༢༠༡༠ ཕྱི་ཟླ་ ༡ ཚེས་ ༡༡ རེས་གཟའ་ཟླ་བ།
༄༅། །ཨ་རིར་གཏན་བཞུགས་ཟུང་དྲུང་བགྲེས་ཡོལ་བ་བློ་བཟང་ཐར་འདོད་ལགས་ནས་ནང་མི་བུ་ཕྲུག་ལྟ་སྐྱོང་འོག་འཚོ་བའི་སྐུ་ངལ་མེད་སྟབས་རང་གཞུང་གི་བཀའ་དྲིན་རྗེས་སུ་དྲན་པའི་སྒོ་ནས་ཕྱི་ལོ་ ༢༠༡༠ ཟླ་ ༡ ནས་གཞུང་མང་སྲི་ཞུའི་ཞབས་འདེགས་མི་ལོ་ ༣༣ ལྷག་ཞུས་པའི་མཚན་གཞུང་ནང་གནས་ཆེད་མཚན་དོད་ཟླ་རེར་སྒོར་ ༣༣ ཞུ་རྒྱུ་དང་འཕྲོས་བགྲེས་ཕོགས་ཇི་ཐོབ་རང་གཞུང་གི་དཔལ་འབྱོར་ཞལ་འདེབས་སུ་འབུལ་རྒྱུ་ཡིན་ཞེས་བཀའ་ཤག་ཏུ་སྙན་སེང་ཞུས་སོང་ན་བགྲེས་སོང་ཁོང་གི་སྐུ་ཚེ་དོན་སྙིང་ལྡན་ཤོས་ཀྱི་མི་ལོ་ ༣༣ ལྷག་བོད་རྒྱལ་ཁབ་དང་མི་རིགས་ཆེད་ལྷག་བསམ་རྣམ་དག་ངང་ཞབས་འདེགས་ཞུས་ཏེ་བཟང་མཐའ་འཁྱོལ་བའི་སྐབས་འདིར་ཡང་རང་ཉིད་ཀྱི་བགྲེས་ཕོགས་ཐོབ་ཆ་དེ་ཡང་མ་བཞེས་པར་རང་གཞུང་ལ་དཔལ་འབྱོར་གྱི་རྒྱབ་རྟེན་དུ་ཞལ་འདེབས་འབུལ་རྒྱུར་གནང་བར་རྗེས་སུ་ཡི་རང་གི་བསྔགས་བརྗོད་ཞུ་རྒྱུ་དང་། ཕྱོགས་མཚུངས་རང་གཞུང་སྲི་ཞུའི་ལས་བྱེད་བགྲེས་ཡོལ་འགས་རང་ཉིད་ཀྱི་གཟིགས་གསོལ་དང་། བགྲེས་ཕོགས་རང་གཞུང་ལ་སྤྱི་སྨན་དུ་ཞལ་འདེབས་སུ་གནང་མཁན་བྱུང་ཡོད་པ་རྣམས་ལའང་བསྔགས་བརྗོད་ཀྱི་མེ་ཏོག་ལན་བརྒྱར་གཏོར་བ་དང་ཆབས་ཅིག ཁོང་རྣམ་པའི་བཟང་སྤྱོད་ལ་རྗེས་རབས་རྣམ་པས་མིག་དཔེ་འོས་པའི་བྱ་གཞག་གནང་པ་འདུག་བཅས།
