ཕྱི་ལོ་ ༢༠༠༩ ཟླ་ ༢ ཚེས་ ༡༦ རེས་གཟའ་ཟླ་བ།
འདི་གའི་བོད་ཡིག་ཚན་པའི་གསར་འགོད་པས་དཔལ་ལྡན་ཆོས་རིག་བཀའ་བློན་མཆོག་ལ་བཅར་དྲི་ཞུས་པ།
བོད་གཞུང་ཆོས་རིག་བཀའ་བློན་ཚེ་རིང་ཕུན་ཚོགས་མཆོག
དྲི་བ། སྔ་ལོ་གསུམ་བཅུའི་དུས་དྲན་ནས་བཟུང་གཞིས་ལུས་རྒྱ་ཆེའི་ཆོལ་གསུམ་མི་མང་ནས་དཔའ་སྟོབས་ཆེན་པོས་ཞི་རྒོོལ་རྒྱ་ཆེ་གནང་བར་རྒྱ་གཞུང་ནས་དྲག་གནོན་ཚབས་ཆེ་བྱས་ཏེ་དམར་གསོད་དང་། བཙོན་འཇུག རྨས་སྐྱོན་སོགས་ཚབས་ཆེ་ཕོག་པ་རྣམས་ཀྱི་ཆེད་དུ་བཙན་བྱོལ་བོད་གཞུང་ངོས་ནས་ཁོང་ཚོའི་ཞུམ་པ་མེད་པའི་དཔའ་ངར་ལ་ཆེ་བསྟོད་གང་གནང་འཆར་ཡོད་དམ།
ལན། གཞིས་ལུས་བོད་མིའི་ཞུམ་པ་མེད་པའི་སྙིང་སྟོབས་དང་དཔའ་ངར་གྱིས་བོད་དོན་ཐོག་རང་དོན་རང་གཅེས་ཀྱིས་ཐུགས་ཁུར་གནང་བར་བཙན་བྱོལ་བོད་གཞུང་ངོས་ནས་སྔ་རྗེས་བར་གསུམ་དུ་རྗེས་སུ་ཡི་རངས་དང་། ཆེ་བསྟོད་ཀྱིས་ཁོང་ཚོའི་ལོ་རྒྱུས་གསེར་ཡིག་ཐོག་འབྲི་དགོས་པ་ཞིག་ཆགས་ཡོད་པར་ངོས་འཛིན་ཞུ་བཞིན་ཡོད། བོད་གངས་ཅན་པའི་བསྟན་སྲིད་མི་རིགས་དང་བཅས་པའི་དོན་དུ་འདས་པའི་ལོ་རྒྱུས་ནང་སོ་སོའི་ལུས་སྲོག་ལོངས་སྤྱོད་དང་བཅས་པ་བློས་བཏང་བའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་རླབས་ཆེ་བའི་བྱས་རྗེས་དེ་དག་ཆུད་ཟོས་སུ་མི་འགྲོ་བའི་ཆེད་དུ་བཙན་བྱོལ་བོད་གཞུང་བཀའ་ཤག་གི་ངོས་ནས་བོད་དོན་བདེན་མཐའ་གསལ་བའི་ཐབས་ལམ་ལ་འབད་བརྩོན་ཞུས་དང་ཞུ་བཞིན་པ་མ་ཟད། ཕྱི་རྒྱལ་དོན་གཅོད་ཁང་དང་འབྲེལ་ཡོད་ཁག་བརྒྱུད་སྐབས་དུས་སུ་རྒྱལ་སྤྱི་དང་ཕྱོགས་གང་སར་ཐབས་ཤེས་ཡོད་རྒུ་རྩལ་སྤྲུགས་ཀྱིས་གཞིས་ལུས་རྒྱ་ཆེའི་མི་མང་རྣམས་ཡ་ང་བའི་སྡུག་བསྔལ་ལས་མྱུར་དུ་གྲོལ་བ་དང་། རྒྱ་གཞུང་གིས་བོད་མིའི་ཐོག་འཛིན་པའི་མ་ཉེས་ཁ་གཡོག་གི་འཁྱོག་བཤད་རྣམས་ལ་བདེན་མཐའ་གསལ་བའི་ལན་འདེབས་ཞུས་དང་ཞུ་མུས་ཡིན།
ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་ནས་དུས་དང་རྣམ་པ་ཀུན་ཏུ་རྒྱལ་སྤྱིའི་ཡུལ་གྲུ་གང་དུ་༸ཞབས་སོར་འཁོོད་ཀྱང་སྐུ་ངལ་འཛེམས་མེད་ཐོག་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་དང་། དེ་བཞིན་གསར་འགོད་པ་བཅས་ལ་བོད་ནང་གི་དངོས་ཡོད་གནས་སྟངས་དང་བོད་མིའི་མངོན་འདོད་ཁག་ཁ་གསལ་ལ་གོ་བདེའི་ལམ་ནས་ངོ་སྤྲོད་བཅས་བཀའ་སློབ་ལམ་སྟོན་བཀྲིན་ཇི་ལྟར་ཆེ་བ་ཞུ་མ་དགོས་པ་ཀུན་གྱིས་མཁྱེན་གསལ་ཡིན།
