་བརྟན་ལྷིང་མི་ཡོང་རྒྱུའི་གཞི་རྩ་ཞིག་ཆགས་ཀྱི་ཡོད་ན། རྒྱ་ནག་གཞུང་གི་རྒྱལ་ཁབ་གཞན་ལ་གནོད་འཚེ་བྱེད་མ་སྲིད་པའི་གནས་སྟངས་མིན་པ་ཞིག་ཀྱང་མཁས་པ་མང་པོ་ཞིག་གིས་འགྲེལ་བཤད་རྒྱག་གི་ཡོད། ཅེས་སོགས་ཀྱི་གསུང་བཤད་གནང་ཡོད་པ་བཅས།།