༢༠༡༢ ཟླ་ ༩ ཚེས་ ༢༢ རེས་གཟའ་སྤེན་པ།

༄༅། །ཕྱི་ལོ་ ༢༠༡༢ ཟླ་ ༩ ཚེས་ ༡༨ ཉིན་ལྷོ་ཨ་ཕི་རི་ཀའི་གྲོང་ཁྱེར་ཌར་བྷན་ Durban དུ་འདི་ལོའི་འཁོན་འཛིན་སེལ་བའི་འཆམ་མཐུན་དང་ཞི་བདེ་གོང་འཕེལ་ཆེད་མེས་པོ་དམ་པ་གྷན་དྷིའི་རྒྱལ་སྤྱིའི་གཟེངས་རྟགས། Mahatma Gandhi International Award for Reconciliation and Peace ཞེས་པ་དེ་བཞིན་ཛམ་བྷི་ཡའི་ Zambian སྲིད་འཛིན་ཟུར་པ་སྐུ་ཞབས་ཀེ་ནེ་ཐི་ (Dr. Kenneth Kaunda) མཆོག་ལ་གནང་ཡོད།

དེ་ཡང་གཟེངས་རྟགས་ཀྱི་མཛད་སྒོར་ལྷོ་ཨ་ཕི་རི་ཀའི་སྐུ་ཚབ་དོན་གཅོད་མི་འགྱུར་རྡོ་རྗེ་ལགས་ལ་གྷན་དྷི་ཡར་རྒྱས་ཐེབས་རྩས་ (Gandhi Development Trust) མགྲོན་འབོད་ཞུས་པ་ལྟར་ཆེད་ཕེབས་གནང་ཡོད། གཟེངས་རྟགས་དེ་ནི་སྲིད་འཛིན་ཟུར་པ་མཆོག་གིས་ཛམ་བྷི་ཡའི་རང་དབང་འཐབ་རྩོད་ལས་འགུལ་ཐོག་བྱས་རྗེས་ཧ་ཅང་བཞག་ཡོད་པ་མ་ཟད། ལྷོ་ཨ་ཕི་རི་ཀའི་ནང་འཚེ་མེད་ཞི་བའི་ཐབས་ལམ་ལ་གཞི་བཅོལ་ཏེ་དཀའ་ངལ་སེལ་རྒྱུའི་ལས་འགུལ་ལ་རྒྱབ་སྐྱོར་གནང་བའི་བྱས་རྗེས་སོགས་ལ་ངོས་འཛིན་གནང་ཆེད་ཕུལ་བ་ཞིག་ཡིན་འདུག དེ་བཞིན་དེ་ཉིན་སྐུ་ཚབ་དོན་གཅོད་མི་འགྱུར་རྡོ་རྗེ་ལགས་ཀྱིས་ཛམ་བྷི་ཡའི་སྲིད་འཛིན་ཟུར་པ་སྐུ་ཞབས་ཀེ་ནེ་ཐི་ལགས་དང་ལྷན་ཁོང་གི་མགྲོན་ཁང་ནང་ཆུ་ཚོད་ཕྱེད་ཀའི་རིང་ཐུག་འཕྲད་ཀྱི་གོ་སྐབས་ཀྱང་བྱུང་ཡོད། སྐབས་དེར་སྐུ་ཚབ་དོན་གཅོད་ནས་སྲིད་འཛིན་ཟུར་པ་མཆོག་ལ་༸གོང་ས་༸སྐྱབས་མགོན་ཆེན་པོ་མཆོག་གིས་འཚམས་འདྲི་སྩལ་བ་རྣམས་ཁོང་ལ་གསལ་བཤད་ཞུས་ཡོད་པ་བཅས།།