དྲི་བ། ས་གླང་ལོ་ནི་མྱ་ངན་དང་སྡུག་བསྔལ་གྱི་ལོ་ཞིག་ལ་ངོས་འཛིན་པའི་ཐོག་ནས་གཞུང་འབྲེལ་གྱི་ཆོས་ཕྱོགས་མཛད་སྒོ་ཚེས་གཏོར་དང་། བསངས་གསོལ་བཅས་སྲོལ་རྒྱུན་གྱི་མཛད་སྒོ་ཙམ་ལས་དེ་མིན་དགའ་སྐྱིད་དང་རྒྱས་སྤྲོས་སོགས་གནང་རྒྱུ་མིན་ཞེས་འཁོད་ཡོད། དེ་མིན་དམིགས་བསལ་དཔའ་སྟོབས་ཆེ་བའི་གཞིས་ལུས་རྒྱ་ཆེའི་མི་མང་ཁོང་རྣམས་ཀྱི་ཆེད་དུ་ལས་འཆར་གཞན་གང་ཞིག་གནང་འཆར་ཡོད་དམ།
ལན། རྒྱལ་སྤྱིའི་མང་ཚོགས་ནས་ཤེས་གསལ་ལྟར་གཞིས་ལུས་ཆོལ་གསུམ་རྒྱ་ཆེའི་མི་མང་ནས་དུས་ཡུན་རིང་པོའི་ནང་རྒྱ་ནག་གཞུང་གིས་བོད་མིའི་ཐོག་འཛིན་པའི་སྲིད་བྱུས་ལ་འདོད་བློ་མ་ཁེངས་པར་གནས་མུས་དང་། ལྷག་པར་དུ་སྔ་ལོ་གཞིས་ལུས་རྒྱ་ཆེའི་མི་མང་ནས་མ་གྲོས་བསམ་པ་གཅིག་མཐུན་གྱིས་ལག་ཏུ་ཚོན་ཆ་ཁབ་ཙམ་མེད་ནའང་། མི་མང་གི་མངོན་འདོད་དེ་དག་ཞི་བའི་ཐོག་ནས་སྐད་འབོད་ཁྲོམ་སྐོར་བྱས་པར་རྒྱ་ནག་གཞུང་གིས་དྲག་པོའི་བསྒྲིགས་འཛུགས་ཁག་ནས་ཡ་ང་སྙིང་རྗེ་སྤུ་ཙམ་མེད་པར་བོད་མི་ཞི་རྒོལ་བ་རྣམས་ལ་ཁྱོད་ཤི་ང་གསོན་ལྟ་བུའི་དྲག་ལས་བརྩམས་ཏེ་བོད་མི་མང་པོ་དམར་གསོད་བཏང་བ་དང་། དེ་ལས་མང་བར་རྨས་སྐྱོན། དེ་ལས་ཀྱང་ཆེས་མང་བ་འཛིན་བཟུང་བཙོན་འཇུག་གིས་ཚད་ལས་བརྒལ་བའི་མནར་གཅོད་བཏང་དང་གཏོང་བཞིན་ཡོད་སྟབས་ཁོང་རྣམ་པའི་དོན་དུ་མྱ་ངན་གྱི་དྲན་གསོ་སམ། ཡང་ན་གདུང་སེམས་མཉམ་སྐྱེ་མཚོན་ཆེད་སྔ་ལོའི་གསུམ་པའི་བཅུ་ནས་གཞུང་འབྲེལ་དུས་སྟོན་ཁག་ལ་སྤྲོ་སྐྱིད་ཀྱི་རྣམ་པ་མཚོན་པའི་ལས་རིམ་གནང་མེད། འདི་ལོའི་ལོ་གསར་ལའང་སྤྲོ་སྐྱིད་སོགས་རྒྱས་སྤྲོས་བྱ་རྒྱུ་མིན་པ་གཅིག་མཚུངས་ཆགས་ཡོད། བཙན་བྱོལ་བོད་གཞུང་གི་ངོས་ནས་གནས་ཚུལ་དེ་རྣམས་གཞི་རྩར་བཟུང་བའི་ཐོག་ནས་གསལ་བསྒྲགས་སྔོན་སོང་བཞིན། འདི་ལོའི་ལོ་གསར་དགའ་སྐྱིད་དང་། རྒྱས་སྤྲོས་སོགས་ཀྱི་ངོ་བོ་མིན་པར་ཆོས་ཕྱོགས་དང་སྲོལ་རྒྱུན་གྱི་བྱེད་སྒོ་ཙམ་ལས་གནང་རྒྱུ་མིན་པ་ངེས་པ་ཞིག་རེད། བྱེད་སྒོ་འདིས་སྤྱིར་འཛམ་གླིང་འདིར་ནད་མུག་འཁྲུག་རྩོད་སོགས་མི་འདོད་པའི་རྐྱེན་ངན་རང་སར་ཞི་བ་དང་། བྱེ་བྲག་བོད་དོན་བདེན་མཐའ་མྱུར་དུ་གསལ་ཆེད་ཆོས་སྡེ་ཁག་ནས་ཀྱང་ཆོས་ཕྱོགས་ཀྱི་མཛད་སྒོ་རྣམས་སྔར་ལྷག་གནང་འཆར་ཡོད་ལ། མ་ཟད་ལོ་གསར་ཚེས་ཤར་ལའང་གཞུང་དང་མང་ཚོགས་ཀྱི་ལས་རིམ་ཡོད་བཞིན་པ་རེད།
