༢༠༡༢ ཟླ་ ༩ ཚེས་ ༢༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༢ ཟླ་ ༩ ཚེས་ ༢༤ ཉིན་གྱི་ཕྱེད་ཡོལ་ཆུ་ཚོད་ ༢།༣༠ ཐོག་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་དྲིལ་བསྒྲགས་དྲུང་ཆེ་བཀྲ་ཤིས་ལགས་དང་དྲུང་འཕར་བཀྲིས་ཕུན་ཚོགས་ལགས་ཀྱིས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། བོད་ནང་ཕྱི་ལོ་ ༢༠༠༩ ནས་ད་བར་གཞིས་ལུས་བོད་མི་ ༥༡ གིས་རང་ལུས་མེར་སྲེག་བཏང་སྟེ་རྒྱ་ནག་གཞུང་གིས་བོད་མིའི་ཆོས་དང་རིག་གཞུང། སྐད་ཡིག་སོགས་ལ་དམ་བསྒྲགས་ཧ་ཅང་བྱས་པ་མ་ཟད། བོད་མི་འབྲོག་པ་རྣམས་ཀྱི་ལོ་ངོ་བརྒྱ་ཕྲག་མང་པོའི་སྲོལ་རྒྱུན་འཚོ་བའི་གོམས་གཤིས་ལ་རྩིས་མེད་རྡོག་རོལ་བཏང་སྟེ་འབྲོག་པ་རྣམས་ཀྱི་རྩྭ་ཐང་འཕྲོ་བརླགས་བཏང་བར་བསྙད་འདོགས་བྱས་ཏེ་ས་གནས་གཅིག་ཏུ་གཏན་གཞི་བྱེད་དུ་བཅུག་པ་དང་། སློབ་མ་རྣམས་རྒྱ་སྐད་སློབ་ཁྲིད་བྱེད་འགོ་ཚུགས་ཏེ་རྒྱ་བསྒྱུར་སློབ་གསོའི་སྲིད་བྱུས་ལ་ངོས་ལེན་མེད་པ། དགོན་སྡེ་ཁག་གི་ནང་དམག་གི་ས་ཚིགས་སམ་དམར་ཤོག་ཚོགས་པའི་ཡན་ལག་བཙུགས་ཏེ་དགེ་འདུན་པ་རྣམས་ཀྱི་འགྲོ་སྡོད་འགུལ་གསུམ་ལ་དམ་བསྒྲགས་བྱས་པ། བོད་མི་ཤེས་ལྡན་མི་སྣ་མང་པོ་འཛིན་བཟུང་བཀག་ཉར་དང་ཉེས་རྡུང་ཚད་མེད་བཏང་བ་སོགས་ཀྱི་དྲག་གནོན་ཅན་གྱི་སྲིད་བྱུས་དེ་དག་ལ་བཟོད་ཐབས་བྲལ་མཐར། བོད་མི་རྣམས་འུ་ཐུག་ཐབས་ཟད་ཀྱིས་བོད་མདོ་སྨད་རྔ་པ་ཀིརྟི་གཙོ་བོར་གྱུར་བའི་མདོ་དབུས་ཁམས་གསུམ་དུ་བོད་མི་རྒན་བར་གཞོན་གསུམ་དང་སྐྱ་སེར་དབྱེ་མེད་གྲངས་ ༥༡ གིས་རང་ལུས་མེར་སྲེག་བཏང་ཡོད་ཁོངས་ནས་བོད་མི་ ༤༡ འདས་གྲོངས་སུ་གྱུར་ཡོད་པའི་ཛ་དྲག་གི་གནས་སྟངས་སྐོར་ཕྱོགས་སྒྲིག་བྱས་པའི་བརྙན་འཕྲིན་སྐར་མ་ ༣༠ ཅན་ཞིག་དྲིལ་བསྒྲགས་དྲུང་ཆེས་དབུ་འབྱེད་གནང་ཡོད། སྐབས་དེར་བོད་མི་དང་རྒྱ་གར་བ་སོགས་ཕྱི་ནང་གི་གསར་འགོད་པ་ ༣༠ ལྷག་ཙམ་ཞིག་གསར་འགོད་ལྷན་ཚོགས་སུ་ཕེབས་ཡོད།
དེ་ཡང་ཐོག་མར་དྲུང་འཕར་བཀྲིས་ཕུན་ཚོགས་ལགས་ཀྱིས་བརྙན་འཕྲིན་དེའི་སྐོར་ངོ་སྤྲོད་གནང་རྗེས་གསར་འགོད་པ་ཁག་གཅིག་གི་དྲི་བར་ལན་འདེབས་གནང་ཡོད་པ་དང་དེ་ནས་བརྙན་འཕྲིན་དེ་དངོས་སུ་གསར་འགོད་ཚོར་བསྟན་ཡོད་པ་བཅས།།