ལྷག་པར་དུ་ལོ་གསར་འདིའི་ནང་གཙོ་ཆེར་བོད་དོན་བདེན་མཐའ་གསལ་བར་འཕྲལ་ཕུགས་ལ་སྨན་པའི་ལས་གཞི་དང་། ཁྱད་པར་དུ་གཞིས་ལུས་བོད་མིའི་དཀའ་སྡུག་སེལ་ཆེད་འདས་པའི་ལོ་ལྔ་བཅུའི་མྱོང་བ་ལ་གཞིགས་ཏེ་འབྱུང་འགྱུར་གྱི་གོམ་པ་མདུན་སྤོས་གང་འདྲ་བྱེད་དགོས་མིན་བཅས་ཀྱི་ཐོག་སྙིང་སྟོབས་ཀྱི་གོ་ཆ་གྱོན་ནས་བཙན་བྱོལ་བོད་གཞུང་དང་། བྱེས་འབྱོར་མི་མང་རྣམས་ནས་སྔར་ལས་ལྷག་པའི་འབད་བརྩོན་དང་ནུས་པ་བཅས་གཅིག་ཏུ་བསྒྲིལ་ཏེ་འཚེ་མེད་བཞི་བའི་ཐབས་ལམ་གཞི་བཞག་ཐོག་ནས་རང་འཁྲིའི་ལས་འགུལ་དོན་ཕན་ལྡན་པ་གོ་རིམ་བཞིན་སྤེལ་དགོས་རྒྱུ་ནི་དོར་དུ་མེད་པའི་འགན་འཁྲི་ཞིག་ཡིན།
མཐའ་དོན། བོད་རབ་གནས་ས་གླང་ལོའི་གནམ་ལོ་གསར་ཚེས་ལ་འགྲོ་བ་ལྷ་དང་བཅས་པའི་མགོན་སྐྱབས་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་འཕྲེང་བཅུ་བཞི་པ་ཆེན་པོ་རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པ་སྡེ་དཔལ་བཟང་པོ་མཆོག་མཆོག་སྐུ་ཚེ་རྡོ་རྗེའི་ཁམས་སུ་བརྟན་ཅིང་། ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་འགྲུབ་དང་། གཞིས་བྱེས་གཉིས་སུ་བཞུགས་པའི་རིས་སུ་མ་ཆད་པའི་ཆོས་ལུགས་ཆོས་རྒྱུད་ཁག་གི་སྐྱབས་གནས་འཕགས་པའི་དགེ་འདུན་གྱི་སྡེ་དང་རྒྱ་ཆེའི་མང་ཚོགས་བཅས་ལ་བཙན་བྱོལ་བོད་གཞུང་ཆོས་རིག་ལས་ཁུངས་དང་ཆོས་རིག་བཀའ་བློན་ངོས་ནས་འཚམས་འདྲིའི་བཀྲིས་བདེེ་ལེགས་ཞུ་རྒྱུ་དང་ཆབས་ཅིག་རང་རེའི་ཆོས་དང་། རིག་གཞུང་། ཡུལ་གྱི་གོམས་པའི་གཤིས་ལུགས་བཟང་པོ་རྣམས་མི་ཉམས་རྒྱུན་འཛིན་གནང་རྒྱུ་དང་། གཞིས་བྱེས་བོད་མིའི་སྙིང་ལ་བརྣག་པའི་བོད་དོན་བདེན་མཐའ་མྱུར་དུ་གསལ་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གྲུ་འཛིན་གཉིས་པའི་ཕོ་བྲང་གཞལ་མེད་ཁང་གི་བཞུགས་ཁྲི་རིན་པོ་ཆེར་༸ཞབས་སོར་འཁོད་པའི་སྨོན་འདུན་ཤུགས་དྲག་ཞུ་རྒྱུ་བཅས་ཡིན།།
